Mateo 25 - Katɔti Ɔku Kedee

Ɔdi Ka Bulie Kagyumana

¹ “Na uwi ɔni na ami Ukyuli Ɔyawine Ubi ndububo ni, Katɔti lɛga bɔdi buse aani ɔmɛni. Uwi ɔdi kemmo ni, belekubi leevu badi béti bana lɛsogya banii batákpanku uleku ɔgya ku ulekudi besienku kaduli.

² Bana kemmo ɛlɔ badi badɔlɔdi, na ɛlɔ bakladi lɛnɔ badi banundane.

³ Badɔlɔdi bammɔ béti bana lɛsogya, nsu béteti nnɔmii bɔdi bétebunku-ni.

⁴ Na banundane bammɔ ama béti nnɔmii bébunku bana lɛsogya báda.

⁵ Ka uleku ɔgya ɔmmɔ ɔ́kpɛ kama ku bubo ɔsu ni, lɛlɛɛ líbo lɛɛda begblebi bammɔ na bálɛɛ.

⁶ “Ɔbla usientɛ asa bénu kɔvanu ka ni, ‘Bɛɛnu uleku ɔgya ɔmmɔ o-o! Bɛta bɛlɛ bibo na butásiaku-nwu!’

⁷ “Amu na begblebi leevu bammɔ báta na bátu bana lɛsogya.

⁸ Na badɔlɔdi bammɔ básu banundane bammɔ banii, ‘Bite-bu bina nnɔmii bɔmmɔ bɔdi, ɔsika bula lɛsogya lɛdaku buni.’

⁹ “Na banundane bammɔ básu-ma banini, ‘Bula nnɔmii bulédu abu ku-mii, anwuɔsu biteesie beyene kudɔ na bitéye bina bɔdi.’

¹⁰ “Ka bánya bátɔlɔ kani na uleku ɔgya ɔmmɔ úbeduo. Na begblebi ɛlɔ bani náda lɛlɔ bése mmɔ básiaku-nwu béduo uleku ketikɔ mmɔ, na bákalɛ ɔtɔ.

¹¹ “Kama ni, begblebi bakladi bammɔ lɛnɔ bébo na básu banii, ‘Ati, ati! Ya na buduo!’

¹² “Na uleku ɔgya ɔmmɔ ɔ́su-ma ɔnini, ‘Kudi kudii! Lɛɛɛgyi-mii.’ ”

¹³ Amu na Yesu ɔ́wɔlɔ lɛgba lɛmmɔ ɔnini, “Anwuɔsu bilie kagyumana, ɔsika bɛɛɛgyi limeyi iye uwi ɔni na masɔ mebo.”

Ɔdi Ka Bɔda Ala Ani Na Katɔti Úti Ɔ́kya-bu Lɛkɔkɔ Kaduɛ

¹⁴ “Na uwi ɔni na Ukyuli Ɔyawine Ubi ɔdubo ni, Katɔti lɛga bɔdi bɔdubuse aani ɔmɛni lɛnɔ. Uwi ɔdi kemmo ni, unengu ɔdi ɔ́ta na ɔ́bla kasusu ka usie ulu ɔdi. Ɔ́lɔ nwuna kabla bablane na úti nwuna ala ɔ́kya-ma lɛkɔkɔ.

¹⁵ Úte ɔdi biala lɛla lɛni na wakana bɔda. Unwi ni, úte-nwu egulabi aƒo alɔ. Na ɔbambadi ni, úte-nwu aƒo anyɔ. Na ɔkladi ni, úte-nwu koƒo kunwi. Na ɔ́tɔlɔ úsie ulu.

¹⁶ Kabla ɔblane ɔni náƒɔ aƒo alɔ amɛni úsie kalɔ kɔnakunwi na útébo egulabi ammɔ únwini na ɔ́sɔ ɔ́kɛ aƒo alɔ ɔ́sia.

¹⁷ Lɛni kani na kabla ɔblane ɔni náƒɔ aƒo anyɔ lɛnɔ úbo nwuna ɔdi únwini na ɔ́sɔ ɔ́kɛ aƒo anyɔ abambadi ɔ́sia.

