Nehemia 8 - Katɔti Ɔku Kedee

Israel Ɔ́ka Ɔda Bubo Ɔku

^1-2 Na ɔni na uteedu kɔbuli maatɛdi kawɔlɔkɔ ni, ɔdi biala ɔ́tɔlɔ úsie nwuna ɔma. Na limeyi lideedi na kɔbuli kɔmmɔ lɛlɔ ni, Israelƒuɔ ƒui bása na Yerusalem na kesii kani balɔ banii Ntu Kayakun. Na básu Ɔkpane Esra ɔni ndi ɔku unwenine ka udie Mose Ɔda Bubo Ɔku ɔni Unwoti úti úte Israelƒuɔ uboku. Anwuɔsu Esra úsie na útéti ɔda bubo ɔku ɔmmɔ úboku na kesii kani na básala béli. Na banana ku beleku ku banamu bani beenú ala kalɔ násala mmɔ.

³ Na kayakun kammɔ kenye ni, Esra ɔ́ka ɔku ɔmmɔ úte bekyuli bammɔ ɔ́si lɛdigye utédu ɔƒiiwi uwi. Na bekyuli bammɔ bése atu na bénu kaduɛ.

⁴ Na Esra ɔ́kɔ únye kugyiikɛ kɔni na bekyuli bammɔ bátu béte kasala kammɔ lɛlɔ. Na Matitia ku Sema ku Anaia ku Uria ku Hilkia ku Maaseia bénye-nwu kɔdianu. Na Pedaia ku Misae ku Malkia ku Hasum ku Hasbadana ku Sakaria ku Mesulam bénye-nwu kɔmii kakɛ.

⁵ Na bekyuli bammɔ ƒui ɔdi biala ɔɔnu-nwu, na kugyiikɛ kɔni lɛlɔ na ɔ́kɔ unye mmɔ ɔsu. Na uwi ɔni na úbimi ɔku ɔmmɔ kani bekyuli bammɔ ƒui báta bénye kɔnakunwi.

⁶ Amu na Esra ɔ́su ɔnini, “Bɛya na bumwi Unwoti Katɔti ɔni nébomo!” Amu na bekyuli bammɔ ƒui bátalaku bana enu katɔ na básu banini, “Ɔsia lɛni! Ɔsia lɛni!” Na bálɛ akɔnkɔ na béti anumi bébi kalɔ.

⁷ Amu na bekyuli bammɔ báta bénye. Na Yesua ku Bani ku Serebia ku Yamin ku Akub ku Sabetai ku Hodia ku Maaseia ku Kelita ku Asaria ku Yosabad ku Hanan ku Pelaia bani ndi Lewiƒuɔ báya na bekyuli bammɔ ƒui benu etemila ammɔ kalɔ. Na ɔdi biala unye nwuna kenyekɔ.

⁸ Na bédie Katɔti etemila ammɔ kalɔ kalɛ na benu-nya kalɔ kaduɛ bátina-ma.

⁹ Ka bekyuli bammɔ bénu ala ani na ɔda bubo bɔmmɔ bɔwia bɔsiku-ma kudɔ ni, ɔ́bla-ma kalɛ kadi na bése kalɔ beewulo. Ɔmmɔ ɔsu Israelƒuɔ ɔtɔnkune Nehemia ku Ɔkpane Esra ɔni ndi Ɔku Unwenine ku Lewiƒuɔ bani nkya muudie ɔda bubo etemila ani báka mmɔ kalɔ básu-ma banini, “Ɔmwi limeyi lɛmɛni lɛdi limeyi kedee lite Unwoti, bina Katɔti. Ɔmmɔ ɔsu bitewulo na bitadu kɔnyana.”

¹⁰ Na Nehemia ɔ́sɔ ɔ́su ɔnini, “Ɔlɛka biteesie kaduli, na bitánwa adila kaduɛ na bite ɔkpanadi ɔni neeebo ɔdi. Ɔsika ɔmwi limeyi lɛmɛni lɛdi limeyi kedee lite Unwoti. Bitadu kɔnyana, ɔsika Unwoti lɛlɔyɔ lɛdubute-mii lɛlɔkplu!”

¹¹ Na Lewiƒuɔ bammɔ bákɛ bekyuli bammɔ lɛlɔ baasia-ma kɔnu ka betewulo limeyi kedee lɛmɛni udu lɛlɔ.

¹² Anwuɔsu bekyuli bammɔ ƒui bátɔlɔ bésie kɔduli bátánwa, na bádi na báni na béte bakpanadi lɛnɔ. Ɔsika ɔda bubo etemila ani báka bátina-ma mmɔ ni, bénu-nya kalɔ.

Limeyi Kadikɔ Kevo Bɔtu

¹³ Na limeyi lɛni nsia ni, kɔduɔti biala ku bakpane ku Lewiƒuɔ bésie Esra kudɔ ka bátátɛya ɔda bubo etemila ammɔ.

¹⁴ Na mmɔ na bánu báti ka ɔda bubo etemila ani Unwoti úti ɔ́siaku Mose lɛlɔ ni, úbo Israel ƒui ɔda ka si baadi limeyi na kɔbuli maatɛdi kemmo ni, na bataatu nvuo betélie-nya kemmo.

¹⁵ Anwuɔsu béti ɔda bubo bɔmɛni béte-ma ka bataakɔ-ni lɛsa na Yerusalem ku lɛma libendi ku libliidi ƒui na basu-ma banii bakɔ besie abi lɛlɔ na batada like ku egyii kɔgba na beti babla nvuo aani kalɛ na ɔda bubo bɔmmɔ bɔɔsu.

¹⁶ Anwuɔsu bekyuli bammɔ báta na bátáwia egyii kɔgba na bátu nvuo adi bálɛ bana kɔduli lɛsa eli ku kɔduli amadɔ ku Katɔti kakpakɔ amadɔ ku kesii kani kadi beelie taasiaku Ntu Kayakun ku Eƒraim Kayakun amadɔ ƒui.

¹⁷ Na bekyuli bani ƒui na kekpo béƒie-ma na bénwini bébo ni, bátu nvuo amɛni na bélie-nya kemmo. Ɔmɛni ndi lɛla lideedi lɛni na bábla ɔ́si Nun ubidi Yosua uwi. Na ɔdi biala ɔ́kɛ kubiti geen.

¹⁸ Na ɔ́si limeyi lɛmmɔ bɔdi, limeyi lideedi útédu limeyi likplodi lɛlɔ bataaka Unwoti bubo etemila ammɔ adi kakɛ. Na bádi emeyi ammɔ emeyi maatɛ. Na limeyi maanedi lɛlɔ ni, básala na bádi limeyi lɛmmɔ báwɔlɔ aani kalɛ ɔda bubo bɔmmɔ bɔɔtina.