Bumomo Bɔka 16 - Katɔti Ɔku Kedee

Kora Ku Datan Ku Abiram Atuɔkplu

¹ Kora ɔni ɔti ndi Isa ɔni ɔti ndi Kohat ɔni ɔti ndi Lewi ku Ruben kɔdua bebi bani ndi Datan ku Abiram bani ɔti ndi Eliab ku On ɔni ɔti ndi Pelet bábla atuɔkplu ala adi,

² na báta bénye Mose lɛlɔ. Na Israelƒuɔ banana babune geen bani na badi kelisa benengu nkyuli eti alɔ (250) bébunku-ma.

³ Bekyuli bamɛni báta na lisu kemmo bésie Mose ku Aaron kudɔ na bátásu-ma banini, “Bɛɛyɔ́ bisie ɔgyu bɛgya! Israel kadi bekyuli ƒui bese kedee bete Unwoti bana ɔdi biala, na Unwoti ulieku bula ƒui. Na bi ɔsu na bɛɛnu lɛlɔ katɔ katɔ teetuloku Unwoti bekyuli lɛni?”

⁴ Ka Mose únu etemila amɛni ni, ɔ́yu úbi kalɔ na ɔ́kpali Katɔti.

⁵ Mmɔ na ɔ́su Kora ku nwuna bekyuli bani nsiaku-nwu kama ɔnini, “Kɔnaadi ɔtanta ni, Unwoti ɔdubɔtina ukyuli ɔni ndi nwuna ɔdi na use kedee, na ɔdubɔya na ukyuli ɔmmɔ ɔni ude-nwu. Na ukyuli ɔni na ɔ́ƒuna mmɔ ni, Unwoti ɔlati ɔdubɔya na ɔni ude-nwu.

⁶ Na awɔ Kora ku ƒula kama basiakune ni, bɛwia oloƒui bɔkyula ebui,

⁷ na kɔnaadi bidie ogya ku oloƒui biwi-ni kemmo na Unwoti anumi. Na ukyuli ɔni na Unwoti ɔ́ƒuna ni, anwu nse kedee. Amii Lewiƒuɔ mmomu nésie ɔgyu bɛgya!”

⁸ Mose ɔ́su Kora lɛnɔ ɔnini, “Binu, amii Lewiƒuɔ!

⁹ Israelƒuɔ Katɔti nédie-mii sɛsɛɛ ɔ́lɛku Israelƒuɔ akɔ na ɔ́ya na bɛ́ni bíde-nwu ka bitaabla kabla na Unwoti Adi Kevo kemmo, na binye bekyuli bammɔ kenye bitaabla-nwu kabla teete-ma. Ɔmɛni lɛti útabɔ-mii?

¹⁰ Anwu nédie amii ku Lewiƒuɔ bakladi ɔ́bla nwuna ɔdi. Nsu bɛnu, ɔƒɛni bɛɛwia ka bɛƒɔ ɔkpane kabla lɛnɔ bɛbla bina ɔdi.

¹¹ Unwoti ɔmmɔ geen lɛlɔ na awɔ Kora ku ƒula basiakune bamɛni bɛ́ta binye. Ɔma na Aaron anwu ɔdi ɔsu na bɛɛdɔ lɛlɔ kemmo kalɔ kalɔ na nwuna lɛlɔ?”

¹² Amu na Mose ɔ́tala ɔnii bátálɔ Datan ku Abiram bani ndi Eliab bebi na bebo. Nsu básɔku kenye bémene Mose banini, “Bɔɔɔdubo mmɔ!

¹³ Ɔni lɛti na ákpanku-bu ásiku Egyipte kalɔ kani kana egyiibi ntu bɔɔyu emini aani uwɔ na kana lɛlɔ bebuo baayu anyi ntu pii éboku ketele kalɔ kakwiidi kamɛni kemmo ka bubekpi bɔyii udu útabɔ? Na ɔƒɛni aawia ka asɔ ataadi-bu lɛlɔ lɛlati na mɛni?

¹⁴ Na ɔni ntulo ndi ka éteti-bu éteboku kalɔ kani egyiibi ntu mɔɔyu emini aani uwɔ na kana lɛlɔ bebuo baayu anyi ntu pii, iye bɔkɛ adingyii mmo, iye kɔlɔ kɔbuni kɔni na busie mmo. Bunye na adubunye eteese bekyuli bamɛni lisusu lɛni na ɔ́sa? Oowo bɔɔɔdubo!”

¹⁵ Mmɔ na Mose úbakɛ kɔnyi geen na ɔ́su Unwoti ɔnini, “Taƒɔ bekyuli bamɛni akpala adi. Ńtaƒɔ bana ɔdi lɛla lɛdi ina ebuo ala utine, na ńtaƒiɔ ɔdi lɛnɔ.”

