Marko 13 - Katɔti Ɔku Kedee

Yesu Ɔ́tɛmi Na Yerusalem Kakpakɔ Bɔbwɛ Lɛlɔ

¹ Ka Yesu ɔ́si ɔɔlɛ́ Yudaƒuɔ kakpakɔ mmɔ ni, nwuna batɛyane akɔ unwi ɔ́su-nwu ɔnini, “Ala ɔtinane, nu atabi abuni ani béti bátu lɛtɔ libendi lɛmɛni ku kalɛ na bátu-ni! Ɔɔdia bɔnu!”

² Yesu ɔ́su-nwu ɔnini, “Nu lɛtɔ libendi lɛmɛni kaduɛ, ɔsika atabi ani béti bátu-ni kemmo linwi pɛ lilébu lilasia lɛdi lɛlɔ! Lɛtɔ lɛmɛni ƒui lɛdubɔƒɛ na atabi ammɔ ƒui adubugyingya ewi kalɔ.”

Yesu Ɔ́su Nwuna Basiakune Ka Badubɔsiaku Lɛbibo Ku Bukpoku

³ Yesu úsie ulie kɔbi kɔni lɛlɔ na nnɔ egyii akya mmɔ lɛlɔ. Na mmɔ ni, ɔɔnu kakpakɔ ɔtɔ ɔvi ɔni ngye. Amu na Petro ku Yakobo ku Yohane ku Andrea lɛti bébo-nwu kudɔ na béye-nwu banini,

⁴ “Blɔti, uwi ɔmani na lɛtɔ lɛmmɔ lɛdubɔƒɛ? Su-bu lɛla lɛni mebo asa na bɔdubɔnu bɔti ka uwi ɔmmɔ údu ka ala amɛni alɛ.”

⁵ Amu na Yesu ɔ́su-ma ɔnini, “Binye kagyumana, na bitaya na ukyuli ɔdi ɔtɔlɔ-mii.

⁶ Bekyuli pii badubuti lɛlɔ bakɔku-mi na basu-mii banini, ‘Ami mɛni,’ na batɔlɔ bekyuli pii.

⁷ Na utabla-mii kalɛ kadi si biinú kekpo kɔku na bina kudɔ iye na ɔgyu kakaaka. Ɔlɛka ala amɛni udu ebo. Nsu ulátina ka kayawi kawɔlɔkɔ nédu.

⁸ Kalɔ kadubukpoku kalɔ bamba. Na lɛga kadikɔ kadubukpoku lɛga kadikɔ. Kalɔ kadubɔkunku kesii biala, na kɔka kɔdububo. Ala amɛni ese aani kawɔƒɔ bɔdu kalɔ kesekɔ.

⁹ “Ɔlɛka amii alati binye kagyumana. Badubuƒie-mii na beti-mii besienku litemi katɛkɔ. Badububo-mii na kasalakɔ. Na ami ɔsu ni, bɛdubunye baga ku lɛlɔ badine anumi, na bɛdubɔsu-ma Katɔti litemi buni lɛmɛni.

¹⁰ Nsu asa na kawɔlɔkɔ kadububo ni, ɔlɛka basu kadi ƒui Katɔti litemi buni lɛmɛni.

¹¹ Na si uwi ɔni na béƒie-mii na béti-mii bésienku litemi katɛkɔ ni, biteti kasusu bitasiku lɛla lɛni na bɛdubɔsu lɛlɔ. Si uwi ɔmmɔ údu ni, na bɛsu litemi biala lɛni na Katɔti Kɔyu kɔdubute-mii. Ɔsika ɔɔɔdi amii alati kasusu kemmo litemi na bɛdubutemi. Mmomu Katɔti Kɔyu kɔdubɔya na bitemi ku nwuna kasusu.

¹² “Bekyuli badubuti ama alati banwani bete banii badu. Na bebi bati lɛnɔ badubɔbla bana bebi lɛni kani. Bebi badubɔta benye bana bawɔne lɛlɔ na bakya-ma kakya kalɛ na badu-ma.

¹³ Ukyuli biala ɔdubukisi-mii, ɔsika bɛɛyɔ́-mi. Nsu ukyuli biala ɔni ndubunye kpakplaa na nwuna bɔƒɔtaadi kemmo wetédu nwuna ngba bulie kawɔlɔkɔ ni, Katɔti ɔdubɔda-nwu udie kɔtu bɔni bɔni nse nte ekpidi bablane ƒui kemmo.

Lɛbibo Lɛdubo Uwi Ɔmmɔ Kemmo

¹⁴ “Na mɛni ni, bise atu kaduɛ na binu kalɔ. Si bɛ́nu ala ani udu na Katɔti ukisi ka álɛ na nwuna kakpakɔ kedee ni, bekyuli bani nkya Yuda bekeli besie batábɛ na abi lɛlɔ.

¹⁵ Ukyuli ɔni nnye nwuna ɔtɔ lili iye lɛsa lili ni, ɔsɔ uteti kasusu ɔnii ɔɔyu ubo kalɔ ubeti lɛla lɛdi ɔsiku nwuna ɔtɔ kemmo ɔnii uuti ɔda.

¹⁶ Ukyuli ɔni nkya kemmo ɔsɔ utasi utebo kaduli ɔnii ubeti nwuna awu.

