Mateo 4 - Katɔti Ɔku Kedee

Ukisine Ɔmmɔ Úkpoku Yesu Ɔ́nu

¹ Amu na Katɔti Kɔyu kútiku Yesu kúsienku ketele kemmo kesii kani na ukisine ɔmmɔ ukpoku-nwu ɔnu.

² Na ka Yesu úlie kɔka usien ku ɔƒɛ emeyi aavlene kama ni, kɔka kúbo kɔɔda-nwu.

³ Amu na ukisine ɔmmɔ úbo-nwu kudɔ na ɔ́su-nwu ɔnini, “Si Katɔti ubidi na adi ni, su atabi amɛni na enwini adila.”

⁴ Mmɔ na Yesu údie kenye ɔnini, “Bunweni Kedee Ɔku ɔɔsu ɔnii, ‘Adila lɛti eléte ngba. Mmomu Katɔti litemi biala lɛlɔ bɔdi muute ngba geen.’ ”

⁵ Amu na ukisine ɔmmɔ ɔ́kpanku Yesu úsienku Yudaƒuɔ ɔma unengudi kemmo. Na úti-nwu útényene Yudaƒuɔ kakpakɔ likpo lɛni nákuku lítulo ƒui.

⁶ Amu na ɔ́su-nwu ɔnini, “Si Katɔti Ubidi na adi ni, na aba lɛgyu eténye kalɔ. Ɔsika Bunweni Kedee Ɔku ɔɔsu ɔnii, “ ‘Katɔti ɔdubɔtala nwuna batu na bagyu-ɔ bada enu kemmo ɔni na ƒula ɔgba muedi uletulo atabi adi.’ ”

⁷ Yesu údie kenye ɔnini, “Nsu Bunweni Kedee Ɔku ɔmmɔ ɔɔsu ɔnii, ‘Takɔku ƒula Unwoti Katɔti tanu.’ ”

⁸ Amu na ukisine ɔmmɔ úti Yesu úsienku kɔbi kangyaa kɔdi lili. Mmɔ na ɔ́tina-nwu kayawi agala ku ana bukeye ƒui.

⁹ Na ɔ́su Yesu ɔnini, “Si álɛ akɔnkɔ na émwi-mi ni, ndubuti ala amɛni ƒui lite-ɔ.”

¹⁰ Amu na Yesu údie kenye ɔnini, “Satan, gyu-mi lɛlɔ! Bunweni Kedee Ɔku ɔ́su ɔnii, ‘Ƒula Unwoti Katɔti kani na ɔlɛka alɛ akɔnkɔ emwi.’ ”

¹¹ Amu na ukisine ɔmmɔ ɔ́tɔlɔ Yesu kudɔ, na Katɔti batu bébo bébebunku-nwu.

Yesu Úse Nwuna Kabla Kalɔ Na Galilea

¹² Uwi ɔni na Yesu únu ka béƒie Yohane bákya ɔtɔ ni, ɔ́tɔlɔ úsie Galilea.

¹³ Útelie Nasaret, mmomu úsie útélie Kapernaum, ɔma ɔni na uwi Galilea Ɛpu kudɔ na Sebulon ku Naƒtali kalɔ lɛlɔ.

¹⁴ Úlie mmɔ kalɛ na Katɔti Kenye Udiene Yesaia kenye kani na ɔ́su úse kebo kete lɛni ɔnini,

^15-16 “Sebulon ku Naƒtali bekyuli bani nli lɛdisa kemmo na ɛpu ulu lɛlɔ na Yordan Ketu ɔvi ku Galilea kesii kani na bekyuli bani naaadi Yudaƒuɔ lɛnɔ belie ni, badubɔnu bukeye. Na bani na belie kukpi ɔgbankpi kemmo ni, Katɔti bukeye bɔdubuwi-ma lɛlɔ.”

¹⁷ Ɔ́si uwi ɔni na Yesu útélie Kapernaum ni, úse kalɔ ɔɔkɔ́ lɛsa ɔnini, “Binwini kama bɛkya bina ekpidi, ɔsika uwi ɔni na Katɔti ɔdi lɛga na bula kɔyi kemmo úude.”

Yesu Ɔ́lɔ Asawu Bewine Ine Badi Ɔnii Basiaku-nwu

¹⁸ Na ka Yesu ɔkɛ Galilea Ɛpu kɔtu ni, ɔ́nu banwani inyɔ badi bani ndi asawu bewine. Ama ndi Simon ɔni baalɔ Petro ku ɔnwani Andrea ka bada asawu beedie lɛna na Ɛpu ɔmmɔ kemmo.

¹⁹ Yesu ɔ́su-ma ɔnini, “Ɔ́si ɔƒɛni ni, bɛsiaku-mi na lɛtina-mii kalɛ na beedie bekyuli teete Katɔti.”

²⁰ Mmɔ kani na báda bana lɛsawu béwi na básiaku-nwu kama.

²¹ Amu ka úsie blii ni, ɔ́sɔ ɔ́nu banwani inyɔ badi bani baalɔ Yakobo ku Yohane bani ndi Sebedeo bebi. Ama ku bana ɔti Sebedeo ɔmɛni bakya ɔkɔlɔ kemmo baaklibi bana lɛsawu asa na Yesu ɔ́lɔ-ma.

²² Mmɔ kani na báda bana ɔti bákya ɔkɔlɔ ɔmmɔ kemmo na ama lɛnɔ básiaku-nwu kama.

Yesu Ɔ́bwi Lɛlɛ Lidu Lidu Ƒui Na Bana Akɔ

²³ Yesu ɔ́vi Galilea kalɔ lɛlɔ ƒui na ɔ́tina ala na Yudaƒuɔ kasalakɔ. Na ɔ́kɔ lɛsa na Katɔti lɛgadi litemi buni lɛlɔ. Na ɔ́bwi bekyuli bani muuƒi lɛlɛ lidu lidu ƒui.

²⁴ Nwuna lɛlɔ litemi lígyingya na Siria kalɔ lɛlɔ ƒui. Anwuɔsu bekyuli bákpanku balɛne bani na lɛlɛ lidu lidu liikpóku-ma béboku. Na badi ni, ayu ekpidi elie-ma lɛlɔ eekpóku-ma. Na badi beeƒi kalɛ teebo. Badi lɛnɔ lɛlɔ kakɛ kékpi-ma. Na Yesu ɔ́bwi-ma ƒui.

²⁵ Bekyuli pii bási Galilea ku lɛma linengudi leevu lɛdi kemmo ku Yerusalem ku Yudea kalɔ ku Yordan Ketu ɔvi ƒui bábasiaku Yesu kama.