Bumomo Bɔka 1 - Katɔti Ɔku Kedee

Israelƒuɔ Báka Lɛlɔ Bánu Bana Bumomo

¹ Na lɛkwa linyɔdi kɔbuli kunyɔdi limeyi lideedi lɛlɔ ka Israelƒuɔ bálɛ Egyipte kalɔ lɛlɔ ni, Unwoti ɔ́tɛmi úte Mose, na Unwoti Adi Kevo kemmo na Sinai ketele kalɔ kakwiidi kemmo mmɔ. Mmɔ na ɔ́su-nwu ɔnini,

² “Awɔ ku Aaron bɛka Israelƒuɔ ƒui na bana adua ku atɔƒi kenye. Na binweni banana bammɔ anyi bise unwi unwi.

³ Na awɔ ku-nwu binweni-ma anyi na akpa akpa ammɔ kenye na bɛnu bani ƒui náaƒɔ akwa aavlanyɔ ku kama na bédu kekpo busie.

⁴ Na bɛƒuna ɔnana unwi bɛsiku Israel kaba biala kemmo na babla batɔnkune na atɔƒi ammɔ kenye na bebunku-mii kabla kamɛni.

⁵ Na bekyuli bani anyi ndubo bɔlɔ mɛni ndubo-mii kebunku kammɔ bute. Na Ruben kaba kemmo ni, Sedeur ubidi Elisur.

⁶ Na Simeon kaba kemmo ni, Surisadai ubidi Selumiel.

⁷ Na Yuda kaba kemmo ni, Aminadab ubidi Nahason.

⁸ Na Isakar kaba kemmo ni, Suar ubidi Netaneel.

⁹ Na Sebulon kaba kemmo ni, Helon ubidi Eliab.

¹⁰ Na Yoseƒ bebi akɔ badi ndi bamɛni. Eƒraim kaba kemmo ni, Amihud ubidi Elisama. Manase kaba kemmo ni, Pedahsur ubidi Gamaliel.

¹¹ Na Benyamin kaba kemmo ni, Gideoni ubidi Abidan.

¹² Na Dan kaba kemmo ni, Amisadai ubidi Ahieser.

¹³ Na Aser kaba kemmo ni, Okran ubidi Pagiel.

¹⁴ Na Gad kaba kemmo ni, Deguel ubidi Eliasaƒ.

¹⁵ Na Naƒtali kaba kemmo ni, Enan ubidi Ahira.”

¹⁶ Banana bani na bédie bálɛku Israelƒuɔ kadi akɔ na badi kaba kaba kammɔ batɔnkune na atɔƒi ammɔ kenye na badi mmɔ.

¹⁷ Mose ku Aaron báƒɔ bekyuli bani anyi na bénweni béte-ma mmɔ,

¹⁸ na bálɔ Israelƒuɔ ƒui básala na kɔbuli kunyɔdi limeyi lideedi lɛlɔ. Na banana bammɔ ɔdi biala údie lɛlɔ ɔ́tina bekyuli bammɔ na kaba ku lɛtɔƒi lɛni kemmo na ɔ́si kenye. Na bénweni-ma anyi unwi unwi ɔ́si akwa aavlanyɔ ku kama,

¹⁹ aani kalɛ na Unwoti úbo Mose ɔda. Anwuɔsu báka bekyuli bammɔ ƒui na Sinai ketele kalɔ kakwiidi kemmo.

²⁰ Na ɔ́si Ruben ɔni ndi Israel ubidi udeedi lɛlɔ ni, báka banana bani nákɛ akwa aavlanyɔ ku kama na bédu ka besie kekpo. Na bénweni-ma anyi unwi unwi na kalɛ bákya bana kaba ku atɔƒi ɔku kemmo kenye.

²¹ Na bana bumomo bɔdi mpim aavlene-ɛku ku eti leevu (46,500).

²² Na Simeon kaba kemmo ni, bénweni banana bani náaƒɔ akwa aavlanyɔ ku kama na bédu kekpo busie anyi aani kalɛ na ɔkya bana kɔdua ku atɔƒi ɔku kemmo.

²³ Na bana bumomo bɔdi mpim liti ku yaalenwi ku eti aku (59,300).

²⁴ Na Gad kaba kemmo ni, bénweni banana bani náaƒɔ akwa aavlanyɔ ku kama na bédu kekpo busie anyi aani kalɛ na ɔkya bana kɔdua ku atɔƒi ɔku kemmo.

²⁵ Na bana bumomo bɔdi mpim aavlene-ɛlɔ ku eti leevu-atɛ (45,650).

²⁶ Na Yuda kaba kemmo ni, bénweni banana bani náaƒɔ akwa aavlanyɔ ku kama na bédu kekpo busie anyi aani kalɛ na ɔkya bana kɔdua ku atɔƒi ɔku kemmo.

²⁷ Na bana bumomo bɔdi mpim liti ku aavlanyɔ-ine ku eti leevu-anyɔ (74,600).

²⁸ Na Isakar kaba kemmo ni, bénweni banana bani náaƒɔ akwa aavlanyɔ ku kama na bédu kekpo busie anyi aani kalɛ na ɔkya bana kɔdua ku atɔƒi ɔku kemmo.

