Mateo 22 - Katɔti Ɔku Kedee

Yesu Úbo Lɛgba Na Uleku Buti Limeyi Bɔdi Lɛlɔ

¹ Yesu ɔ́sɔ ɔ́tina bekyuli ala na agba kemmo ɔnii,

² “Katɔti lɛga bɔdi buse aani ɔmɛni. Uwi ɔdi ni, ɔga ɔdi ɔ́di uleku buti limeyi lɛdi úte ubidi.

³ Ɔ́tala nwuna kabla bablane ɔnii batásu bekyuli bani na ɔ́lɔ ɔnii bebo limeyi kadikɔ mmɔ na bebo. Nsu béni na banii belebo.

⁴ “Anwuɔsu ɔ́tala kabla bablane babambadi ɔnii batásu bekyuli bammɔ banii, ‘Limeyi lɛni bɔdubo bɔdi lídu! Bɔ́ɔdu bebuo bani ƒui na bɔdubuti bútaanu-mii kama. Na báaklibi lɛla biala bése. Anwuɔsu biteebo uleku ketikɔ!’

⁵ “Nsu bana ɔdi biala útabu nwuna bɔlɔ bɔmmɔ. Mmomu bátɔlɔ bésie kesii kani na ɔdi biala ɔɔyɔ́. Ɔdi ɔ́tɔlɔ úsie nwuna kemo. Na ɔdi lɛnɔ úsie kuye kadikɔ.

⁶ Na babambadi lɛnɔ béƒie kabla bablane bammɔ na bébo-ma na bádu-ma.

⁷ Ɔga ɔmmɔ ɔ́kɛ kɔnyi geen, na ɔ́tala nwuna bekpone na bátádu bekyuli badune bammɔ ƒui na bákyula bana ɔma.

⁸ “Amu na ɔ́lɔ nwuna kabla bablane na ɔ́su-ma ɔnini, ‘Mina ubi uleku buti limeyi lɛmmɔ bɔdi uwi údu. Nsu bekyuli bani na lɛ́lɔ liboku limeyi lɛmmɔ kadikɔ ni, bátamanku bétete limeyi lɛmmɔ.

⁹ Anwuɔsu biteesie kuye ekpo ekpo ƒui na bitálɔ bekyuli bani na bɛdubɔnu ƒui bɛnii bebo limeyi kadikɔ mɛni.’

¹⁰ Amu na kabla bablane bammɔ bésie kuye ekpo ekpo ƒui bátálɔ ukyuli biala na bánu béboku. Bekyuli bekpidi ku babuni ƒui béyi ɔtɔ ɔmmɔ.

¹¹ “Na ka ɔga ɔmmɔ úduo úsie utánu bekyuli bani nlie kadikɔ mmɔ ni, ɔ́nu ɔnana ɔni naaakya uleku ketikɔ limeyi bɔdi awu.

¹² Na ɔga ɔmmɔ úye-nwu ɔnini, ‘Ɔkpana, dɛ na ɔ́bla asa na ébo mɛni na aaakya uleku ketikɔ limeyi bɔdi awu?’ Nsu útakana kenye budie.

¹³ “Amu na ɔ́su nwuna bagyumanane mmɔ ɔnini, ‘Bibo kɔgba bɛda-nwu enu ku lɛgba, na bibo-nwu bɛlɛku bitákya kasuudikɔ. Mmɔ na keku ku animi bɔdu bɔdubɔkya.’ ”

¹⁴ Na Yesu ɔ́wɔlɔ lɛgba lɛmɛni ɔnini, “Katɔti ɔɔlɔ bekyuli pii ka baƒɔ-nwu badi, nsu ɛlɛɛ kani na ɔ́ƒuna údie-ma akɔ.”

Yesu Ɔ́tɛmi Ɔsiku Kuyi Bute Lɛlɔ

¹⁵ Ƒarisiƒuɔ badi bátása na bábla kasusu banii betéwi Yesu kenye benu na bawia-nwu litemi.

