Bumomo Bɔka 11 - Katɔti Ɔku Kedee

Lɛgyavonku Lɛ́si Unwoti Kudɔ

¹ Na Unwoti únu ka Israelƒuɔ bamɛni bésie kalɔ beetemi enyekpi taasiku-nwu lɛlɔ na lɛbibo lɛni baasiáku ɔsu. Na ka Unwoti únu bana etemila ammɔ ni, úti kɔnyi kaduɛ. Na ɔkɛnku ɔmmɔ ɔsu ɔ́ya na ogya ɔ́si katɔ na úbakyula ala na bana keliekɔ mmɔ amadɔ.

² Na ka bákpali Mose ni, úvele Unwoti na ogya ɔmmɔ úni.

³ Anwuɔsu básia kesii kani na ogya ɔmmɔ ɔ́kyula mmɔ lɛnyi banii Tabera, na nwuna kalɔ ndi bɔkywi. Ɔsika ogya ɔ́si Unwoti kudɔ úbakyula ala bana akɔ.

Unwoti Úte Israelƒuɔ Baasɛ Wɛlɛwɛlɛ Badi

⁴ Amu na baƒɔ bani nsiaku Israelƒuɔ na ketele kalɔ kakwiidi kemmo ku Israelƒuɔ alati bésie kalɔ baawia adila ani badi. Ɔmɛni ɔsu bése kalɔ baasu banini, “Si nka bɔkɛ lɛna lɛdi nka bɔdubɔkun.

⁵ Buunyimo lɛna lɛni bútaakun uwi ɔni bɔ́kya Egyipte, na lɛna lɛmmɔ lítaƒɔ kuye kɔdi, ku egyiibi, ku alakpi lidu, ku kutu akyala aani abuala ku nwuna udu ani ƒui na bútaadi mmɔ lɛnɔ.

⁶ Nsu ɔƒɛni bɔsɔ bulakɛ adila bamba biala taadi amu ntu manna ɔmɛni kani, na anwu lɛnɔ úukpi-bu ɔkwɛ.”

⁷ Na manna ɔmɛni use aani kakpa kebi ƒuala ƒuala.

⁸ Na bekyuli bammɔ baaví taala-nwu na bakɔ-nwu na kukɔ lɛlɔ iye baawɔ-nwu na kaawɛ kemmo. Na beeƒulo-nwu teebo abɔ wɛlɛwɛlɛ na si étu-nwu unyemi na use aani kaaklo ɔni na bágyi ku nnɔmii.

⁹ Na si amii áyu éwi kesii kani na Israelƒuɔ belie mmɔ usien ni, na manna ɔmɛni lɛnɔ ɔ́ɔyu úbewi kalɔ.

¹⁰ Mose únu ka Israelƒuɔ kaduli biala bekyuli bakya beewulo adila kɔnyana kɔmɛni na bana nvo kenye. Na Unwoti úti kɔnyi kati kati ɔ́kya-ma geen, na lɛla lɛmɛni líkpoku Mose geen.

¹¹ Mmɔ na Mose ɔ́kpali Unwoti ɔnini, “Bi ɔsu na éti etila amɛni udu ásia-mi ƒula kabla ɔblane lɛlɔ lɛni? Bi na lɛ́bla-a na útayɔ-ɔ kaƒɔ ɔsu na eti bekyuli bamɛni ƒui etila asia-mi lɛlɔ?

¹² Ami náda bekyuli bamɛni ƒui kaƒɔ, munuu ami náwɔ-ma? Na bi ɔsu na aayɔ́ ka ntaagyu-ma taada enu kemmo aani kalɛ na ukyuli ɔni mɔɔda ubi ɔɔbla, asa na lɛkpanku-ma lisienku kalɔ kani na ése bana bati kuuku kenye ka adubute-ma kemmo?

