Marko 5 - Katɔti Ɔku Kedee

Yesu Ɔ́bɔku Kɔyu Kukpidi Ɔ́lɛku Ɔnana Ɔdi Lɛlɔ Kemmo

¹ Ɔmɛni kama ni, Yesu ku nwuna batɛyane bammɔ bétéduo Galilea Ɛpu ɔvi ɔni ngye na Geraseƒuɔ kalɔ lɛlɔ.

² Amu ka Yesu ɔ́nya ɔ́lɛ ɔkɔlɔ kemmo ni, ukyuli ɔdi na kɔyu kukpidi kɔsiaku-nwu ni, úbasiaku-ma.

³ Ɔnana ɔmɛni ɔ́si bekyuli kavakɔ kadi nde mmɔ, ɔsika mmɔ na uli.

⁴ Uwi ɔni návi ni, bekyuli ƒui balákana-nwu lɛkpu bubo. Uwi pii ni, baakana na benyimi-nwu enu ku lɛgba. Nsu uukúlo kɔgba kɔni bébo-nwu mmɔ. Ukyuli ɔmɛni ubo ɔkplu geen ɔni na ukyuli biala ulákana-nwu bɔda.

⁵ Usien ku ɔƒɛ ƒui na ɔkɛ ɔɔví bekyuli kavakɔ mmɔ ku abi lɛlɔ, na ɔkɛ ɔɔva taavi na ɔda atabi uukúlo lɛlɔ.

⁶ Ukyuli ɔmɛni unye ɔgyu asa na ɔ́nu Yesu. Anwuɔsu úkeli úbalɛ akɔnkɔ na Yesu anumi.

⁷ Na ɔ́va momoomo ɔ́su ɔnini, “Yesu, katɔ ku kalɔ Ɔyikune Ƒui Ubi! Buvele, su-mi se ka aláni-mi kɔtu!”

⁸ Ɔ́su lɛni ɔsika únu ka Yesu ɔɔsu ɔnini, “Kɔyu kukpidi, vi lɛ ɔnana ɔmɛni kemmo!”

⁹ Amu na Yesu úye-nwu ɔnii, “Dɛ baalɔ-ɔ?” Mmɔ na kɔyu kɔmɛni kɔ́su kɔnini, “Ami baalɔ Lisu, ɔsika abu bani nkya ɔnana ɔmɛni kemmo ni, bumomo!”

¹⁰ Na kɔyu kɔmmɔ kɔ́sia kama kúvele Yesu ka utabɔku ayu amɛni utalɛku kalɔ kammɔ kemmo.

¹¹ Uwi ɔmmɔ kemmo ni, baplakuo pii badi benye baadi na kataku kadi lɛlɔ.

¹² Amu na ayu amɛni évele Yesu anii, “Bɔku-bu tákya baplakuo bani nnye ngye akɔ na butéduo-ma kemmo.”

¹³ Amu na úte-ma kuƒi, na ayu amɛni álɛ ɔnana ɔmɛni lɛlɔ kemmo na étéduo baplakuo bammɔ lɛlɔ kemmo. Amu na baplakuo bamɛni ƒui, bani mabla aani mpim inyɔ békeli báyu kataku kammɔ lɛlɔ, na bétéduo ɛpu kemmo na bana ƒui békpi.

¹⁴ Amu na bekyuli bani mɔɔnu-ma lɛlɔ mmɔ békeli bésie ɔma kemmo ku amadɔ mmɔ, na bátásu bekyuli ƒui lɛla lɛni nébo.

¹⁵ Bekyuli békeli bésie mmɔ banii batánu lɛla lɛni nébo. Na ka bésie Yesu kudɔ ni, bánu ukyuli ɔni na nka ayu ekpidi pii akya-nwu lɛlɔ kemmo mmɔ. Na ulie kalɔ, na ubi kɔdi lɛlɔ, na nwuna kasusu kese nwaa. Na liƒu lɛda bana ƒui!

¹⁶ Bekyuli bani nánu-nwu kudeedi ni, básu lɛla lɛni nálɛ ƒui na ɔnana ɔmmɔ ku baplakuo bammɔ lɛlɔ.

¹⁷ Anwuɔsu bévele Yesu banii ɔtɔlɔ na bana kalɔ lɛlɔ.

¹⁸ Ka Yesu utéduo ɔkɔlɔ kemmo ni, ɔnana ɔni na nka ayu ekpidi akya-nwu lɛlɔ kemmo mɛni úvele-nwu ɔnini, “Ya-mi libo buteesie!”

¹⁹ Nsu Yesu útatuna. Mmomu ɔ́su-nwu ɔnini, “Sɔ teesie ƒula lɛlɔ bekyuli kudɔ na atásu-ma kalɛ na Unwoti úbunku-ɔ ku kalɛ na ɔ́nu-ɔ kɔnyana.”

²⁰ Anwuɔsu ɔnana ɔmɛni ɔ́tɔlɔ na útávi lɛma leevu kemmo, na ɔ́su bekyuli bammɔ lɛla lɛni ƒui na Yesu ɔ́bla úte-nwu. Na ɔ́bla bani nénu ƒui kalɛ kadi.

Yesu Ɔ́bwi Yairo Ubidi Ulekubi Ku Uleku Ɔlɛne Ɔdi

²¹ Yesu ɔ́sɔ únwini úse ɛpu ɔmmɔ ɔvi ɔni ngye. Ka údu ketudɔ mmɔ ni, bekyuli pii badi bábaka bámana-nwu.