¹⁶ Amu na Mose ɔsu Kora ɔnini, “Kɔnaadi ni, awɔ ku ƒula basiakune ku Aaron ƒui bisie Unwoti Adi Kevo kammɔ anumi.

¹⁷ Na ɔdi biala uti nwuna oloƒui bɔkyula libui na udie ogya ku oloƒui uwi-ni kemmo na biti-nya biboku Unwoti anumi, na ebui ammɔ ƒui adubɔbla eti alɔ (250). Na awɔ ku Aaron lɛnɔ biti bina ɔdi bɛda.”

¹⁸ Anwuɔsu ɔdi biala úti nwuna oloƒui bɔkyula libui na úwi ogya ku oloƒui, na bana ƒui besie beténye Unwoti Adi Kevo kayakun ku Mose ku Aaron lɛnɔ.

¹⁹ Amu ka Kora ɔ́sala nwuna bekyuli bani nsiaku-nwu kama ɔ́wɔlɔ na bébenye baanu Mose ku Aaron anumi na Unwoti Adi Kevo kayakun kenye mmɔ ni, kɔnakunwi ni, Unwoti bukeye bonwu bɔ́bwɛ búbewi bekyuli bammɔ ƒui lɛlɔ.

²⁰ Unwoti ɔ́su Mose ku Aaron ɔnini,

²¹ “Bɛmami lɛlɔ bɛsiku bekyuli bammɔ ƒui kudɔ na ɔdia-mi na lɛyila-ma udu ƒui kɔnakunwi.”

²² Nsu Mose ku Aaron báyula bana lili kalɔ na báva momoomo bákpali Katɔti basu-nwu banini, “O Katɔti, awɔ Katɔti ndi bayawine ƒui ayu ɔti, buti na adubuti kɔnyi akya kasala kammɔ ƒui na ukyuli unwi ɔdi likpidi ɔsu?”

²³ Amu na Unwoti ɔ́su Mose ɔnini,

²⁴ “Su Israelƒuɔ bani ƒui nlie nde Kora ku Datan ku Abiram nvo kudɔ na bata balɛ-ma kudɔ mmɔ besie kama.”

²⁵ Amu na Mose útiku Israelƒuɔ benengu na báta bésie Datan ku Abiram kudɔ.

²⁶ Mmɔ na útébo Israelƒuɔ ɔda ɔnini, “Bɛta bina kuliekɔ mɛni na bɛkpɛ bɛlɛ bekyuli bekpidi bamɛni nvo kudɔ. Na ɔdi biala uteti nwuna kɔnu utetuku bekyuli bammɔ lɛla lɛdi kalɛ na ɔgbankpi ɔmmɔ ɔdi uletuku ɔdi ɔ́si bana likpidi ɔsu.”

²⁷ Ɔmmɔ ɔsu bákpɛ bálɛ Kora ku Datan ku Abiram nvo kudɔ. Uwi ɔmmɔ ni, Datan ku Abiram ku bana beleku ku bana bebi ku bawɔ bálɛ bénye bana nvo kɔyakun kenye.

²⁸ Mmɔ na Mose ɔ́su bekyuli bammɔ ƒui ɔnini, “Ɔmɛni na bɛdubuti bɛnu bɛti ka Unwoti nátala-mi ɔnii mbabla ala amɛni. Na ɔɔɔdi ami ɔlati kasusu kadi.

²⁹ Si bekyuli bamɛni békpi kukpi kɔni kani na bekyuli ƒui beekpi ni, na ɔɔɔdi Unwoti nátala-mi.

³⁰ Nsu si Unwoti údie lɛla lɛwɔdi keyi na ɔ́ya na kalɔ kébimi kenye na kébweli-ma ku ngba ku ngba ama ku bana akɛla ani ƒui na bebo ni, bɛdubɔnu bɔti ka bátanu Unwoti bátabu munu munu.”

³¹ Amu ka Mose ɔ́wɔlɔ nwuna butemi pɛ kalɔ kani lɛlɔ na Datan ku Abiram bene benye mmɔ kábwɛ kemmo inyɔ.

³² Na kalɔ kammɔ kébimi kenye na kébweli-ma ku bana akɛla ƒui kede kede, na kébweli Kora bekyuli lɛnɔ ku bana akɛla ƒui.

³³ Bekyuli bammɔ béduo kekpine ku ngba ku ngba, ku bana ala ani ƒui na bebo na kalɔ kammɔ kásɔ kébile kenye, na báyii udu na bekyuli bammɔ ƒui akɔ.

³⁴ Uwi ɔni na Israelƒuɔ bénu kɔvanu momoomo kɔni bekyuli bani kalɔ kebweli mmɔ bedie uwi ɔni baanyi mmɔ ni, ama lɛnɔ béti usi bétuku na baava taasu banini, “Abu lɛnɔ kalɔ kadubo-bu bubweli!”

³⁵ Kɔnakunwi ni, ogya ɔ́si katɔ úbakyula nkyuli eti alɔ bani mɔɔkyula oloƒui mmɔ.