¹⁸ Nsu kabla ɔblane ɔni náƒɔ egulabi koƒo kunwi anwu úsie útégyeli kalɔ na úti nwuna unwoti egulabi ɔ́bɛla mmɔ.

¹⁹ “Na emeyi pii adi kama ni, kabla bablane bamɛni unwoti ɔmmɔ únwini úbo na anwu ku-ma bábu akunta.

²⁰ Kabla ɔblane ɔni náƒɔ egulabi aƒo alɔ úti aƒo alɔ bamba ɔ́sia úboku na ɔ́su ɔnii, ‘Ati, éte-mi egulabi aƒo alɔ na lɛ́kɛ alɔ líbunku.’

²¹ “Nwuna unwoti ɔmmɔ ɔ́su-nwu ɔnii, ‘Kabla ɔblane ɔbuni, ábla lɛla biala ulu lɛlɔ geen! Ka ásia ala blii suɛ amɛni anu kaduɛ ɔsu ni, ndubuti-ɔ linyene ala enengudi kenye. Bo butaadi na butaani na butaakɛ ebiti!’

²² “Kabla ɔblane ɔni náƒɔ egulabi aƒo anyɔ lɛnɔ úbo na ɔ́su ɔnini, ‘Ati, éte-mi egulabi aƒo anyɔ na lɛ́kɛ aƒo anyɔ bamba líbunku.’

²³ “Nwuna unwoti ɔmmɔ ɔ́su-nwu ɔnii, ‘Kabla ɔblane ɔbuni, ábla lɛla biala ulu lɛlɔ geen! Ka ásia ala blii suɛ amɛni anu kaduɛ ɔsu ni, ndubuti-ɔ linyene ala enengudi kenye. Bo butaadi na butaani na butaakɛ ebiti!’

²⁴ “Amu na kabla ɔblane ɔni náƒɔ egulabi koƒo kunwi úbo na ɔ́su ɔnini, ‘Ati, ngyi ka adi ukyuli ɔni na ƒula litemi libo ɔkplu na eedé edula na kesii kani na átava adi. Na aaƒɛ edula kesii kani na átagya adi.

²⁵ Na ka mɔɔyia ɔsu ni, líti ƒula egulabi ammɔ ńtéku lɛ́kya kalɔ. Anwuɔsu aanu ƒula egulabi ƒui mɛni.’

²⁶ “Nwuna unwoti ɔmmɔ ɔ́su-nwu ɔnini, ‘Kabla ɔblane ukpidi ku ɔkɔsɔne na adi. Agyi ka muudé edula na kesii kani na ńtava adi, na mɔɔƒɛ edula kesii kani na ńtagya lɛla lɛdi.

²⁷ Amu bi ɔsu na éteti mina egulabi étetése egulabi kesekɔ, na si líbo ni, na mbaƒɔ mina egulabi ku kuvonsia?’

²⁸ “Amu na unwoti ɔmmɔ ɔ́su kabla ɔblane bamba ɔnini, ‘Bɛƒɔ egulabi ammɔ na nwuna kudɔ na biti-nya bite ukyuli ɔni nda aƒo leevu mmɔ.’

²⁹ Ɔsika ukyuli ɔni mbo lɛla lɛdi ni, anwu kani na basɔ badubo bute na ɔsɔ ɔkɛ ubu. Na ukyuli ɔni neeebo ɔdi anwu ni, ubliidi ɔni nse-nwu muedi ni, badubɔƒɔ balɛku-nwu lɛkɔkɔ.

³⁰ Na kabla ɔblane ɔni na nwuna lɛlɔ liiibo kɔsia kɔdi mɛni anwu ni, bibo-nwu bɛlɛku bitákya kasuudikɔ. Mmɔ na keku ku animi bɔdu bɔdubɔkya.

Ukyuli Ɔyawine Ubi Ɔmmɔ Ndi Bekyuli Ƒui Litemi Ɔtɛne

³¹ “Uwi ɔni na Ukyuli Ɔyawine Ubi ɔmmɔ ɔdububo na nwuna lɛga bɔdi kemmo ni, Katɔti batu ƒui badubɔka bamana-nwu. Na ɔdubo ubelie nwuna lɛgaboku lɛlɔ.