²² Na ukyuli ɔni baalɔ Yairo na ɔkya ɔma ɔmmɔ kasalakɔ batɔnkune akɔ ni, úbo mmɔ. Ka ɔ́nu Yesu ni, úboku lɛlɔ kalɔ.

²³ Na úvele-nwu kpakplaa ɔnini, “Buvele nda-a! Mina ubi ulekubi blii ɔdi uuƒi geen. Anwuɔsu bo na ebeti ƒula enu asia-nwu lɛlɔ kalɛ na wakɛ ɔlɔkplu na welie ngba.”

²⁴ Amu na Yesu ɔ́ta na ɔsiaku-nwu. Bekyuli bani nsiaku Yesu bemomo ɔsu ni, báka-nwu bakya ntɛ uwi ɔni na úsela.

²⁵ Na uleku ɔdi ɔkya-ma akɔ ɔni na ubugya uuwi-nwu lɛlɔ akwa leevu-anyɔ sɔɔn, ina ka bevone baabla-nwu evo.

²⁶ Úubile nwuna egulabi ƒui na ɔlɛ ɔmɛni bɔbwi ɔsu, nsu ɔlɛ ɔmmɔ ulába-nwu. Mmomu katɔ kani na ɔɔkɔ́.

²⁷ Únu Yesu lɛlɔ litemi, anwuɔsu úbasiaku bekyuli bani nkpɛ Yesu kama.

²⁸ Na ɔɔsu nwuna lɛlɔ ka, “Si bɔ́kana makana-nwu awu butuku ni, nka lɛlɔ lɛdubɔba-mi.”

²⁹ Amu ka útuku Yesu awu ni, nwuna ubugya buwi bɔmmɔ kenye kékulo kɔnakunwi! Na ɔ́ƒɔ ɔ́di na nwuna lɛlɔ kemmo ka nwuna ɔlɛ ɔ́ba-nwu na ɔ́lɛ nwuna lɛbibo kemmo.

³⁰ Kɔnakunwi ni, Yesu ɔ́ti ka ɔyikun ɔdi ɔ́lɛ-nwu lɛlɔ kemmo. Anwuɔsu ɔ́tu únwini na úye bekyuli bani nsiaku-nwu ɔnii, “Ɔma nétuku mina awu?”

³¹ Nwuna batɛyane básu-nwu banini, “Aanu kalɛ na bekyuli bamɛni báka bámana-bu. Bi ɔsu na eeye anii ɔma nétuku-ɔ?”

³² Nsu Yesu ɔ́mu unye ɔɔtɛ anu ɔnu si wanu ukyuli ɔni nétuku-nwu.

³³ Uleku ɔmmɔ ɔ́nu ɔ́ti lɛla lɛni nábla-nwu. Anwuɔsu na liƒu ku lɛlɔ bɔtɔ kemmo ni, úbalɛ akɔnkɔ na Yesu lɛgba akɔ. Na ɔ́su-nwu lɛla lɛni nébo nwaa.

³⁴ Yesu ɔ́su-nwu ɔnini, “Mina ubi ulekubi, ƒula bɔƒɔtaadi bɔ́bwi-ɔ. Teesie ku keyi buɛɛ. Na ƒula lɛbibo lɛmmɔ lɛsɔ lilebo-ɔ lɛlɔ.”

³⁵ Uwi ɔni na Yesu ɔɔsu ɔmɛni ni, batu badi bási Yairo kesii bébo bábasu-nwu banini, “Ƒ'ubidi úukpi. Bi ɔsu na ásɔ aakya ala ɔtinane ɔmɛni bɔnɔ lɛnɔ?”

³⁶ Yesu útakpete litemi lɛni na básu mmɔ. Mmomu ɔ́su Yairo ɔnini, “Tayia, awɔ ƒɔ di kani!”

³⁷ Amu na Yesu útiku Petro ku Yakobo ku ɔnwani Yohane lɛti pɛ na bátɔlɔ bésie mmɔ.

³⁸ Na ka bédu Yairo kaduli na Yesu ɔ́nu kalɛ na benye baabla lɛlɔ ku keku kani na benye beewulo ni,

³⁹ úduo úsie-ma kudɔ na úye-ma ɔnini, “Bi néboku lɛsɛ lɛmɛni? Bi ɔsu na biiwulo? Ɔnamu ɔmɛni útekpi. Bɔlɛɛ na ɔda!”

⁴⁰ Ka ɔ́su lɛni ni, bekyuli bani nnye mmɔ bakya baamá-nwu. Anwuɔsu Yesu ɔ́ya bana ƒui bávi bálɛ, na ɔ́ya na ubi ɔti ku uni ku nwuna batɛyane ɛtɛ bammɔ béduo bésie kesii kani na ɔnamu ɔmmɔ ɔtɛ.

⁴¹ Yesu úƒie-nwu kɔnu ɔ́da na ɔ́su-nwu ɔnini, “Talita Koumu.” Na nwuna kalɔ na lɛdi lɛmmɔ kemmo ndi ɔnii, “Ulekubi blii, mɔɔsu-ɔ nnii ta nye!”

⁴² Kɔnakunwi ulekubi ɔni náaƒɔ akwa leevu-anyɔ mɛni ɔ́ta únye na ɔkɛ uusié taavi. Ka lɛla lɛmɛni líbo lɛni ni, ɔ́bla bana ƒui yaa!

⁴³ Nsu Yesu úbo-ma ɔda kpakplaa ka batasu ukyuli ɔdi biala. Na ɔ́sɔ ɔ́su-ma ɔnini, “Bite-nwu lɛla lɛdi na ɔdi.”