Nehemia 9 - Katɔti Ɔku Kedee

Israelƒuɔ Bévele Likpidi Buti Taakyiɛ

¹ Na limeyi aavlanyɔ-ine na kɔbuli kɔmmɔ lɛlɔ kani kemmo ni, Israelƒuɔ básala lisu na bényimi kenye, na béti adikpi adi bényimi lɛlɔ, na béti ntɔ báwɛɛ bana eli.

² Na Israelƒuɔ geen bámami lɛlɔ bédie báƒɔ bani nkya-ma akɔ kudɔ. Na béténye sɛsɛɛ, na bévele bana ekpidi ani bábla, na bévele béte bana bati kuuku likyulikpi lɛni bábla lɛnɔ.

³ Na bénye mmɔ kani báka Unwoti ɔda bubo ɔku ɔ́si lɛdɔ ɛtɛ sɔɔn. Na básɔ béti lɛdɔ ɛtɛ lɛnɔ beevele bana ekpidi, na baakɔliku bana Unwoti Katɔti lɛnyi katɔ.

⁴ Na Lewiƒuɔ ku Yesua ku Bani ku Kadmiel ku Sabania ku Buni ku Serebia ku Bani ku Kenani bákɔ bénye kugyiikɛ kɔni Israelƒuɔ bátu bálɛ mmɔ lɛlɔ. Na bákpali bana Unwoti Katɔti lɛnyi momoomo.

⁵ Na Lewiƒuɔ ku Yesua ku Kadmiel ku Bani ku Hasabnia ku Serebia ku Hodia ku Sebnia ku Petahia básu Israelƒuɔ ƒui banii, “Bɛta binye na bimwi bina Unwoti Katɔti ɔni nli ngba ɔ́si ɔƒɛni úsela ƒui! “Na buute ƒula lɛnyi bonwu lɛmmɔ kusɛ kusɛ. Na ƒula lɛnyi lɛ́kɔ litulo lɛnyi biala.

⁶ Awɔ lɛti ndi Unwoti. Na awɔ nédie katɔ ku katɔ katɔ ƒui muedi, ku ala ani nkya-nya kemmo. Na awɔ kani nédie kalɔ ku ala ani ƒui nkya-ka ƒui kemmo ku ɛpu ku ala ani ƒui nkya-nwu kemmo. Na awɔ muute lɛla biala ngba, na ala ani nkya katɔ eeboku lili kalɔ teete-ɔ.

⁷ “Na awɔ ndi Unwoti Katɔti na áƒuna Abram na áda-nwu édie ɔma ɔni baalɔ banii Ur ɔni nkya Kaldea kalɛkɛ, na ásia-nwu lɛnyi anii Abraham.

⁸ Awɔ nánu ka nwuna kayi kése siin. Ɔmmɔ ɔsu ényimiku-nwu na éti Kanaanƒuɔ ku Hetiƒuɔ ku Girgasiƒuɔ kalɔ éte nwuna kaba bekyuli. Na ádi ƒula linyese lɛlɔ, ɔsika ese siin.

⁹ “Na ánu bula bati kuuku lɛbibo na énu bana kɔvanu na Ɛpugyie kɔtu.

¹⁰ Na ábla akɔla lidu lidu asiaku Ƒarao ku nwuna kabla bablane ku nwuna bekyuli bani ƒui nli-nwu kalɔ kemmo. Ɔsika ánu áti tati tati ɔni na Hetiƒuɔ béti bábla ƒula bekyuli kalala. Na awɔ nábla lɛnyi éte ƒula lɛlɔ. Na lɛnyi lɛmmɔ lise líbedu ɔmwi kadi.

¹¹ Awɔ néle ɛpu kemmo inyɔ na bánu báti na básia-nwu kemmo bávi aani kalɔ kani nákwii. Nsu bani nábi ásiaku-ma ni, áya na ɛpu lɛmmɔ lɛ́nyina-ma aani kalɛ na lɛtabi lɛɛnyi ntu kalɔ.

¹² Na si ƒula bekyuli bakɛ ɔƒiiwi ni, eeti liƒlukutu teetile ɔƒɛ. Na si bákɛ usien aayá na lɛgyavonku bonwu liite-ma bukeye na ɔɔtina-ma ulu.

¹³ “Na awɔ náyu ébelie Sinai Kɔbi lili, na étemi éte-ma. Na éte-ma ɔda bubo lidu lidu bɔni ndia na buse siin.