¹⁷ Uwi ɔmmɔ ɔdubo ɔkplu bɔyu bute beleku bani nda kaƒɔ ku bani muute bebi lɛnyi.

¹⁸ Bivele Katɔti na uwi ɔmmɔ utebo na kɔyɔ uwi!

¹⁹ Ɔsika lɛbibo lɛni ndubo uwi ɔmmɔ kemmo ni, lɛdubo bubomo butulo lɛdi biala lɛni udu na kayawi kamɛni káanu dii ɔ́si kana kalɔ kesekɔ úti úbedu ɔmwi limeyi. Na lɛbibo lɛmɛni udu lɛdi lɛsɔ lilebo lɛnɔ kudii.

²⁰ Nsu Unwoti ɔ́su úse ka ɔdubɔƒana emeyi ammɔ. Ɔsika si ɔɔɔdi lɛni ni, ukyuli ɔdi biala ulébu. Nsu na nwuna bekyuli bani na ɔ́ƒuna ɔsu ni, ɔdubɔƒana emeyi amɛni.

²¹ “Na si ukyuli ɔdi ɔ́su-ɔ ɔnii, ‘Nu! Aanu Kristo mɛni,’ iye ‘Aanu-nwu ngye’ ni, taƒɔ-nwu tadi!

²² Ɔsika ama bani ndubɔbla lɛlɔ aani Kristo ku Katɔti kenye bediene kedee pii badubudie lɛlɔ keyi. Badubɔbla akɔla ku ayiala pii kalɛ na si bakana ni, na batɔlɔ Katɔti bekyuli bani na ɔ́ƒuna lɛnɔ.

²³ Anwuɔsu binye kagyumana! Lɛ́su-mii lɛla biala líse asa na uwi ɔmmɔ wedu.

Ukyuli Ɔyawine Ubi Ɔmmɔ Ɔsɔ Ɔdububo

²⁴ “Na emeyi ani ndububo na lɛbibo lɛmɛni kama ni, “ ‘ɔƒɛ ulekeye kaduɛ, na kɔbuli lɛnɔ kulekeye.

²⁵ Ayabi adubɔbla aani si bɔnu na ada taasiku katɔ, na katɔ ala ƒui adubɔkunku.’

²⁶ “Amu na bekyuli badubɔnu ami, ɔni ndi Ukyuli Ɔyawine Ubi, ka ndubɔda lɛlɛ kayaa na kemmo. Na ndububo ku Katɔti ɔyikun ku bukeye bonwu.

²⁷ Na ndubɔtala mina katɔ batu na kayawi lɛƒɛnyi ine lɛmmɔ lɛlɔ na basala mina bekyuli bani na lɛ́ƒuna lise mmɔ básiku kalɔ kawɔlɔkɔ kamɛni utédu kawɔlɔkɔ kani ngye.

Bɛtɛya Ala Bɛsiku Kɔdingyii Lɛlɔ

²⁸ “Binyimo lɛla lɛni na bɛ́tɛya bɛ́siku kɔdingyii lɛlɔ. Si uwi ɔni na bɛ́nu ka kugyii kɔmmɔ kɔdaku evete bɔta ni, na bɛdubɔti ka ketudi kéede.

²⁹ Lɛni kani si uwi ɔni na bɛ́nu ka ala ani na lɛ́su mɛni adaku bɔlɛ ni, na bɛdubɔti ka kawɔlɔkɔ kamɛni kéedu na kéebo kénye bina kegbuta kama geen!

³⁰ Mɔɔsu-mii geen ka ala amɛni ƒui adubɔlɛ asa na bina kadi bekyuli ƒui badubukpi basa.

³¹ Katɔ ku kalɔ ƒui kadubɔvumana bɔdi, nsu mina litemi lilavumana kudii.

³² “Nsu ni, ukyuli biala ɔɔɔgyi limeyi iye lebo lɛni na kawɔlɔkɔ kamɛni kadubudu ina Katɔti batu ku Katɔti Ubidi muedi baaadubo bɔti, ntu Katɔti lɛti pɛ ngyi.

³³ Bɛsia anu na binye kagyumana, ɔsika bɛɛɛgyi limeyi lɛni na uwi ɔmmɔ wedu.

³⁴ Ɔdubuse aani ɔnana ɔni náta ɔ́lɛ ɔma ɔnii úsela ulu ɔdi, na ɔ́da nwuna kabla bablane ɔ́kya kaduli. Úte ɔdi biala nwuna kabla kani na ɔdubo bɔbla. Na nwuna kama ni, ɔ́su ukyuli ɔni nnye nwuna kayakun kenye ɔnii ɔgyumana kayakun kammɔ kaduɛ.

³⁵ “Lɛni kani na ɔlɛka amii lɛnɔ binye kagyumana. Ɔsika bɛɛɛgyi lebo lɛni na bina Unwoti webeduo. Ɔkana na ɔbla useyi uwi, iye usientɛ, iye uwi ɔni na bakɔkɔ béte kenye, iye ɔtanta.

³⁶ Si ɔ́da úbalɛ kɔnakunwi ni, útalɛka ubanu ka bilie bɛɛlɛɛ.

³⁷ Lɛla lɛni mɔɔsu-mii mɛni ni, ani kani ndaku bekyuli ƒui bɔsu. Na ani ndi ka binye kagyumana.”