Mateo 10 - Katɔti Ɔku Kedee

Yesu Úte Nwuna Batalane Leevu-inyɔ Bammɔ Ɔyikun

¹ Yesu ɔ́lɔ nwuna batɛyane leevu-inyɔ bammɔ ɔ́sala na úte-ma ɔyikun kalɛ na bagya ayu ekpidi balɛku bekyuli lɛlɔ na babwi lɛlɛ lidu lidu lɛnɔ.

² Batalane bammɔ anyi ndi amɛni. Simon ɔni basɔ baalɔ Petro ku ɔnwani Andrea ku Yakobo ku ɔnwani Yohane bani ndi Sebedeo bebi

³ ku Ƒilipo ku Bartolomeo ku Toma ku kuyi ɔƒɔne Mateo ku Yakobo ɔni ndi Alƒeo ubidi ku Tadeo

⁴ ku Simon ɔni nási Kana ku Yuda Iskariot ɔni ndubo Yesu kakya bɔkya.

Bisie Na Bitákɔ Lɛsa

⁵ Yesu ɔ́tala banana leevu-inyɔ bamɛni na úbo-ma ɔda ɔnini, “Bitesie bekyuli bani naaadi Yudaƒuɔ kalɔ lɛlɔ. Na bitesie Samariaƒuɔ ɔma ɔdi lɛnɔ kemmo.

⁶ Mmomu bisie Israelƒuɔ bani nse aani baƒonu bani náyii ulu mmɔ kudɔ.

⁷ Bisie na bitákɔ lɛsa bɛnii, ‘Uwi ɔni na Katɔti ɔdi lɛga na bula kɔyi kemmo úude.’

⁸ Bɛbwi balɛne na bɛgyila bekpine. Bɛbwi bani muuƒi ɔlɛgyie, na bɛgya ayu ekpidi. Bíteye ɔyikun ɔmɛni na mina kudɔ, anwuɔsu amii lɛnɔ biteti bitadi kuye.

⁹ Biteti egulabi adi biala bitada.

¹⁰ Na ɔdi biala uteti koƒo utada aani ala bevelene kalɛ. Biteti awu iye lɛgbanvuo lɛbambadi lɛdi iye ugyii ɔdadi. Kabla ɔblane biala ni, nwuna kabla kemmo na ɔdubɔdi.

¹¹ “Si biduo ɔma iye lɛkpaklɔ lɛdi kemmo ni, bɛwia ukyuli ɔbuni ɔni mɔɔyɔ́ ka ɔƒɔ-mii. Na biduo-nwu kudɔ na bɛkya mmɔ utédu uwi ɔni na bɛdubɔtɔlɔ.

¹² Na si biduo kaduli kadi kemmo ni, bigyele-ma bɛnii, ‘Keyi kayɔku-mii.’

¹³ Si báƒɔ-mii ku kaƒɔ ƒaa ni, keyi buɛɛ kegye kammɔ kadubɔƒɔ kaduli kammɔ ƒui. Na si bátaƒɔ-mii ni, keyi buɛɛ kegye kammɔ kaaadubo bulieku-ma.

¹⁴ Na si ama iye ɔma ɔmmɔ bekyuli bátaƒɔ-mii iye béni bina litemi ni, bɛtɔlɔ na biveli bina lɛgba kalɔ ɔtumu biwi-ma.

¹⁵ Mɔɔsu-mii geen ka limeyi lɛni na Katɔti ɔdubɔtɛku bayawine litemi ni, ɔdubɔnu lɛma likpidi aani Sodom ku Gomora kɔnyana utulo ɔma ɔmmɔ.

Bekyuli Badi Badubukpoku-mii

¹⁶ “Bɛnu! Mɔɔtala-mii aani baƒonu lɛkya begiti akɔ. Binye kagyumana aani balakpi kalɛ, nsu bɛda lɛlɔ aani babloduma.

¹⁷ Bɛsia lɛlɔ anu, ɔsika bekyuli badubudie-mii bete na beƒie-mii besienku litemi katɛkɔ. Na badubo-mii bubo lɛnɔ na Yudaƒuɔ kɔsakɔ.

¹⁸ Na ka bɛdi mina batɛyane ɔsu ni, badubɔtɛku-mii litemi na kalɔ kammɔ lɛlɔ badine ku baga anumi. Na bɛsu ama bani naaadi Yudaƒuɔ litemi buni lɛmmɔ.

¹⁹ Si béti-mii bésienku litemi katɛkɔ ni, biteti kasusu na lɛla lɛni bɛdubɔsu lɛlɔ.

²⁰ Ɔsika Katɔti ndubute-mii etemila ani na bɛdubɔsu. Katɔti Kɔyu kɔdubɔtɛmi kɔsiaku-mii lɛlɔ.

²¹ “Na uwi ɔmmɔ kemmo ni, bekyuli badi badubuti bana banwa alati bete na badu na ami ɔsu. Na bebi bati badi lɛnɔ badubɔbla lɛni na bana bebi lɛlɔ. Bebi badubɔta benye bana bawɔne lɛlɔ na bakya-ma kakya kalɛ na badu-ma.

²² Ukyuli biala ɔdubukisi-mii na ami ɔsu. Nsu si bínye bina bɔƒɔtaadi kemmo kpakplaa bitédu kawɔlɔkɔ ni, Katɔti ɔdubɔƒɔ-mii ngba.

