Luka 1 - Katɔti Ɔku Kedee

¹ Ati Tioƒilo, bekyuli pii bákya ɔkplu na bábla kalɛ na bakana bɔbla na bénweni ala ani ƒui nálɛ na bula akɔ bése.

² Bénweni-nya aani kalɛ na bekyuli bani nánu ala amɛni ɔ́si nyana kalɔ kesekɔ básu-bu na bákɔ-nya lɛsa lɛnɔ.

³ Anwuɔsu ni, Ɔbune Tioƒilo, ka ami líwi lɛlɔ lɛ́tɛya ala amɛni ƒui ɔ́si kalɔ kesekɔ ɔsu ni, lɛ́bla kasusu ka ɔdia ka línweni kalɛ na ala amɛni álɛ nwaa lite-ɔ.

⁴ Mɔɔbla ɔmɛni kalɛ na anu litemi geen lɛmmɔ ati ƒui ɔ́si ala ani na bátina-a lɛlɔ.

Yohane Bɔwɔ Linyese

⁵ Uwi ɔni na Herode ɔɔdi lɛga na Yudea kalɔ lɛlɔ ni, Katɔti ɔkpane ɔdi ɔkya ɔni baalɔ Sakaria. Ɔ́si ɔkpane bɔdi ulu ɔni nkɛ ɔkpane ɔni baalɔ Abia ulu lɛlɔ. Sakaria ɔmɛni ulekudi baalɔ Elisabet na anwu lɛnɔ ɔ́si Katɔti ɔkpane ɔni baalɔ Aaron kaba kemmo.

⁶ Ɔgya ku ule bamɛni bélie ngba bɔbuni na Katɔti anumi. Na bádi nwuna ɔda bubo ƒui lɛlɔ kaduɛ.

⁷ Bekyuli bamɛni beeebo bebi badi, ɔsika Elisabet ɔdi udinkɔ. Na bana inyɔ lɛnɔ báabi lɛlɔ.

⁸ Limeyi lɛdi ni, Sakaria ɔkya Yudaƒuɔ kakpakɔ ɔɔbla nwuna ɔkpane kabla ɔsika nwuna lɛlɔ na údu.

⁹ Ɔsika na bana bakpane ɔdi bɔbla kemmo ni, bátu egulabi bánu na Sakaria ɔmmɔ ɔdi nénwini úwi. Anwuɔsu anwu na báƒuna ka ɔkyula oloƒui ute Katɔti na nwuna lɛkpabi lɛlɔ. Amu na úduo úsie Yudaƒuɔ kakpakɔ mmɔ.

¹⁰ Na uwi ɔni na ɔkya ɔɔkyula oloƒui ɔmmɔ ni, bekyuli bakladi bewi keyi baakpali katɔ.

¹¹ Amu na Katɔti ɔtu ɔdi údie lɛlɔ ɔ́tina-nwu na unye use kesii kani na oloƒui ɔmmɔ ɔɔkywí kɔdianu kakɛ.

¹² Na ɔni na Sakaria ɔ́nu-nwu ni, liƒu lɛ́da-nwu geen.

¹³ Nsu Katɔti ɔtu ɔmmɔ ɔ́su-nwu ɔnini, “Sakaria, tayia! Katɔti únu ƒula bɔkpali, na ƒula ulekudi Elisabet ɔdubɔwɔ ɔnanabi ute-ɔ. Na adubɔsia-nwu lɛnyi anii Yohane.

¹⁴ Si báwɔ-nwu ni, adubɔkɛ kubiti geen. Lɛni kani na bekyuli pii lɛnɔ badubɔkɛ kubiti.

¹⁵ Ɔdubo ukyuli ubendi bɔbla na Katɔti anumi. Útalɛka ɔni ntɛ kpakplaa iye bɔbambadi bɔdi udu lɛnɔ. Na ɔ́si nwuna bɔwɔ uwi ni, Katɔti kɔyu kɔdubɔƒɔ-nwu lɛlɔ kemmo.

¹⁶ Na anwu ndubo Israel bekyuli pii bɔsɔku buboku bana Unwoti Katɔti kudɔ.

¹⁷ Anwu ndubɔka Blɔti bubo na ɔyikun ku kayi buse kemmo aani kalɛ na Katɔti Kenye Udiene Elia úse kalɛ. Na anwu ndubo bebi ku bati bɔsɔku bɔsala. Na ɔdubunwini batuɔkplune kasusu úboku kasusu kedee bɔbla lɛlɔ. Ɔmɛni ndubɔya na Blɔti bekyuli benye kagyumana bete-nwu.”

