Mateo 20 - Katɔti Ɔku Kedee

Kabla Bablane Bátuma Na Limeyi Lɛyuƒɔla Kenye

¹ “Katɔti lɛga bɔdi buse aani ɔmɛni kalɛ. Uwi ɔdi ni, ukyuli ɔdi ɔ́ta ɔtanta tutuutu ɔnii utáwia bekyuli badi na batuma nwuna kemmo bete-nwu na limeyi lɛyuƒɔla kenye.

² Kemo ɔlati ku kabla bablane bénu lɛlɔ kalɔ ka badubɔƒɔ limeyi lɛyuƒɔla, na bátɔlɔ bésie-nwu kemo.

³ “Uwi ɔni na úbo lɛdɔ yaalenwi ni, ɔnana ɔmmɔ ɔ́sɔ úsie kuyeya na útánu banana badi ka benye ukpludi.

⁴ Anwuɔsu ɔ́su-ma ɔnini, ‘Amii lɛnɔ biteesie mina kemo bitátuma na ndubɔƒɔ-mii kayu kani námanku bina kabla kammɔ.’

⁵ Anwuɔsu bésie kemo kammɔ. “Na ɔ́sɔ úsie kuyeya mmɔ útábla lɛni kani lɛdɔ leevu-inyɔ ku lɛdɔ ɛtɛ kemmo.

⁶ Uwi ɔni na lɛdɔ ɛlɔ líbo ni, ɔ́sɔ úsie kuyeya mmɔ na útánu banana babambadi ka bénye mmɔ. Na úye-ma ɔnini, ‘Bi nébo ɔsu na amii bilie mɛni ɔmwi limeyi limodi na bítabla kabla kadi?’

⁷ “Bédie kenye banii, ‘Ukyuli ɔdi útete-bu kabla kadi ɔnii bɔbla.’ “Anwuɔsu ɔ́su-ma ɔnini, ‘Amu biteesie mina kemo.’

⁸ “Amu uwi ɔni na lɛdɔ ɛku líbo ni, kemo ɔlati ɔmmɔ ɔ́su batumane bammɔ lɛlɔ ɔnune ɔnini, ‘Lɔ batumane bammɔ ƒui na aƒɔ-ma kayu. Na ese kalɔ asi bekyuli bekplodi lɛlɔ atálɛ bedeedi lɛlɔ.’

⁹ “Amu na báƒɔ limeyi lɛyuƒɔla kayu béte bekyuli bani nébo useyi lɛdɔ ɛlɔ kemmo.

¹⁰ Na uwi ɔni na údu bani néesie ɔtanta lɛdɔ ɛku lɛlɔ ni, básusu banii ama badubɔkɛ betulo bana bakpana. Nsu ama lɛnɔ ɔdi biala ɔ́kɛ limeyi kenye lɛyuƒɔla.

¹¹ Na ka báƒɔ egulabi ammɔ ni, bése kalɔ baadɔnku kemo ɔlati ɔmmɔ banii,

¹² ‘Bekyuli bani nábla kabla ɔdɔ unwi ku abu bani nénye ɔƒɛ lɛlɔ limeyi limodi ƒui bɔ́ƒɔ lɛyuƒɔla linwi!’

¹³ “Amu na kemo ɔlati ɔmmɔ ɔ́su-ma ɔnini, ‘Bakpana, binu kalɔ. Ńtaƒiɔ-mii. Ami ku-mii ƒui búnu kalɔ bɔnii limeyi kenye kayu ndi bina lɛyuƒɔla.

¹⁴ Anwuɔsu bɛƒɔ bina lɛyuƒɔla na biteesie kaduli. Mɔɔyɔ́ ka lite bekyuli bekplodi bamɛni lɛyuƒɔla lɛni kani na líte-mii.

¹⁵ Mbo kuƒi na lɛblaku mina egulabi kalɛ na mɔɔyɔ́. Anwuɔsu ɔƒɛ utada-mii na mina lɛƒɔndia lɛlɔ.’ ”

¹⁶ Amu na Yesu ɔ́wɔlɔ ɔnini, “Lɛni geen na bekyuli bani ntɔ badubɔvi bakpɛ kama, na bani nkpɛ kama bavi batɔ.”

Yesu Ɔ́sɔ Ɔ́su Nwuna Kukpi Lɛlɔ Litemi

¹⁷ Uwi ɔni na Yesu ku nwuna batɛyane bákɔ bésela Yerusalem ni, úti-ma úsienku kɔƒɛlɛ.