²³ Si beekpóku-mii na ɔma unwi kemmo ni, bikeli bisie ɔbambadi kemmo. Na mɔɔsu-mii geen ka bilawɔlɔ bina kabla na Israel lɛma ƒui kemmo asa na ami, Ukyuli Ɔyawine Ubi, masɔ mebo.

²⁴ “Ɔtinane ɔ́ƒɔ lɛnyi útulo nwuna ɔtɛyane. Na ukyuli ɔni mɔɔdi ukyuli lɛlɔ lɛnɔ ni, útulo ukyuli ɔni lɛlɔ na ɔɔdi.

²⁵ Anwuɔsu ni, ɔtɛyane biala ɔbla kalɛ na ɔlɛ nwuna ala ɔtinane. Na ukyuli ɔni na baadi lɛlɔ lɛnɔ ni, ɔbla kalɛ na ɔlɛ nwuna Unwoti. Na si bekyuli beedumi ɔtɔlati ɔdi banii ayu ekpidi ɔtɔnkune na ɔdi ni, na badubɔlɔ kaduli kammɔ bekyuli ƒui anyikpi betulo ɔtɔlati ɔmmɔ.

Bitayia Bekyuli

²⁶ “Anwuɔsu bitayia bekyuli, ɔsika lɛla lɛni na béti ala bébi iye bábla bábɛ ni, Katɔti ɔdubudie-ni keyi.

²⁷ Na ala ani ƒui na bínu bɛ́siku ami ɔlati kudɔ ni, bidie-nya keyi. Na lɛla biala na lɛ́su-mii kabɛsɛ ni, bɛkɔ-nya lɛsa.

²⁸ Bitayia bekyuli bani na ɔlɔna kani na badubɔkana bɔdu na balakana ukyuli kɔyu aku bɔdu. Mmomu bɛyia Katɔti ɔni ndubɔkana na ɔdu ukyuli kɔyu ku ɔlɔna na lɛgyavonku kemmo.

²⁹ Baasɛ wɛlɛ wɛlɛ bani na akana eye bana inyɔ ku kaplɛ unwi muedi ni, ɔdi ulekpi na Katɔti kama.

³⁰ Na amii bina lili linwini muedi ni, Katɔti ɔgyi nwuna bumomo ƒui.

³¹ Anwuɔsu bitayia, ɔsika bɛ́ƒɔ kuye bítulo baasɛ pii.

Bidie Yesu Kenye Na Kadi Anumi

³² “Si ukyuli ɔdi udie lɛlɔ kenye na kadi anumi ka ɔdi mina ɔdi ni, ami lɛnɔ ndubudie-nwu kenye na mina Ɔti anumi na katɔ.

³³ Nsu si ukyuli ɔdi úni-mi na kadi anumi ni, ami lɛnɔ ndubuni-nwu na mina Ɔti anumi.

Bekyuli Badubule Lɛlɔ

³⁴ “Bitakali bɛnii mina bubo búti keyi kayɔdi búboku kayawi. Oowo! Bekyuli badubɔdɔ na ami ɔsu!

³⁵ “Bebi bananabi badubɔta benye bana bati lɛlɔ. Na bebi belekubi badubɔta benye bana beni lɛlɔ. Na bebi bele badubɔta benye bana begyieni lɛlɔ.

³⁶ Na ukyuli ukisine geen ni, ɔdubɔsi anwu ɔlati nwuna kaduli kemmo.

³⁷ “Na ukyuli biala ɔni mayɔ ɔti iye uni metulo-mi ni, útamanku ka ɔbla mina ɔtɛyane. Lɛni kani na ukyuli ɔni mayɔ ubidi ɔnanabi iye ulekubi metulo-mi lɛnɔ ni, útamanku ka ɔbla mina ɔtɛyane.

³⁸ Ukyuli biala na ulayɔ ka ɔsiaku-mi kama na ubo abi aani ami kalɛ ni, útamanku ka ɔbla mina ɔtɛyane.

³⁹ Na ukyuli biala ɔni mɔɔwia ka ulie ngba ute nwuna lɛlɔ ni, ɔdubɔyila-mu. Na ukyuli ɔni nányonu nwuna ngba na ɔsiaku-mi kama ni, ɔdubɔkɛ ngba geen.

Katɔti Ɔdubɔƒɔ Kayu Ute Bekyuli Bani Mɔɔƒɔ́ Yesu Basiakune

⁴⁰ “Ukyuli biala ɔni maƒɔ-mii ni, ɔ́ƒɔ ami lɛnɔ. Na ukyuli biala maƒɔ-mi ni, ɔ́ƒɔ Katɔti ɔni nátala-mi lɛnɔ.

⁴¹ Ukyuli biala ɔni maƒɔ Katɔti kenye udiene ka ɔdi kenye udiene ute Katɔti ɔsu ni, anwu ku kenye udiene ɔmmɔ badubɔkɛ lɛyuƒɔla linwi na Katɔti kudɔ. Na ukyuli ɔni maƒɔ ukyuli ɔni nse siin ka use siin ɔsu ni, anwu ku ukyuli ɔmmɔ badubɔkɛ lɛyuƒɔla linwi na Katɔti kudɔ.

⁴² Binu ɔmɛni kaduɛ ka ukyuli biala meti ntu ɔɔƒɛɛ mete mina basiakune bamɛni akɔ ubliidi ƒui ka ɔsiaku-mi ɔsu ni, nwuna lɛyuƒɔla lilabɔ-nwu.”