¹⁸ Amu na Sakaria úye ɔtu ɔmɛni ɔnini, “Bi ndubɔya na lɛƒɔ ɔmɛni lɛdi? Ɔsika lɛ́ɛbla unengu na mina ulekudi lɛnɔ ɔ́ɔbi.”

¹⁹ Amu na ɔtu ɔmɛni údie kenye ɔnini, “Ami ndi Gabriel ɔni muunye Katɔti anumi. Anwu nátala-mi ɔnii mbasu-ɔ kenye kabuni kamɛni.

²⁰ Nsu átaƒɔ-mi kenye kamɛni átadi. Ina ka átaƒɔ-ka átadi ni, kadubo bɔlɛ na uwi ɔni na Katɔti úse-ka úse lɛlɔ. Na ɔmɛni ɔsu adububo limu wetédu limeyi lɛni na kenye kamɛni kébo kéte lɛni sɔsɔ.”

²¹ Uwi ɔni na ala amɛni ƒui aalɛ́ ni, ɔ́bla bekyuli bani nnye bagya Sakaria na keyi mmɔ kalɛ kadi, ɔsika balati lɛla lɛni ɔsu na uutu uwi na Yudaƒuɔ kakpakɔ mmɔ lɛni.

²² Ka ɔ́lɛ úbo ni, ɔsɔ ulákana-ma butemiku. Anwuɔsu bánu báti ka ɔ́nu budie bɔtina bɔdi na Yudaƒuɔ kakpakɔ mmɔ. Na ka ulákana butemi ɔsu ni, enu kani na uudie taatɛmiku-ma ala.

²³ Na uwi ɔni na nwuna lɛkpa kabla kása na Yudaƒuɔ kakpakɔ mmɔ ni, Sakaria ɔ́tɔlɔ úsie kaduli.

²⁴ Na ɔmɛni kama ni, Elisabet úbada kaƒɔ ɔni na ɔsɔ ulalɛ. Na ɔ́bɛla lɛlɔ abuli alɔ sɔɔn.

²⁵ Amu na Elisabet ɔ́su ɔnini, “Ɔƒɛni ni, Katɔti ɔ́bla ɔmɛni úte-mi, na ɔ́tala mina kɔƒa na kadi anumi.”

Yesu Bɔwɔ Linyese

²⁶ Na Elisabet kaƒɔ bɔda kɔbuli kɔkundi kemmo ni, Katɔti ɔ́tala nwuna ɔtu Gabriel ɔnii usie ɔma ɔni baalɔ Nasaret na Galilea kalɔ lɛlɔ.

²⁷ Ɔtu ɔmɛni úti kenye úsienku ulekubi ɔni na bévele béte ɔnana ɔni baalɔ banii Yoseƒ na ɔ́si Ɔga Dawid kaba kemmo. Ulekubi ɔmmɔ lɛnyi ndi Maria.

²⁸ Ɔtu ɔmmɔ úbo Maria kudɔ na ɔ́su-nwu ɔnini, “Mɔɔkɔ́-ɔ lɛlɔ buɛɛ! Blɔti ɔsiaku-ɔ na úte-ɔ kusɛ kusɛ.”

²⁹ Ɔtu ɔmɛni kenye kani na ɔ́su ɔ́ya na Maria kasusu kéƒu, ɔsika útenu kenye kammɔ kalɔ.

³⁰ Amu na ɔtu ɔmmɔ ɔ́su-nwu ɔnini, “Maria, tayia. Ƒula lɛlɔ lɛ́da Katɔti kubiti geen.

³¹ Adubo kaƒɔ bɔda na awɔ ɔnanabi, na adubɔsia-nwu lɛnyi anii Yesu.

³² Ɔdubo lɛnyi bɔƒɔ geen na badubɔlɔ-nwu banii Katɔti ɔni ndi Ɔyikune Ƒui ɔlati Ubidi. Na Unwoti Katɔti ɔdubɔya na ubi ɔmmɔ ɔdi lɛga aani nwuna Nana Dawid kalɛ.

³³ Na ɔdubo lɛga bɔdi na Yakob kaba kemmo uwi ƒui. Na nwuna lɛga kadikɔ kalása kudii.”

³⁴ Amu na Maria úye-nwu ɔnini, “Dɛ na ɔmɛni webo wete lɛni ka adagyaa na ndi?”

³⁵ Mmɔ na ɔtu ɔmmɔ údie kenye ɔnini, “Ɔyikune Ƒui ɔmmɔ Kɔyu kɔdubo-ɔ lɛlɔ na nwuna ɔyikun ɔƒɔ-ɔ lɛlɔ kemmo. Anwuɔsu ubi kedee ɔni na adubo bɔwɔ ni, badubɔlɔ-nwu banii Katɔti Ubidi.