¹⁶ Anwuɔsu bátala bana batɛyane badi ku bekyuli bani nsiaku Herode kama bákya Yesu. Na ka bésie ni, básu-nwu banini, “Ala ɔtinane, bɔgyi ka ese siin na aatina Katɔti bɔƒɔtaadi ulu ɔmmɔ geen, ɔsika alánu ukyuli anumi taabla lɛla lɛdi. Na alákpete bekyuli asula lɛnɔ.

¹⁷ Anwuɔsu, su-bu ƒula kasusu. Bula ɔda bubo buute kuƒi ka butaaƒɔ kuyi teete Romaƒuɔ Ɔga Unengudi munuu útalɛka butaaƒɔ?”

¹⁸ Nsu Yesu ɔ́ɔnu bana lɛkwɛ likpidi ɔ́ti ɔsu na ɔ́su-ma ɔnini, “Amii anumi lɛlɔ bekyuli! Bi ɔsu na bɛwia-mi litemi?

¹⁹ Bɛtina-mi kaplɛ kani na biiti taaƒɔ kuyi kɔmmɔ na bɔnu.” Amu na béti ɔdi béboku-nwu.

²⁰ Mmɔ na Yesu úye-ma ɔnini, “Ɔma na báta básia mɛni, na ɔma lɛnyi nsia mɛni?”

²¹ Amu na bédie kenye banini, “Ɔga Unengudi Kaesare na ɔdi.” Anwuɔsu Yesu ɔ́su-ma ɔnini, “Biti lɛla lɛni ndi Kaesare lɛdi bite Kaesare. Na biti lɛla lɛni ndi Katɔti lɛdi bite Katɔti.”

²² Ka bénu ɔmɛni ni, kasusu kéƒu-ma na bátɔlɔ-nwu kudɔ.

Yesu Ɔ́tina Ka Bekpine Badubɔsɔ Bata

²³ Na limeyi lɛmmɔ kani lɛlɔ ni, Sadukiƒuɔ bani mɔɔsu banii bekpine basɔ baláta bébo Yesu kudɔ.

²⁴ Na bébeye-nwu banini, “Ala ɔtinane, Mose ɔ́su-bu ɔnii si ɔnana ɔdi úkpi na ɔ́da ulekudi úse na beeebo bebi ni, na ɔnana ɔmmɔ ɔnwani ɔnanabi uti ukpinele ɔmmɔ. Na anwu ku-nwu bawɔ bebi. Na beti bebi bammɔ babla aani ɔnana ɔni nsɔ neeebo mmɔ bebi.

²⁵ Amu na uwi ɔdi ni, banwani bananabi maatɛ badi bákya mɛni. Ɔnanabi unengudi úti uleku, na bátawɔ asa na ɔnanabi ɔmmɔ úkpi. Na nwuna ɔnwani ɔnanabi ɔni nsia-nwu kama úti ukpinele ɔmmɔ.

²⁶ Na ɔnanabi unyɔdi ku ɔtɛdi útálɛ maatɛdi lɛlɔ ƒui béti uleku ɔmmɔ ɔni anwu ku bana kemmo ɔdi bátawɔ asa na békpi.

²⁷ Na kawɔlɔkɔ ni, uleku ɔmmɔ lɛnɔ úbekpi.

²⁸ Na ɔƒɛni ni, limeyi lɛni lɛlɔ na bekpine badubɔsɔ bata ni, bana akɔ ɔmani ulekudi na uleku ɔmmɔ wenwini ka bana ƒui béti-nwu dii?”

²⁹ Yesu údie kenye ɔnini, “Bɛ́yii ulu ɔmmɔ geen! Ɔsika bilenu Bunweni Kedee Ɔku ɔmmɔ kalɔ, na bɛɛɛgyi lɛla lɛdi na Katɔti ɔyikun lɛlɔ.

³⁰ Na si bekpine básɔ báta belie ngba ni, badubɔbla aani Katɔti batu na beleti beleku na belelie agya lɛnɔ.

