Mika 6 - Katɔti Ɔku Kedee

¹ Unwoti ɔ́su nwuna bekyuli ɔnini, “Bɛlɛ bibo na bɛda bina etemila bɛva na bunu na abinkpo ku abi enengudi ƒui anumi.

² Israel, ndubudie bina bɔƒiɔ keyi lɛtina na abi ku kayawi kammɔ ɔ́si kalɔ kesekɔ ƒui na bidie lɛla lɛmmɔ kenye.

³ “Mina kadi bekyuli, bɛsu na linu si lɛ́ƒiɔ-mii na ulu ɔdi lɛlɔ?

⁴ Lɛ́ƒɔ-mii lɛ́siku Egyipteƒuɔ enu kemmo kesii kani na nka bɛkya bɛɛbla-ma kabla. Na lɛ́tala Mose ku Aaron ku Miriam nnii batɔnku-mii.

⁵ “Bitayiƒala kasusu kekpidi kani na Moabƒuɔ Ɔga Balak ɔ́bla ɔ́siku-mii lɛlɔ iye lɛla lɛni na Beor ubidi Bileam ɔ́su-nwu ku kalɛ na údie kenye. Na binyimo akɔla ala budie taatina ala ani na ami Unwoti lɛ́bla ɔ́si bina keliekɔ na Sitim mmɔ úsie Gilgal.”

⁶ Na bana akɔ ɔdi ɔdubɔkana na uye ɔnini, “Unwoti, bi na ndubuti liboku mbakpa awɔ ɔni na ƒula lɛnyi lɛ́kɔ katɔ kakaaka mɛni si uwi ɔni na líbo nnii mbakya-a lili kalɔ? Ɔmantɛ bakɔ bakɔdi bani náƒɔ lɛkwa linwi na bélie lɛmwi na baadia bɔnu teetulo ƒui na muuti liboku?

⁷ Baƒonu mpim mpim ndubɔda-a kubiti? Munuu nnɔmii ƒɛƒɛɛ na muuti liboku na butaagba aani ketu na ɔdubɔƒɔ-ɔ anu? Munuu mina ubi ɔnanabi udeedi na ndubuti lɛkpa-a na mina ekpidi bonwu lili na ɔƒɔ-ɔ anu?”

⁸ Unwoti ɔlati ɔ́su-bu lɛla lɛni na ɔlɛka bɔbla. Na lɛla lɛni na ɔɔwia ɔsiku-bu kudɔ ndi ka bɔbla ala ulu lɛlɔ, na butaayɔ bekyuli ku lɛƒɔndia, na buboku lɛlɔ kalɔ buɛɛ, na bɔsiaku-nwu kama siin.

⁹ Bise atu na binu, ɔsika Unwoti ɔɔtɛmiku amii bani ƒui na bɛkya ɔma unengudi ɔmmɔ kemmo na ubo ɔyikun ɔni na ɔni bekyuli kɔtu. Na bekyuli bani mɔɔyia awɔ Unwoti ni, bebo lɛnunda.

¹⁰ “Ala eyudi ndi akɛla ani na bɛ́klibi bíse lɛlɔ. Na bɛda akɔkula ani nátamanku biiyé ala taanya bekyuli taakya.

¹¹ Nsu ami Unwoti ndubo-mii kɔtu bɔni na akɔkula ekpidi ani na bɛda bɛɛkya ala na bɛɛkɔ́ku ala unu lɛnɔ na biiyú-ma mɛni ɔsu.

¹² “Amii balakɛne bibo kalala na bina akɔ ɔdi biala ɔɔnyi ɔkɔ.

¹³ Anwuɔsu na líse kalɔ mɔɔkyula-mii na bɛyii udu na bina ekpidi ɔsu.

¹⁴ Bɛdubo bɔdi bɔsia kama, nsu bilémo. Na bɛdubɔklibi ala abuni bise lɛlɔ, nsu aaadubo ami adi bunwini. Ɔsika kuwii kenye na ndubɔya na beƒie-nya baƒɔ batɔlɔku na kekpo kemmo.

¹⁵ Bɛdubo bɔtuma, nsu bɛɛɛdubo edula ammɔ bɔƒɛ. Na ndubɔya na bidie nnɔ kaduɛ, nsu amii alati bileti-mu bilabla lɛla lɛdi. Na bɛdubo egyiibi bubulo na bidie ntɛ, nsu bilákɛ-mu biláni.

¹⁶ “Ala amɛni ndubo-mii bɔlɛku na ɔni na bɛsiaku Ɔga Omri ku ubidi Ɔga Ahab likyulikpi ala bɔbla kama ɔsu. Anwuɔsu ndubo-mii udu bɔyila ku bina akɛla ƒui na kadi bamba bekyuli ƒui bataama-mii na bedumi-mii.”