³⁶ Ɔƒɛni mɔɔyá-a na ati ka ni, ƒula ɔtɔ kemmo uleku ɔni ndi Elisabet na baalɔ-nwu udinkɔ ni, ɔ́ɔda kaƒɔ ina ka nwuna akwa éesie lɛtɔtɔ geen. Na nwuna kɔbuli kɔkundi kemmo na ɔkya mɛni.

³⁷ Ɔsika lɛla lɛdi liiibo Katɔti ɔkplu.”

³⁸ Amu na Maria ɔ́su-nwu ɔnini, “Nu, Blɔti kabla ɔblane na ndi. Ɔbla ute-mi aani kalɛ na ásu.” Amu na Katɔti ɔtu ɔmmɔ ɔ́tɔlɔ.

Maria Úsie Elisabet Kudɔ

^39-40 Uwi ɔmmɔ kemmo kani na Maria úmi ɔ́ta na ɔ́babla úsie Sakaria kesii na abi lɛlɔ na Yudea kalɔ lɛlɔ ɔnii utégyele Elisabet.

⁴¹ Na ka Elisabet únu Maria kegye ni, ubi ɔni nkya-nwu kaƒɔ kemmo úkpo, na Katɔti Kɔyu kɔ́ƒɔ Elisabet lɛlɔ kemmo ƒui.

⁴² Mmɔ na ɔ́su ku lɛdi momoomo ɔnini, “Béte-ɔ kusɛ kusɛ na beleku ƒui akɔ, na béte ƒula kaƒɔ ubi lɛnɔ kusɛ kusɛ!

⁴³ Ɔma na ndi ɔsu na Blɔti uni ɔɔkɔ́-mi lɛlɔ?

⁴⁴ Uwi ɔni kani na ƒula kegye kánya kéduo-mi atu kemmo ni, mmɔ kani na ubi ɔni nkya-mi kaƒɔ kemmo úkpo na lɛlɔyɔ kemmo.

⁴⁵ Na lɛlɔ litaayɔ-ɔ geen, ɔsika áƒɔ ádi ka kenye kani na Katɔti ɔ́su ɔ́siku-ɔ lɛlɔ kadububo kete lɛni.”

Maria Ɔ́tu Linugya Ɔnu

⁴⁶ Amu na Maria ɔ́su ɔnini, “Mina kayi keemwi Blɔti.

⁴⁷ Na lɛlɔ lɛɛyɔ́ mina kɔyu na Katɔti ɔni ndi mina Ɔƒɔne lɛlɔ.

⁴⁸ Ɔsika únyimo ami, nwuna kabla ɔblane ɔni naaadi lɛla lɛdi. Na ɔ́si ɔƒɛni úsela ni, kaba ƒui badubo-mi bɔlɔ banii ukyuli ɔni na lɛlɔ lɛɛyɔ́-mi.

⁴⁹ Ɔsika Ɔyikune Ƒui nábla ala ebendi amɛni úte-mi, na nwuna lɛnyi nse kedee.

⁵⁰ Nwuna kɔnyana bɔnu kuse kute kaba ƒui bekyuli bani mɔɔbu-nwu.

⁵¹ Údie nwuna ɔyikun keyi, na úgyingya bekyuli bani mɔɔtalaku lɛlɔ katɔ.

⁵² Úboku baga benengudi ƒui kalɔ, na ɔ́kɔliku bani néboku lɛlɔ kalɔ katɔ.

⁵³ Ɔ́ya na bekyuli bani na kɔka kɔɔda ƒui bémo ku ala abuni sɔɔn, na balakɛne bénwini ku enukplu.

⁵⁴ Nwuna anumi asia kenye kani na ɔ́su bula bati kuuku úse lɛlɔ, na úbo ɔnii ubebunku Israel kadi bekyuli ƒui.

⁵⁵ Únyimo ka uti kɔnyana bɔnu ute Abraham ku nwuna bawɔ úsela ƒui!”

⁵⁶ Amu na Maria ɔ́sɔ ɔkya Elisabet kudɔ aani abuli atɛ sɔɔn asa na ɔ́sɔ únwini úsie ɔma.

Yohane Ntu Ɔkpilane Bɔwɔ

⁵⁷ Uwi úbedu Elisabet ka ɔwɔ. Na ɔ́wɔ ɔnanabi.

⁵⁸ Na Elisabet liku bekyuli ku banwa ƒui bénu akɔla ebendi ani na Katɔti ɔ́bla úte-nwu. Na bana ƒui bákɛku-nwu ebiti kaduɛ.

