Nehemia 5 - Katɔti Ɔku KedeeNehemia Úte Bawabane Kebunku 1 Amu na uwi ɔdi kama ni, banana ku beleku bésie kalɔ baakyaku bana banwani Yudaƒuɔ unyeƒi. 2 Na badi baasu banini, “Bubo bebi pii, ɔmmɔ ɔsu bɔɔwia edula ebi na butaanwa teete-ma na bataadi kalɛ na belekpi.” 3 Na badi lɛnɔ báasu banini, “Ɔlɛka buti bula kɔduli ku bula mmo ku bula adingyii mmo buti busie ɔkpa na bɔkɛ edula ebi kalɛ na kɔka kuládu-bu.” 4 Na badi lɛnɔ benye baasu banini, “Bútáwia kevonkɔ na búti bɔ́ƒɔ ɔga kuyi kɔni na ɔɔƒɔ́ na bula mmo ku adingyii mmo ɔsu. 5 Nsu ina ka abu ku Yudaƒuɔ benwi bɔdi na bula bebi lɛnɔ bese aani bana badi ni, búuti bula bebi badi búye búte-ma kalɛ na buti bɔƒɔ kayu kammɔ. Báƒɔ bula begblebi badi, na ɔƒɛni bɔsɔ bulati lɛla lɛni bɔbla. Ɔsika békpeli bula mmo ku adingyii mmo báƒɔ bula enu kemmo.” 6 Uwi ɔni ami Nehemia línu bana kɔvanu ku bana etemila ani báasu ni, líti kɔnyi geen. 7 Na líti etemila ammɔ kasusu kɔlɛ kɔlɛ. Mmɔ na líti kɔtɔ bɔdu líte mina bakutine ku mina benengu. Na lɛ́su-ma nnini, “Kuvonsia kɔni mɔɔlɛ́ mɛni kɔ́si-mii kudɔ!” Ɔmmɔ ɔsu lɛ́lɔ bekyuli bammɔ ƒui na búduo litemi lɛmmɔ kemmo. 8 Na lɛ́su-ma nnini, “Ama bani na béye-ma béte bekyuli bani naaadi Yudaƒuɔ ni, bɔ́bla kalɛ na bɔkana, na bɔ́ƒɔ-ma bɔ́siku bekyuli bammɔ kudɔ. Nsu amii binye bina banwani lɛlɔ kalɛ na beti lɛlɔ beye bete-mii, na amii lɛnɔ bɛsɔku-ma biye bite-bu.” Na benengu bammɔ bába lɛsɛ, ka beeebo kulɛla na basu ɔsu. 9 Amu na lísie anumi na lɛ́su-ma nnini, “Lɛla lɛni na bɛɛbla mmɔ lɛɛɛdia munu munu! Na dɛ ɔsu na útalɛka bɛbla ala na Katɔti ulu lɛlɔ, kalɛ na Unwoti ulanyonu-bu ulakya bula bekisine bani naaadi Yudaƒuɔ enu kemmo? 10 “Anwuɔsu ami ku mina banwani bani búti egulabi ku edula ebi búvo búte-ma mmɔ ƒui ni, nsu ɔlɛka bɔda kevonsia bute bɔya. 11 “Anwuɔsu egulabi o-o iye edula ebi o-o iye nnɔmii o-o iye adingyii ntɛ bɔwɔdi ni, bɛsɔku kuvonsia kɔni na bíkulo bídie bite-ma. Na bɛsɔku ɔdi biala nwuna kalɔ iye adingyii mmo iye nnɔmii mmo iye kɔduli bite balati. Ɔmɛni ndi kenye kani mɔɔsu-mii ka bɛbla!” 12 Amu benengu bammɔ básu banini, “Bɔdubɔsɔku bana ala ƒui bute-ma. Bɔsɔ baláƒɔ lɛla biala bulásiku ɔdi biala kudɔ. Na lɛla biala ásu-bu ni, bɔdubɔdi-ni lɛlɔ.” Amu na ami Nehemia lɛ́lɔ mina bakpane ƒui ku mina bakutine ƒui, na lɛ́ya na bákpali Katɔti bése kenye kalɛ na badi bana linyese lɛlɔ. 13 Amu na lídie kɔdi kɔni nda-mi kavobi na lɛ́kuna-ku na lɛ́su nnini, “Lɛni na Katɔti ɔdubo bɔkuna bina akɔ ɔdi biala ɔni naaadi nwuna linyese lɛlɔ.” Na lɛ́sɔ lɛ́su nnini, “Katɔti ɔdubɔƒɔ bina kɔduli ku bina lɛla biala lise-mii ku lɛla lɛni nébu-mii.” Na ukyuli biala ɔni nése mmɔ ɔ́su ɔnii, “Ɔsia lɛni!” Na bana ƒui bémwi Unwoti. Na bekyuli bammɔ bábla aani kalɛ na básu. 14-15 Na ɔ́si akwa leevu-anyɔ ani na lɛ́kya Ɔga Artasasta kudɔ na údie-mi ka ńtaanu Israelƒuɔ lɛlɔ úti úbedu nwuna akwa avlaatɛ-inyɔ lɛlɔ ni, ami iye mina banwani ɔdi biala útadi adila ani beete Yudaƒuɔ lɛlɔ ɔnune kudii. Nsu bekyuli bani bátɔ-mi na kabla kamɛni udu kenye ni, ama béti etila bonwu básia bekyuli bammɔ lɛlɔ, na baaƒɔ́ sika ɔƒualadi akyami aavlene ku adila ku ntɛ taasiku bekyuli bammɔ kudɔ. Na lɛni kani na bana kama basiakune lɛnɔ bataabla. Nsu na Katɔti bɔyia kemmo ni, ami ńtabla ɔbladu ɔmmɔ udu kudii. 16 Mmomu ami líti lɛlɔ líse líte awodu ammɔ bɔtu. Na mina bekyuli bani ƒui bábla kabla béte-mi ni, ami iye ama ɔdi biala útawia kalɔ útete lɛlɔ. 17 Na ɔni nsɔ nsia ni, limeyi ndi limeyi Yudaƒuɔ benengu eti atɛ ku kadi bamba bekyuli bani muubo-mi kudɔ baadi mina kaduli. 18 Na limeyi ndi limeyi ni, mɔɔdú ɔmantɛ akɔ unwi ku baƒonu bani nélie lɛmwi ɛku ku bakɔkɔ badi teeti taanwa. Na limeyi leevudi biala lɛlɔ ni, muute-ma ntɛ udu biala. Nsu ɔmɛni kama ƒui ni, ńtasu bekyuli bani mɔɔnu lɛlɔ kudii nnii bete-mi adila ani ɔlɛka beteete Yudaƒuɔ lɛlɔ ɔnune. Ɔsika bemomo na ala ani baawia lɛnɔ émomo. 19 Amu na lɛ́kpali katɔ lɛ́su nnini, “O Unwoti Katɔti, nyimo-mi ku kɔnyana bɔnu na ala ani ƒui lɛ́bla líte bekyuli bamɛni ɔsu.” |
© 1995, 2014 Ghana Institute of Linguistics, Literacy and Bible Translation in cooperation with Wycliffe Bible Translators, Inc.
Wycliffe Bible Translators, Inc.