Mika 5 - Katɔti Ɔku Kedee

¹ Yerusalemƒuɔ, bekpone bekisine báka bámana-a na báƒiɛmi Israel ɔtɔnkune ugyii anumi.

² Unwoti ɔnini, “Awɔ Betlehem na Eƒrata kalɛkɛ kemmo, awɔ ndi ɔma blii suɛ ntulo na Yuda kalɔ lɛlɔ. Nsu uuuse lɛni, ɔsika ƒula kemmo na ɔtɔnkune ubendi ɔdubɔlɛ ɔsi na watɔnku mina kaduli bekyuli Israelƒuɔ wete-mi. Na ɔdubɔbla ukyuli ɔni na nwuna kaba kése kalɔ kási kukuuku na ala kalɔ kesekɔ ƒui.”

³ Na Unwoti ɔdubudie Israel atu wetédu uwi ɔni na uleku ɔni nda kɔƒɔ ɔdubɔwɔ lɛlɔ ɔdine ɔmɛni, na nwuna badi bakladi basɔ benwini bebo Israel.

⁴ Na lɛlɔ ɔdine ɔmɛni ɔdubɔtɔnku nwuna bekyuli ɔkɛnku Unwoti nwuna Katɔti ɔni lɛnyi muukeye lɛlɔ. Na ɔdubɔnu-ma lɛlɔ aani kalɛ na baƒonu ɔdane ɔɔnu nwuna baƒonu lɛlɔ. Na nwuna bekyuli badubulie ku atu bɔyɔ, na lɛla lɛdi lilékpoku-ma. Na kayawi kadi bekyuli ƒui badubɔnu kalɛ geen na úbomo.

⁵ Ɔsika anwu ɔmmɔ geen ndanku keyi buɛɛ ku atu bɔyɔ bammɔ. Si Asiriaƒuɔ békpo-bu kalɛ kalɛ na bébile-bu kalɔ ku bula baga kesii dɛ ni, abu lɛnɔ bula batɔnkune baƒunadi badi badubɔtɔnku-bu na bɔdubukpoku-ma budie kasi.

⁶ Batɔnkune bamɛni bekpone kpakplaa badubunye na badi Asiriaƒuɔ lɛlɔ na baƒɔ-bu na bana lɛkɔkɔ si bákali ka bakɔ-bu basɔ na beti-bu kalɔ.

⁷ Yakob kaba kemmo bebi ɛlɛɛ badi bébu na bégyingya bákya kalɔ kammɔ lɛlɔ ƒui kadi bekyuli akɔ. Nsu Unwoti ɔdubɔya na benwini aani amii ani mɔɔyu teewi ala lɛlɔ iye ɔnantu ɔni mɔɔna na kalɔ kaayɔ́. Na ɔɔɔdubo bɔsi bekyuli kudɔ, mmomu ɔdubɔsi Unwoti ɔlati kudɔ.

⁸ Ɔƒaani ni, bekyuli négyingya-ma bákya kalɔ ekpo ekpo ƒui. Nsu kama ni, badubɔta na bekpo bana bekisine aani kalɛ na gyata ɔni néti kɔnyi geen ɔɔta teetéƒie koƒonu. Na begyingya bana bekisine bammɔ kɔkɛ kɔkɛ ɔni na ukyuli ɔdi ulakana-ma bɔƒɔ.

⁹ Bekisine bamɛni balakana lɛlɔ bɔnwanɛ ulu biala lɛlɔ, mmomu badubɔyila-ma udu ƒui kede kede.

¹⁰ Unwoti ɔnini, “Na uwi ɔmmɔ kemmo ni, bina bekpone ku bina bapɔnkɔ ku kɛɛkɛ ɔni na baaní mmɔ ƒui ni, ndubo-ma bɔyila aani kalɛ na beenine lɛla lɛdi teedie.

¹¹ Na bina lɛma linengudi ku ɔma kɔgyumanakɔ kɔni na bɛ́tu ƒui ndubo-ku bubile.

¹² Na bina kabɔ ala bɔbla ku like lɛni na biibó ƒui ndubutile ɔmmɔ bene ƒui ulu.

¹³ “Na atabi ku egyii ala ani na bɛ́nwi bíse lɛlɔ bɛɛkpá mmɔ ni, ndubo-nya bɔbwɛ ƒui na bɛsɔ bɛɛɛdubo-nya bɔkpa lɛnɔ.

¹⁴ Na lɛbwɛ bina baƒiɔ ligyii ku bina lɛma lɛnɔ muedi.

¹⁵ “Ndubo kɔnyi buti geen, na lɛni kadi bani bekyuli néni banii baaadubo-mi litemi bunu kɔtu na lidie-ma kasi na bana ɔbladu kenye.”