¹⁸ Na ɔ́su-ma ɔnini, “Binu, búsela Yerusalem kesii kani na badubuti ami Ukyuli Ɔyawine Ubi bakya bakpane benengu ku ɔda bubo ala batinane enu kemmo. Na badubɔdu-mi kukpi kɔtɔ.

¹⁹ Na ama bani naaadi Yudaƒuɔ badubuti-mi babla lɛmala, na bebo-mi, na bakana-mi bamana ugyii lɛlɔ na likpi. Nsu emeyi atɛ kama ni, Katɔti ɔdubɔgyila-mi ɔlɛku bekpine akɔ.”

Yakobo Ku Yohane Uni Úye Yesu Ɔnii Ubunku Nwuna Bebi

²⁰ Amu na Sebedeo ulekudi útiku nwuna bebi inyɔ úsienku Yesu kudɔ ɔnii útevele-nwu kebunku.

²¹ Na Yesu úye-nwu ɔnini, “Bi na aawia?” Amu na uleku ɔmmɔ údie kenye ɔnini, “Mɔɔwia ka ese-mi kayi na si éduo ƒula lɛga kadikɔ ni, na ete kuƒi na mina bebi bananabi inyɔ bamɛni belie ƒula kɔdianu kakɛ ku ƒula kɔmii kakɛ.”

²² Yesu ɔ́su-ma ɔnini, “Bɛɛɛgyi lɛla lɛni geen na biiye. Lɛbibo lɛni ndubo buti ni, amii lɛnɔ bɛdubɔkana-nya buti?” Amu na bedie kenye banii, “Ɛɛn, bɔdubɔkana.”

²³ Mmɔ na Yesu ɔ́su-ma ɔnini, “Sɔsɔ na ɔdi ka bɛdubɔkana-nya buti. Nsu liiibo kuƒi ka lidie ukyuli ɔdi nnii ulie-mi kɔdianu ku kɔmii. Kuliekɔ kɔmɛni kuse kute bekyuli bani na mina ɔti ɔ́klibi-ku úse.”

²⁴ Amu uwi ɔni na batɛyane leevu bakladi bénu ka banwani bammɔ baayɔ́ ka badi-ma lɛlɔ ni, béti kɔnyi geen!

²⁵ Anwuɔsu Yesu ɔ́lɔ-ma ɔ́sala na ɔ́su-ma ɔnini, “Bɛgyi ka lɛlɔ badine bani mɔɔdi bekyuli bani nátaƒɔ bátadi lɛlɔ ni, bebo ɔyikun biala na bana lɛlɔ.

²⁶ Nsu ɔɔɔdi lɛni na ɔlɛka use na amii baƒɔtaadine akɔ. Si bina akɔ ɔdi ɔɔyɔ́ ka ɔƒɔ lɛnyi ku ɔbu ni, ɔlɛka unwini kabla ɔblane ute bakladi.

²⁷ Na si bina akɔ ɔdi ɔɔyɔ́ ka ɔbla udeedi ni, ɔlɛka ɔbla lɛlɔ aani ukyuli uyedi ute bakladi ƒui.

²⁸ Lɛni na ami Ukyuli Ɔyawine Ubi lɛ́bla. Ńtebo nnii babla mina kabla. Mmomu líbo mbabla kabla na liti mina ngba lɛƒɔ bekyuli pii lili kayu.”

Yesu Ɔ́bwi Banumbwɛne Inyɔ

²⁹ Uwi ɔni na Yesu ku nwuna batɛyane bátɔlɔ Yeriko ni, bekyuli pii badi basiaku-ma.

³⁰ Na banumbwɛne inyɔ badi belie ulu kudɔ na bénu ka Yesu ɔ́si ɔɔví. Amu na bése kalɔ baava banii, “Blɔti, Ɔga Dawid Uwɔ! Nu-bu kɔnyana!”

³¹ Bekyuli bammɔ básu banumbwɛne bammɔ banii baba lɛsɛ. Nsu ni, báva momoomo bébu banii, “Blɔti, Ɔga Dawid Uwɔ! Nu-bu kɔnyana!”

³² Yesu údi únye na ɔ́lɔ-ma úboku na úye-ma ɔnini, “Bi na bɛɛwia bɛnii mbla nte-mii?”

³³ Amu na bédie kenye banini, “Ati, bɔɔyɔ́ ka aya na butaanu.”

³⁴ Amu na Yesu ɔ́nu-ma kɔnyana na útuku bana anumi. Na kɔnakunwi ni, bákana na baanu, na básiaku-nwu kama.