¹⁴ Na áya na báti ƒula ɔda bubo lidu lidu bɔni na éti ásiaku Mose lɛlɔ éte-ma.

¹⁵ Na ka kɔka kɔɔda-ma ni, éte-ma adila ásiku katɔ. Na ka ntukwɛ ɔɔda-ma ni, áya na ntu bɔ́bwɛ bɔlɛ lɛtakpɛ bonwu kemmo. Na ásu-ma ka béteesie bététi kalɔ kani átalaku kɔnu katɔ na ése kenye ka eeti-ka eete-ma.

¹⁶ “Nsu bula bati kuuku bamɛni béti tati tati ku atuɔkplu na bátadi ƒula ɔda bubo lɛlɔ.

¹⁷ Na béni ka benyimo ƒula akɔla lidu lidu ani na édie átina na bana akɔ. Na bana atuɔkplu ku bɔta bunye kemmo ni, bédie ɔtɔnkune ɔni nsɔ makpanku-ma matákya bana lɛbibo kabla kemmo. Nsu awɔ Katɔti aanu kɔnyana, na éyi ku bɔyɔ ku lɛƒɔndia, na éti bana ekpidi akyiɛ-ma. Ɔmmɔ ɔsu étenwini kama átakya-ma.

¹⁸ Ábla ala amɛni ina ka ama alati béti bana ala bávɔ ɔmantɛ akɔ bálɛ na básu banii, ‘Bina Katɔti ɔni nédie-mii na ɔ́kpanku-mii ɔlɛku Egyipte mɛni,’ iye ɔni na bétemi ɔkɔ etemila pii béwi-ɔ.

¹⁹ “Na ɔ́si ƒula kɔnyana bonwu kɔni na ébo ɔsu ni, étenwini kama átakya-ma na ketele kemmo mmɔ. Na si ƒula bekyuli bakɛ ɔƒiiwi ni, eeti liƒlukutu teetile-ma ɔƒɛ. Na si bákɛ usien aayá lɛgyavonku bonwu liite-ma bukeye na ɔɔtina-ma ulu.

²⁰ Na éte-ma ƒula Kɔyu kɔbuni kɔmmɔ ka kɔ́da-ma. Na átada ƒula manna étedie-ma kenye kemmo. Na éte-ma ntu na béti bádu bana ntukwɛ.

²¹ Na akwa aavlene sɔɔn áda-ma na ketele kemmo, na bátayaki kulɛla. Na bana adala lɛnɔ átabuɛ iye ɔdi lɛgba lɛ́ta líƒu.

²² “Na áya békpo bádi bagadine ku lɛma pii lɛlɔ ku kɔlɔ kɔni ani alati libo ɔmii. Na békpo bádi Ɔga Sihon ɔni mɔɔdi Hesbon kalɔ lɛlɔ. Na básɔ békpo bádi Ɔga Basan ɔni mɔɔdi Og kalɔ lɛlɔ.

²³ Na áya bana bebi bananabi bemomo aani katɔ ayabi. Na ákpanku-ma éboku kalɔ kani na ásu bana bati ése ka adubuti ka ete-ma.

²⁴ Na bana bebi bananabi béteti kalɔ kammɔ. Na ábɔku Kanaanƒuɔ bani nli kalɔ kammɔ. Na éti Kanaanƒuɔ bammɔ ákya-ma enu kemmo. Na békpo bádi bana baga ku bekyuli bani ƒui nli kalɔ kammɔ lɛlɔ. Na bábla-ma kalala kani námanku.

²⁵ Na békpo bádi lɛma libendi ku kɔlɔ kɔni néyii ku lɛmwi. Na béti kɔduli kɔni ala abuni éyi-ku kemmo. Na béti abiɔ ani béku bése ku ntɛ mmo ku nnɔmii mmo ku adingyii mmo pii. Na bádi na bémo na béle lɛmwi. Na bákɛ ebiti na ƒula lɛbuni bonwu lɛni na ábla ɔsu.

²⁶ “Nsu báyu atuɔkplu na báta bénye-ɔ lɛlɔ. Na béti ƒula ɔda bubo bábala bana kama. Na bádu ƒula kenye bediene bani bákya-ma ɔkplu ka nka benwini bebo-ɔ kudɔ. Na bétemi enyekpi ani mɔɔda lɛƒu béwi-ɔ.