³⁶ Amu na Unwoti ɔ́su Mose ɔnini,

³⁷ “Su ɔkpane Aaron ubidi Eleasar na ɔla oloƒui bɔkyula ebui ammɔ udie ogya ntɔ bɔmmɔ kemmo na ugyingya ogya ɔmmɔ usienku kama ƒui, ɔsika ebui ammɔ ese kedee,

³⁸ na adi ebui ani na bekyuli bani nábla likpidi béti bana ngba báƒɔ bana likpidi lili kayu adi. Bitu ebui ammɔ bɛbla abuala kɔlɛkɛ bɛbɛɛbɛ bibi lɛkpabi lɛmmɔ lɛlɔ, ɔsika béti-nya béte Unwoti na ese kedee, na unwini likposela ute Israelƒuɔ.”

³⁹ Ɔmɛni ɔsu ɔkpane Eleasar ɔ́la oloƒui ebui ani na bekyuli bani na ogya ɔ́kyula mmɔ béboku na ɔ́ya na bétu-nya bábla kɔlɛkɛ bɛbɛɛbɛ bébi Unwoti Lɛkpabi lɛmmɔ lɛlɔ

⁴⁰ aani kalɛ na Unwoti úbo Mose ɔda. Na ɔmɛni ɔ́bla bɔlɛ úte Israelƒuɔ kaduɛ ka ukyuli ɔni nátasi Aaron kaba kemmo utalɛka usie Unwoti lɛkpabi kudɔ ɔnii utákyula oloƒui ute Unwoti. Na si ɔdi ɔ́bla lɛni ni, Unwoti ɔdubɔyila-nwu udu aani kalɛ na ɔ́bla Kora ku nwuna bekyuli. Na Eleasar ɔ́bla lɛla biala ɔ́siaku pɛpɛɛpɛ aani kalɛ na Unwoti úbo Mose ɔda.

Aaron Ɔ́ƒɔ Israelƒuɔ Ngba

⁴¹ Ka kalɔ kébweli Kora badi kadi kégye kani na Israelƒuɔ ƒui báta na bákya baakya ku Mose ku Aaron unyeƒi na baasu-ma banii, “Amii nádu Unwoti bekyuli badi.”

⁴² Nsu uwi ɔni na Israelƒuɔ básala lɛlɔ na baakya ku Mose ku Aaron unyeƒi mmɔ ni, béti anumi bátina Unwoti Adi Kevo na kɔnakunwi liƒlukutu lɛ́si líbewi ɔtɔ ɔmmɔ lɛlɔ, na Unwoti bukeye bonwu bɔ́bwɛ bɔ́lɛ mmɔ.

⁴³ Amu na Mose ku Aaron bésie béténye Unwoti Adi Kevo kammɔ anumi.

⁴⁴ Na Unwoti ɔ́su Mose ɔnini,

⁴⁵ “Bɛkpɛ bɛlɛ Israelƒuɔ bammɔ kudɔ kalɛ na ɔdia-mi na lɛyila-ma udu kɔnakunwi.” Nsu Mose ku Aaron báyu bébi kalɔ.

⁴⁶ Mmɔ na Mose ɔ́su Aaron ɔnini, “Babla na eti ƒula oloƒui libui na edie ogya asiku Unwoti lɛkpabi lɛmmɔ lɛlɔ na ewi oloƒui, na ekeli esie Israelƒuɔ bammɔ akɔ na atábla akpala ete Unwoti úte bana likpidi kɔtu bɔni budie. Ɔsika Unwoti úti kɔnyi ɔ́kya bekyuli bammɔ na ɔgbankpi úse kalɔ ɔɔlɛ́ku-ma.”

⁴⁷ Anwuɔsu Aaron lɛnɔ ɔ́bla kalɛ na Mose ɔ́su-nwu na úkeli úsie Israelƒuɔ bammɔ kudɔ. Nsu na uwi ɔmmɔ kemmo ni, Unwoti úuse kalɔ ɔɔdú bekyuli bammɔ. Na Aaron ɔ́bla oloƒui bɔkyula akpala úti údie likpidi kɔtu bɔni bana lɛlɔ.

⁴⁸ Únye bekyuli bani nlie ngba ku bani nekpi mmɔ ntɛ ɔ́bla akpala ammɔ na kukpi kɔmmɔ kenye kékulo.

⁴⁹ Nsu nkyuli mpim leevu-ine ku eti leevu-ene (14,700) békpi na ɔgbankpi ɔmmɔ kemmo bébunku bani nékpi ɔ́si Kora atuɔkplu ɔsu.

⁵⁰ Ɔmmɔ kama na Aaron ɔ́sɔ únwini úsie Mose kudɔ na Unwoti Adi Kevo mmɔ, ɔsika ɔgbankpi ɔmmɔ kenye kékulo.