³² Na kadi ƒui bekyuli badubɔsala bebenye-nwu anumi. Mmɔ na ɔdubule-ma kemmo aani kalɛ na baƒonu lɛlɔ ɔnune ɔɔƒuna baƒonu taalɛku bese akɔ.

³³ Ɔdubɔya na bekyuli babuni bebenye-nwu kudɔ. Na ɔdubɔya na bekyuli bekpidi bammɔ besie kama.

³⁴ “Na Ɔga ɔmmɔ ɔdubɔsu bekyuli bani nnye-nwu kudɔ ɔnini, ‘Amii ndi bekyuli bani na Katɔti ɔni ndi mina Ɔti ɔ́ya na lɛlɔ lɛdubɔyɔ-mii kaduɛ. Anwuɔsu bibo na bibeduo lɛga kadikɔ kani na Katɔti ɔ́klibi úse úte-mii ɔ́si kayawi kalɔ kesekɔ ƒui.

³⁵ Mɔɔƒɔ-mii kayu kamɛni ɔsika uwi ɔni na kɔka kɔ́da-mi ni, bíte-mi adila. Ka utukwɛ ɔ́da-mi ni, bíte-mi ntu. Ka ndi ɔƒɔ ni, bígyingya enu bɛ́ƒɔ-mi na ḿbeduo-mii kudɔ.

³⁶ Na ka nkɛ kasɔngya ni, bíte-mi adala. Na uwi ɔni na muuƒi ni, bɛ́nu-mi lɛlɔ. Ka bákya-mi ɔtɔ ni, bíbo bíbanu-mi.’

³⁷ “Mmɔ ni, bekyuli babuni bamɛni badubuye-nwu banini, ‘Ati, uwi ɔmani na bɔ́nu-ɔ ka kɔka kɔɔda-a na búte-ɔ adila, iye utukwɛ ɔɔda-a búte-ɔ ntu?

³⁸ Uwi ɔmani na adi ɔƒɔ ébeduo-bu na bɔ́ƒɔ-ɔ, iye akɛ kasɔngya na búte-ɔ adala?

³⁹ Na uwi ɔmani na búnu ka eeƒi iye bákya-a ɔtɔ na búbo búbanu-ɔ?’

⁴⁰ “Amu na Ɔga ɔmmɔ ɔdubudie kenye ɔnini, ‘Mɔɔsu-mii nnii uwi ɔni na bíbunku ukyuli ɔni na bilábu ƒui na mina badi akɔ ni, ami na bɛ́bla bíte.’

⁴¹ “Amu na ɔdubɔsu bani na ɔ́ya na bésie kama ɔnini, ‘Bɛkpɛ bɛlɛ-mi lɛlɔ, amii bani na Katɔti úwida! Biteesie lɛgyavonku lɛni neeeni kudii na Katɔti ɔ́klibi úse úte ukisine ɔmmɔ ku nwuna ayu ekpidi kemmo!

⁴² Kɔka kɔ́da-mi na bítete-mi adila na lɛdi. Utukwɛ ɔ́da-mi na bítete-mi ntu na lɛni.

⁴³ Ndi ɔƒɔ ḿbeduo-mii na bítaƒɔ-mi. Nkɛ kasɔngya na bítete-mi adala. Líƒi na bákya-mi ɔtɔ, nsu bítabanu-mi.’

⁴⁴ “Amu na ama lɛnɔ badubuye-nwu banini, ‘Ati, uwi ɔmani na bɔ́nu ka kɔka kɔɔda-a, iye utukwɛ ɔɔda-a, iye adi ɔƒɔ, iye ákɛ kasɔngya, iye eeƒi, iye bákya-a ɔtɔ na bútebo na bubebunku-ɔ?’

⁴⁵ “Mmɔ na Ɔga ɔmmɔ ɔdubɔsu-ma ɔnini, ‘Mɔɔsu-mii ka ni, uwi ɔni na bítabla lɛbuni bítete ukyuli ɔni na balábu ƒui na mina badi akɔ ni, ami na bítabla bítete!’ ”

⁴⁶ Yesu ɔ́wɔlɔ ɔnini, “Bekyuli bamɛni na badubuti batákya lɛbibo lɛni naaadubo bɔsa kudii kemmo. Na bekyuli babuni bammɔ badubɔkɛ ngba bɔni naaadubo bɔsa kudii.”