²⁷ Ɔmmɔ ɔsu éti-ma éte bana bekisine, na bábla-ma kalala. Nsu na bana lɛbibo kemmo ni, béwulo bákpali-ɔ na énu-ma bɔ́kpali na kesii kani akya na katɔ mmɔ. Na ƒula kɔnyana bonwu bɔnu kemmo ni, édie ukyuli ɔni ndubukpo bɔƒɔ-ma. Na úbekpo ɔ́ƒɔ-ma ɔ́lɛku bana bekisine enu kemmo.

²⁸ “Nsu uwi ɔni na bákɛ bɔnwuna blii ni, basɔ bábla likpidi na ƒula anumi. Amu na awɔ lɛnɔ ányonu-ma éte bana bekisine kalɛ na badi-ma lɛlɔ. Amu ka básɔ béwulo bákpali-ɔ ni, énu-ma kɔvanu na kalɔ mmɔ. Na ƒula kɔnyana bɔnu kemmo ni, eedie ukyuli ɔni ndubukpo ɔƒɔ-ma si báƒiɔ-ɔ uwi ndi uwi.

²⁹ “Na ébo-ma ɔda ka benwini bebo na babataadi ƒula ɔda bubo lɛlɔ. Nsu bátakpete-ɔ, na béni ƒula ɔda bubo na bábla likpidi básiaku ƒula ɔda bubo bɔni na si nka ukyuli ɔ́di-nwu lɛlɔ ni, ɔdubulie ngba. Nsu na bana kɔdɔlɔ kemmo ni, kama mmomu bénwini bákya-a, na báyu atuɔkplu na béni ka bénu-ɔ litemi.

³⁰ Na ákɛku-ma kayi akwa pii. Na átala ƒula kɔyu ákya ƒula kenye bediene ka basu-ma ɔkplu bɔkya etemila. Nsu ɔmɛni kama ƒui ni, bétenu ƒula litemi. Anwuɔsu ányonu-ma éte bana liku bekyuli.

³¹ Nsu na ƒula kɔnyana bɔnu bɔni ebo ɔsu, átaya na bádi-ma lɛlɔ iye étenwini kama átakya-ma. Ɔsika adi Katɔti ɔni mɔɔnu kɔnyana na ebo lɛƒɔndia.

³² “Ɔƒɛni, o bula Katɔti ɔni na edu na ebomo, na eeti bɔyɔ taadi bunyimi lɛlɔ ni, buvele bɔda-a bɔnii tabu lɛbibo lɛni mɔɔlɛ́ mɛni aani lɛla lɛni nse bliisuɛ na ƒula anumi. Na tabu lɛbibo lɛni mɔɔlɛ́ abu ku bula baga ku bula batɔnkune ku bula bakpane ku kenye bediene ku bula bati ku ƒula bekyuli ƒui lɛlɔ úti ɔ́si Asiriaƒuɔ baga uwi úbedu ɔmwi kadi aani lɛla blii.

³³ Na ala amɛni ƒui bɔlɛ kemmo ni, édie atina ka aabla ala ulu lɛlɔ. Na abu mmomu ni, bula ɔdi naaadia.

³⁴ Na bula baga ku bula batɔnkune ku bula bakpane ku bula bati ƒui ɔdi biala útasiaku ƒula ɔda bubo kama iye bese atu bete-nwu.

³⁵ Ina ɔmwi ɔni bakya bana lɛgadi kemmo na baakɛ́ ƒula ebiti bonwu na kalɔ kani kewi ƒiaa na kélie lɛmwi na aka na éti éte-ma mmɔ lɛlɔ ni, bátasiaku-ɔ iye benwini kama bakya bana ekpidi.

³⁶ “Nsu Unwoti, nu kalɛ na búnwini kabla bablane ɔmwi kadi na kalɔ kani na éti éte bula bati kuuku ka badi-ka adingyii ku edula bamba ani badubo bɔbla.

³⁷ Ɔ́si bula ekpidi ɔsu ni, baga bamba bani na édie ka bataadi-bu lɛlɔ ni, ama mɔɔdi edula ammɔ. Na baga bammɔ mɔɔdi abu ku bula ɔmantɛ bakɔ lɛlɔ kalɛ biala baayɔ́. Na buuvele-ɔ ka bɔkya ɔgbankpi bonwu kemmo.

Bekyuli Bammɔ Bényimi-ku Katɔti

³⁸ “Ɔ́si ɔmɛni ɔsu ni, buunyimiku-ɔ na kakunkɛ lɛlɔ, na bula batɔnkune ku bula Lewiƒuɔ ku bula bakpane bakya kɔnu kalɔ.”