¹³ Wɛ na ndubo lɛna bɔkɛ bute bekyuli bamɛni? Bakya beewulo kɔnyana taakpali-mi banii ‘Te-bu lɛna lɛdi na bɔkun!’

¹⁴ Kabla kamɛni kétulo-mi na naaakana bekyuli bamɛni ƒui bɔtɔnku ami lɛti.

¹⁵ Na si lɛni na adubo-mi bɔbla bɔdi ni, si áya-mi na líkpi muedi ɔdia-mi utulo si ɔ́yɔ-ɔ kaƒɔ lɛni, na taya na lisie ntásiaku mina ɔgbankpi ɔdi.”

¹⁶ Amu na Unwoti ɔ́su Mose ɔnini, “Die banana liti ku aavlanyɔ bani lɛlɔ mbo ɔbu na badi batɔnkune na bekyuli bammɔ akɔ. Na akpanku-ma eboku na awɔ ku-ma bibenye Unwoti Adi Kevo anumi mɛni.

¹⁷ Na si bébenye mmɔ ni, ndubɔyu bubo-mii kudɔ na lɛtɛmiku-mii. Na mmɔ ni, ndubɔya na mina kɔyu kɔni nkya-a kemmo kɔdi kɔlɛ na liti ku lɛkya bana kemmo ɔdi. Na ama ndubo-ɔ kebunku buteete. Na betiku-ɔ bekyuli bammɔ etila. Kalɛ na asɔ eleti etila ammɔ awɔ lɛti.

¹⁸ “Su bekyuli bammɔ anini, ‘Bikisi lɛlɔ na bɛbla lɛlɔ sɛɛn bite kɔnaadi limeyi lɛni na bɛdubo lɛna bɔkun. Unwoti únu uwi ɔni na bɛkya biiwulo kɔnya bɛnii, “Si bɔkɛ na bɔkɛ lɛna lɛdi bɔkun nka ɔdia, ɔsika uwi ɔni na bɔ́kya Egyipte ni, ala ádianku-bu étulo ɔmɛni!”

¹⁹ Na ɔɔɔdi limeyi linwi iye emeyi anyɔ iye emeyi alɔ iye emeyi leevu iye emeyi aavlanyɔ kani na bɛdubo lɛna lɛmmɔ bɔkɛ bɔkun.

²⁰ Mmomu bɛdubo lɛna lɛmmɔ bɔkun kɔbuli kumodi sɔɔn utédu ka lɛna lɛmmɔ lɛdi lɛ́lɛ-mii enwu kemmo na bɛ́kɛ ɔlɛ bɛ́siku-nwu kemmo na bikisi-ni, ɔsika bíni Unwoti ɔni nkya-mii akɔ, na bíwulo kɔnyana na nwuna anumi na bɛɛsu bɛnini, “Bi ndi lɛla lɛni ɔsu geen na bɛ́lɛ Egyipte kalɔ lɛlɔ?” ’ ”

²¹ Nsu Mose úye Unwoti ɔnini, “Aanu-mi nkɛnku bekyuli mpim eti leevu-anyɔ ku lɛgba mɛni na aasu anini, ‘Ndubute-ma lɛna na bakun kɔbuli kumodi!’

²² Na si ina baƒonu ku ɔmantɛ bakɔ ɛlɛ ɛlɛ na bádu béte-ma muedi lɛna lɛmmɔ lɛdubudu-ma? Na si ketu kemmo kɔbɛ ƒui na béƒie béte-ma lɛnɔ nɔɔ ɔdubudu-ma bɔkun?”

²³ Amu na Unwoti údie Mose kenye ɔnini, “Si lídie kɔnu nnii mɔɔbla lɛla lɛdi ni, bɔsɔ na mina ɔyikun ɔ́sɔ? Adubo bɔnu si lɛla lɛni na lɛ́su lɛdubo-nwu kemmo lɛni iye lilebo.”

