Bumomo Bɔka 13 - Katɔti Ɔku Kedee

Bekyuli Badi Bátávi Kanaan Kalɔ Kemmo Bánu

¹ Amu na Unwoti ɔ́su Mose ɔnini,

² “Die ukyuli unwi unwi na Israel kaba leevu-anyɔ ammɔ batɔnkune akɔ, na besie batánu Kanaan kalɔ kani na lɛ́su ka meti mete Israelƒuɔ mmɔ kemmo banu kalɛ kalɔ kammɔ kese.”

³ Ɔmmɔ ɔsu Mose ɔ́di ɔda bubo bɔni na Unwoti úte-nwu mmɔ lɛlɔ, na ɔ́tala-ma uwi ɔni na bákya Paran ketele kalɔ kakwiidi kemmo mmɔ. Na bekyuli bani Mose ɔ́tala mmɔ ƒui badi Israelƒuɔ batɔnkune.

⁴ Na bekyuli bani bátala mmɔ anyi ndi amɛni. Ruben kaba kemmo ukyuli ndi Sakur ubidi Samua.

⁵ Simeon kaba kemmo ukyuli ndi Hori ubidi Saƒa.

⁶ Yuda kaba kemmo ukyuli ndi Yeƒune ubidi Kaleb.

⁷ Isakar kaba kemmo ukyuli ndi Yuseƒ ubidi Igal.

⁸ Eƒraim kaba kemmo ukyuli ndi Nun ubidi Hosea.

⁹ Benyamin kaba kemmo ukyuli ndi Raƒu ubidi Palti.

¹⁰ Sebulon kaba kemmo ukyuli ndi Sodi ubidi Gadiel.

¹¹ Yoseƒ kaba kemmo ndi Manase kaba ukyuli ndi Susi ubidi Gadi.

¹² Dan kaba kemmo ukyuli ndi Gemali ubidi Amiel.

¹³ Aser kaba kemmo ukyuli ndi Mikael ubidi Setur.

¹⁴ Naƒtali kaba kemmo ukyuli ndi Woƒsi ubidi Nahbi.

¹⁵ Gad kaba kemmo ukyuli ndi Maki ubidi Geuel.

¹⁶ Banana bamɛni na Mose ɔ́tala ɔnii batánu kalɔ kammɔ. Na Mose násia Nun ubidi Hosea lɛnyi Yosua.

¹⁷ Uwi ɔni na Mose ɔ́tala bekyuli bammɔ ɔnii batávi banu Kanaan kalɔ kammɔ ni, ɔ́su-ma ɔnini, “Si bísela ni, na bɛsia Negev kalɔ kemmo na biti bɛkɔ bisie abi lɛma kalɔ kammɔ kemmo.

¹⁸ Na bɛnu kalɛ kalɔ kammɔ kese ku bekyuli bammɔ si badi bekyuli bani mbo ɔlɔkplu iye beeebo ɔlɔkplu, ku si bemomo iye beeemomo.

¹⁹ Na bɛnu bɛnii bi kalɔ udu lɛlɔ belie? Na bɛnu si kalɔ kammɔ kadia iye kaaadia? Na bɛnu bɛnii bi lɛma udu kemmo na bélie? Bátu awoduku bámana-ni munuu bátatu?

²⁰ Na kalɔ kammɔ lɛti nɔɔ, dɛ na lise, lɛdia munuu lɛɛɛdia? Na egyii akya kalɔ kammɔ kemmo munuu eeebo? Bɛsia ulu biala lɛlɔ na biti adingyii ebi adi bɛsiku kalɔ kammɔ kemmo biboku si bɛdubo.” Na uwi ɔmmɔ ɔdi adingyii ebi edeedi bugyie uwi.

²¹ Ɔmɛni ɔsu bekyuli bamɛni báyu ulu na bátávi bánu kalɔ kammɔ ɔ́si Sin ketele kalɔ kakwiidi kemmo útédu Rehab, kesii kani baasia teesie Hamat.

²² Na básia Negev kalɔ kemmo na bákɔ bétédu Hebron, kesii kani na Anak kaba kemmo bekyuli bani ndi Ahiman ku Sesai ku Talmai bélie. Báada Hebron ɔma akwa maatɛ kama asa na báda Soan ɔma ɔni nkya Egyipte.

²³ Uwi ɔni bédu Eskol ɔni kalɔ ndi kɔkpasa kɔwɛ kemmo ni, békulo egyiibi adi kagba ku kɔkpasa yuu kɔdi. Bákya-nwu ugyii na nkyuli inyɔ básia-nwu amangba ku kɔnwingyie ebi ku egyiibi abambadi lɛnɔ.

²⁴ Na kesii kammɔ baalɔ banii Eskol Kɔwɛ, ɔsika mmɔ na Israelƒuɔ békulo egyiibi kɔkpasa.

²⁵ Na emeyi aavlene kama ni, bávi kalɔ kammɔ kemmo báwɔlɔ na bénwini bébo bana kakyakɔ.

Batalane Bammɔ Bédie Kenye Lɛla Lɛni Na Bánu

²⁶ Amu na batalane bammɔ ƒui bénwini bébo na básala Mose ku Aaron ku Israelƒuɔ ƒui lisu na Paran ketele kalɔ kakwiidi kemmo na Kedes. Mmɔ na básu-ma ala ani bánu na béti egyiibi ani béde na kalɔ kammɔ lɛlɔ adi bátina-ma.

²⁷ Amu na básu Mose banini, “Kalɔ kani lɛlɔ na átala-bu mmɔ ni, sɔsɔ búsie bútéduo-ka kemmo na kana egyiibi ntu bɔɔyu emini aani uwɔ na kana lɛlɔ bebuo baayu anyi ntu pii. Na aanu kana egyiibi ammɔ adi muedi.

²⁸ Nsu bɔɔsu-ɔ ka bekyuli bani nlie mmɔ ni, bebo ɔyikun geen, na bana lɛma linengudi ƒui lɛnɔ bátu awodu bámana-ni. Na mmɔ muedi na bɔ́nu Anak kaba bekyuli.

²⁹ Amalekƒuɔ belie bésie Negev kalɔ kemmo na Hetiƒuɔ ku Yebusiƒuɔ ku Amoriƒuɔ ama belie abi eli. Na Kanaanƒuɔ belie bésie ɛpu amadɔ na Yordan kakɛ.”

³⁰ Mmɔ na Kaleb údie lɛdi na ɔ́ya na bekyuli bammɔ bába lɛsɛ na Mose anumi na ɔ́su-ma ɔnini, “Bɛya na busie butéti kalɔ kammɔ, ɔsika bɔdubɔkana bukpo na bɔdi-ma lɛlɔ.”

³¹ Nsu bekyuli bani na ama ku Kaleb bésie mmɔ bénye momoomo básu banii, “Bulakana-ma bukpoku, ɔsika bebo ɔyikun betulo-bu.”

³² Na batalane bamɛni bégyingya bana etemila ekpidi amɛni bákya Israelƒuɔ akɔ. Na básu-ma banini, “Kalɔ kammɔ muedi kalákana edula bɔnwu kaduɛ. Na bekyuli bani udu nli kalɔ kammɔ kemmo bákuku na bébomo.

³³ Na bɔ́nu bekyuli bani náta katɔ na bási Anak kaba kemmo muedi na mmɔ. Na abu buse na buse aani bakpɔtilikpɔ na bana anumi. Na lɛni na badubo-bu bɔnu.”