²⁹ Na bana bumomo bɔdi mpim liti ku ine ku eti maane (54,400).

³⁰ Na Sebulon kaba kemmo ni, bénweni banana bani náaƒɔ akwa aavlanyɔ ku kama na bédu kekpo busie anyi aani kalɛ na ɔkya bana kɔdua ku atɔƒi ɔku kemmo.

³¹ Na bana bumomo bɔdi mpim liti ku maatɛ ku eti maane (57,400).

³² Yoseƒ bebi akɔ ni, Eƒraim kaba kemmo ni, bénweni banana bani náaƒɔ akwa aavlanyɔ ku kama na bédu kekpo busie anyi aani kalɛ na ɔkya bana kɔdua ku atɔƒi ɔku kemmo.

³³ Na bana bumomo bɔdi mpim aavlene ku eti leevu (40,500).

³⁴ Na Manase kaba kemmo ni, bénweni banana bani náaƒɔ akwa aavlanyɔ ku kama na bédu kekpo busie anyi aani kalɛ na ɔkya bana kɔdua ku atɔƒi ɔku kemmo.

³⁵ Na bana bumomo bɔdi mpim avlaatɛ-inyɔ ku eti ene (32,200).

³⁶ Na Benyamin kaba kemmo ni, bénweni banana bani náaƒɔ akwa aavlanyɔ ku kama na bédu kekpo busie anyi aani kalɛ na ɔkya bana kɔdua ku atɔƒi ɔku kemmo.

³⁷ Na bana bumomo bɔdi mpim avlaatɛ-ɛlɔ ku eti maane (35,400).

³⁸ Na Dan kaba kemmo ni, bénweni banana bani náaƒɔ akwa aavlanyɔ ku kama na bédu kekpo busie anyi aani kalɛ na ɔkya bana kɔdua ku atɔƒi ɔku kemmo.

³⁹ Na bana bumomo bɔdi mpim liti ku leevu-inyɔ ku eti leevu-ene (62,700).

⁴⁰ Na Aser kaba kemmo ni, bénweni banana bani náaƒɔ akwa aavlanyɔ ku kama na bédu kekpo busie anyi aani kalɛ na ɔkya bana kɔdua ku atɔƒi ɔku kemmo.

⁴¹ Na bana bumomo bɔdi mpim aavlene-unwi ku eti leevu (41,500).

⁴² Na Neƒtali kaba kemmo ni, bénweni banana bani náaƒɔ akwa aavlanyɔ ku kama na bédu kekpo busie anyi aani kalɛ na ɔkya bana kɔdua ku atɔƒi ɔku kemmo.

⁴³ Na bana bumomo bɔdi mpim liti ku ɛtɛ ku eti maane (53,400).

⁴⁴ Bekyuli bamɛni na Mose ku Aaron ku Israel kaba kaba leevu-inyɔ bammɔ batɔnkune báka. Na batɔnkune bammɔ benye bete bana atɔƒi ammɔ.

⁴⁵ Anwuɔsu báka Israelƒuɔ banana bani ƒui náaƒɔ akwa aavlanyɔ ku kama na bédu kekpo busie na bana atɔƒi kenye.

⁴⁶ Na bana bumomo bɔdi mpim eti leevu-anyɔ ku ɛtɛ ku eti leevu-unwi (603,550).

⁴⁷ Na Lewi kaba bekyuli ama bátaka-ma bétebunku bakladi lɛlɔ.

⁴⁸ Unwoti ɔ́su Mose úse ɔnini,

⁴⁹ “Taka Lewi kaba bekyuli tebunku Israel kaba bekyuli ƒui bɔka bɔmmɔ,

⁵⁰ mmomu ya na Lewi kaba bekyuli bammɔ bataabla Unwoti kakpakɔ kabla, na bataanu kakpakɔ kammɔ lɛla biala lɛlɔ. Na ama ndubuteeti Katɔti Adi Kevo kammɔ ku nwuna lɛlɔ ala ƒui. Na ama ndubo-ka lɛlɔ butaanu na bataagyumana-ka taamana.

⁵¹ Anwuɔsu kesi kesii na baayɔ́ ka beti Adi Kevo kammɔ besienku uwi ɔdi iye balɛ-ka ni, Lewi kaba bekyuli bamɛni na ɔdi ka beti-ka iye balɛ-ka lɛnɔ. Na ukyuli bamba biala makpɛ mede kevo kammɔ ni, ɔlɛka badu-nwu.

⁵² Na Israelƒuɔ bakladi ni, babla bana kuliekɔ na bana esu esu kenye ɔdi biala ku nwuna kevo ku bana likposela.

⁵³ Na Lewiƒuɔ bammɔ ama ni, belie bamana Katɔti Adi Kevo kammɔ na bataagyumana-ka kalɛ na ɔdi uláni uléde-mi na mina kɔnyi kubo Israelƒuɔ bammɔ lɛlɔ.”

⁵⁴ Ɔmmɔ ɔsu Israelƒuɔ bábla lɛla biala na Unwoti úbo Mose ɔda ɔnii bábla.