²⁴ Ɔmmɔ ɔsu Mose úsie na útásu bekyuli bamɛni lɛla lɛni na Unwoti ɔ́su-nwu ka ɔbla. Na údie batɔnkune liti ku aavlanyɔ bammɔ na ɔ́kpanku-ma úbenyene Unwoti Adi Kevo anumi.

²⁵ Mmɔ na Unwoti ɔ́yu úbo kalɔ na liƒlukutu kemmo na ɔtɛmi ku Mose. Na kɔyu ɔyikun ɔni nkya-nwu ni, údie ɔyikun ɔmmɔ ɔdi ɔ́kya batɔnkune liti ku aavlanyɔ bammɔ kemmo. Na si kɔyu kɔmmɔ kɔ́ƒɔ-ma lɛlɔ kemmo na beedie Unwoti ablala kenye, nsu uwi ulétu gyɔlɔɔ.

²⁶ Nsu banana inyɔ bádi bákya na baalɔ-ma Eldad ku Medad na báƒuna ama lɛnɔ bákya benengu bammɔ akɔ, nsu báƒɔ lɛlɔ bákya bana nvo kemmo mmɔ na bétesie kasakɔ mmɔ, nsu Kɔyu kɔmmɔ kɔ́ƒɔ-ma lɛlɔ kemmo na ama lɛnɔ bákya béteedie Unwoti ablala kenye na bana kakyakɔ mmɔ.

²⁷ Mmɔ na okloƒu ɔdi úkeli usi na útásu Mose ka Eldad ku Medad lɛnɔ bakya beedie Unwoti ablala kenye bana kakyakɔ mmɔ.

²⁸ Amu na Nun ubidi ɔni baalɔ banii Yosua na anwu nsiaku Mose kesi kesii na úsela ɔ́si nwuna lɛkloƒu uwi ɔ́su Mose ɔnini, “Ati, ya na bekyuli bammɔ bada Unwoti ablala kudu bubo baya.”

²⁹ Amu na Mose údie-nwu kenye ɔnini, “Anumi eegyie-ɔ mina lɛlɔ yoo? Si nka ami lɛti ni, nka Unwoti bekyuli ƒui benwini nwuna kenye bediene na Unwoti ɔya na nwuna kɔyu kɔƒɔ-ma lɛlɔ kemmo!”

³⁰ Amu na Mose ɔ́ya na anwu ku benengu bammɔ bénwini bésie bana kakyakɔ.

³¹ Kɔnakunwi Unwoti ɔ́ya na ɔƒɛƒɛɛ ubendi ɔdi úkpo na ɔ́sala baasɛ wɛlɛ wɛlɛ badi ɔ́siku ɛpu kudɔ. Na bakya beeveyi taavi kalɔ kalɔ. Na bébo bewi bekyuli bammɔ kakyakɔ mmɔ ƒui.

³² Ɔmmɔ ɔsu ɔ́si limeyi lɛmmɔ ku kadi kegye usien ku ɔƒɛ bekyuli bammɔ bakya baala baasɛ bamɛni. Na ukyuli biala ɔ́la baasɛ bamɛni aani edula ebi lɛkyami linwi unu. Na bégyingya baasɛ bamɛni béwi ɔƒɛ lɛlɔ kalɛ bakwii.

³³ Nsu asa na badubɔkun lɛna lɛmɛni bebweli ni, Unwoti úti kɔnyi ɔ́kya bekyuli bammɔ geen na ɔ́ya na ɔlɛ ukpidi ɔni mɔɔví úduo-ma akɔ.

³⁴ Anwuɔsu na baalɔ kesii kammɔ banii Kibrot-Hataawa. Na nwuna kalɔ ndi ɔkwɛ adala kaƒiɔtɔ. Ɔsika mmɔ na báva bekyuli bani nkya muuwulo ka lɛna lɛɛda-ma ɔkwɛ.

³⁵ Ka bekyuli bammɔ báta Kibrot-Hataawa mmɔ ni, bésie bétéli Haserot.