³¹ Bítaka lɛla lɛni na Katɔti ɔ́su-mii ɔ́si kalɛ na bekyuli badubɔsɔ bata lɛlɔ? Katɔti ɔ́su ɔ́siku bina bati kuuku lɛlɔ ɔnini,

³² ‘Ami ndi Abraham Katɔti ku Isak Katɔti ku Yakob Katɔti!’ Ɔmɛni ɔɔtina ka ama bani néekpi ni, bamu beli ngba. Anwuɔsu ɔdi ama lɛnɔ Katɔti.”

³³ Na ka bekyuli pii bammɔ bénu ala amɛni ni, bana kasusu kábla kalɛ kadi na ala ani na Yesu ɔ́tina ɔsu.

Yesu Ɔ́tɛmi Na Ɔda Bubo Bɔni Ndi Unengudi Lɛlɔ

³⁴ Uwi ɔni na Ƒarisiƒuɔ bammɔ bénu ka Yesu ala kenye budie bɔ́ya na Sadukiƒuɔ bammɔ básɔ bátakana na beye lɛla lɛdi ni, bábasala.

³⁵ Na bana kemmo unwi ɔni ndi ɔda bubo ala ɔtinane ɔ́wia ɔnii uuye Yesu litemi lɛdi na uti ɔkywɛ-nwu kakpagyuɛ. Ɔ́su ɔnini,

³⁶ “Ala ɔtinane, ɔda bubo bɔmani ndi bunengudi ƒui na ɔda bubo bɔmmɔ ƒui akɔ?”

³⁷ Yesu údie kenye ɔnini, “Ɔlɛka bɛyɔ Unwoti ɔni ndi bina Katɔti ku bina kayi ƒui ku bina kɔyu ƒui ku bina kasusu ƒui.

³⁸ Na ɔmɛni ndi ɔda bubo bunengudi ƒui. Na ɔdi uuutulo ɔmɛni.

³⁹ Na ɔni nsɔ nsia lɛnɔ use aani udeedi ɔmmɔ kalɛ. Yɔ ƒula ukyulikpana aani ƒula lɛlɔ kalɛ.

⁴⁰ Ɔda bubo inyɔ bɔmɛni lɛlɔ na Mose ɔda bubo ku Katɔti kenye bediene ala bɔtina ƒui bɔsia.”

Ɔma Ndi Ukyuli Ɔƒunadi Ɔmmɔ?

⁴¹ Ka Ƒarisiƒuɔ badi bása lisu ni, Yesu úye-ma litemi lɛdi ɔnini,

⁴² “Bi na bɛɛkali taasiku Ukyuli Ɔƒunadi ɔmmɔ lɛlɔ? Na ɔma kaba kemmo ubi na ɔdi?” Bédie kenye banii, “Ɔga Dawid kaba kemmo ubi na ɔdi.”

⁴³ Amu na Yesu úye-ma ɔnini, “Si use lɛni ni, dɛ na ɔ́bla asa na Dawid ɔkɛnku Katɔti Kɔyu ɔyikun lɛlɔ na ɔɔlɔ-nwu ɔnii Ɔti? Na Dawid ɔmmɔ ɔlati ɔ́su ɔnini,

⁴⁴ “ ‘Katɔti ɔ́su mina Ɔti ɔnini, “Sɔ lie-mi kɔdianu kakɛ wetédu uwi ɔni na maya na akɔliku ƒula lɛgba anya ƒula bekisine lɛlɔ.” ’

⁴⁵ Na si Dawid ɔɔlɔ Ukyuli Ɔƒunadi ɔmmɔ ɔnii Ɔti ni, dɛ na ɔ́bla na ɔ́sɔ ɔdi Dawid ɔmmɔ kaba kemmo ubi?”

⁴⁶ Bana akɔ ɔdi útakana na udie Yesu litemi lɛmmɔ kenye. Na ɔ́si limeyi lɛmmɔ lɛlɔ ni, ɔdi ɔ́sɔ útakana na use kayi uye Yesu litemi lɛbambadi lɛdi.