Nahum 1 - Katɔti Ɔku Kedee

¹ Unwoti ɔ́su kenye kadi ɔ́siku Niniwe lɛlɔ na údie ɔ́tina Nahum ɔni nási Elkosi.

Unwoti Úti Kɔnyi Kpakplaa Ɔ́kya Niniwe

² Unwoti ɔdi Katɔti ɔni naaawia ka ukyuli ɔdi ukpoku-nwu kogyulo, mmomu ɔɔwia ka badi nwuna litemi lɛlɔ siin. Na ɔɔƒɔ nwuna bekisine kayu teedie-ma kasi na kɔnyi kemmo.

³ Unwoti use buɛɛ na uleyile kɔnyi buti, nsu ubo ɔyikun. Anwuɔsu bani ƒui mɔɔƒiɔ́-nwu ni, ɔɔnu ka ɔ́ni-ma kɔtu, na ɔdi ulekeli lɛtuni lɛmmɔ. Nwuna ablala eedie lɛlɔ keyi na ɔƒɛƒɛɛ kpakplaa ɔni mɔɔkya ligede kemmo. Na nwuna lɛgba kalɔ ɔtumu ndi liƒlukutu lɛni bɔɔnu.

⁴ Si Unwoti údie lɛdi ni, ɛpu ku ntukpa ƒui bɔɔkwii, na aku ani nkya Basan ku Karmel ku Lebanon abi lɛlɔ ƒui egyii ku anwula aayɛyɛ.

⁵ Na si ɔ́da ɔ́lɛ ni, abi ammɔ aagyú taawɔ, na abinkpo eegyingya aani kalɛ na lɛla lɛdi lɛɛyɛlɛ, na kalɔ kammɔ ku kana lɛlɔ bekyuli ƒui baatɔ́ kpakpaakpa na nwuna anumi.

⁶ Ɔma ndubɔkana Unwoti kɔnyi kpakplaa kɔmmɔ kenye bunye? Nwuna kɔnyi kuubile ala aani kalɛ na ogya ɔɔda taakyula ala, na atabi muedi aabwɛ.

Unwoti Ɔdubo Asiriaƒuɔ Ɔyikun Bubile

⁷ Unwoti ɔdia, na ɔɔgyumana bekyuli bani néti bana anu básia-nwu lɛlɔ, na uudie-ma na lɛbibo uwi.

⁸ Nsu nwuna bekisine ama ni, ɔɔbɔku-ma taatákya kasuudikɔ aani kalɛ na ketu kani néyi kaagbála ala ku kɔku momoomo taatɔlɔku, na ɔyila-ma udu.

⁹ Anwuɔsu kayi katatɔlɔ ɔdi na anwu ku ɔdi babla kasusu kekpidi na Unwoti lɛlɔ, ɔsika Unwoti uléti kɔnyi taaní bekyuli kɔtu na bakali banii basɔ bebo ngba bɔdi!

¹⁰ Mmomu ala adubo-ma bunyimi aani kalɛ na liyu alakpi eedie bekyuli iye ntɛ bɔɔda-ma. Ogya ɔdubɔkyula-ma kede kede aani alakpi ani nákwii kalɛ.

¹¹ Asiria, bina batɔnkune akɔ unwi ɔ́ya na bása lili bábla kasusu kekpidi na Unwoti lɛlɔ.

¹² Ɔmɛni ndi lɛla lɛni na Unwoti ɔɔsu ɔnii, “Ina dɛ na Asiriaƒuɔ bemomo na bábla unwi na bebo ɔyikun ni, badubo udu bɔyii! Na awɔ Yuda ina ka lɛ́ya na ébo abi dii muedi ni, nsɔ lɛɛɛdubo bɔya na ɔmmɔ udu ɔsɔ ɔlɛku-ɔ.

¹³ Ndubɔƒɛ bina kɔgba kɔni nda-mii na lɛya bɛkɛ bɔnwuna bɛsiku Asiriaƒuɔ kudɔ.”

¹⁴ Na amii Asiriaƒuɔ ni, Unwoti ɔ́su lɛnɔ na bina lɛlɔ ɔnii, “Bina anyi adubɔyii ƒui kede kede, na bebi badi basɔ balakya-mii kama na bakɔliku-mii lɛnyi katɔ. Na ndubɔbwɛ bina baƒiɔ bani na bɛ́vɔ ku bani na bɛ́nwi bíse bina aƒiodu ƒui. Na bina likyulikpi ɔsu ni, ndubo-mii kɔƒiɔtɔ budie buse.

¹⁵ “Amii Yudaƒuɔ, bɛɛnu ka ɔtalane ɔdi ɔ́si abi lɛlɔ ɔdubo ku keyi buɛɛ linyesia lɛbuni. Bɛdi bina emeyi abuni ku lɛlɔyɔ na bɛbla bɛsiaku kenye kani na bíse Unwoti lɛlɔ. Ɔsika lɛ́yila bina bekisine ƒui udu, na nsɔ lɛɛɛdubo bɔya na basɔ bebekpo-mii.”