⁵⁹ Ka ɔnamu ɔmmɔ ɔ́ƒɔ emeyi maane ni, bébo banii bebekulo-nwu lego na báwia ka basia-nwu ɔti lɛnyi banii Sakaria.

⁶⁰ Nsu uni útatunaku-ma na ɔ́su-ma ɔnini, “Bɛsia-nwu lɛnyi bɛnii Yohane.”

⁶¹ Amu na bákyaku-nwu unyeƒi banii, “Na ka balálɔ ƒula ɔtɔ kemmo ukyuli ɔdi banii Yohane nɔɔ?”

⁶² Amu na bébo ɔti enu béye-nwu bénu lɛnyi lɛni na ɔɔwia ka basia ubidi.

⁶³ Mmɔ na Sakaria ɔ́ƒɔ lɛla lɛni lɛlɔ na beenweni ala taasia na únweni ɔnii, “Nwuna lɛnyi ndi Yohane.” Na ɔ́bla bana ƒui dɛye dɛye.

⁶⁴ Mmɔ kani na Sakaria úse kalɔ ku butemi na uumwi Katɔti.

⁶⁵ Liƒu bonwu lɛdi lɛ́da nwuna liku bekyuli ɔni náya na litemi lɛmɛni lígyingya lɛ́kya lɛma lɛni nkya Yudea abi lɛlɔ ƒui kemmo.

⁶⁶ Bekyuli bani ƒui nénu ala amɛni béti kasusu kadi na béye lɛlɔ banii, “Bi ukyuli udu na ɔnamu ɔmɛni ɔdubo bunwini geen tɔ?” Béye lɛlɔ lɛni ɔsika use nwaa ka Katɔti ɔyikun ɔsiaku-nwu.

Sakaria Údie Katɔti Kenye

⁶⁷ Mmɔ na Katɔti Kɔyu kɔ́ƒɔ ubi ɔmmɔ ɔti Sakaria lɛlɔ kemmo na ɔ́su úse ɔnini,

⁶⁸ “Bɛya na bumwi Blɔti, Israel Unwoti, ɔsika úbo úbebunku nwuna kadi na ɔƒɔ-ma na bakɛ bɔnwuna.

⁶⁹ Úti Ɔƒɔne Ɔyikune ɔdi úte-bu ɔni na ɔdi anwu ɔlati kabla ɔblane Dawid kaba kemmo ubi.

⁷⁰ Úse kenye kamɛni úse kukuuku ɔkɛ nwuna kenye bediene kedee lɛlɔ ka ni,

⁷¹ ɔdubudie-bu ɔlɛku ekpidi bablane ku ama bani na muukisi-bu ƒui enu kemmo.

⁷² Ɔ́su ka ɔdubɔnu bula bati kuuku kɔnyana na wenyimo bunyimi kedee bɔni nkya ama ku-nwu ntɛ.

⁷³ Na ɔ́su bula ɔti Abraham kenye kpakplaa kamɛni úse ka ni,

⁷⁴ ɔdubudie-bu na bula bekisine enu kemmo, na ɔdubɔya na bɔbla-nwu kabla na liƒu lɛsɔ lɛɛɛdubo-bu bɔda.

⁷⁵ Na ɔdubɔbla-bu kedee na buse siin na nwuna anumi na bula ngba emeyi kemmo ƒui.

⁷⁶ Na awɔ, mina ubi ni, badubɔlɔ-ɔ banii Katɔti Ɔni Ntulo Ƒui Kenye Udiene. Awɔ ndubo bɔgyu bɔtɔ na Blɔti lɛtɔtɔ kalɛ na aklibi ulu ese ete nwuna bubo.

⁷⁷ Na aya nwuna bekyuli bati ka badubɔkɛ bɔƒɔ na bana ekpidi buti taakyiɛ ɔsu.

⁷⁸ Bula Katɔti use buɛɛ, na ɔɔnu kɔnyana. Ɔdubɔtala Ɔƒɔne ɔkya-bu ɔni muukeye aani kalɛ na ɔƒɛ ɔɔtu.

⁷⁹ Na ɔya na bukeye bɔmɛni bɔsi katɔ buwi bekyuli bani nli kasuudikɔ na kukpi liƒu lɛɛda-ma kalɛ na ɔkpanku-bu ɔvinku keyi buɛɛ ulu lɛlɔ.”

⁸⁰ Amu na ubi ɔmmɔ ɔ́lɛ lili na nwuna kayi kasia Katɔti lɛlɔ kpakplaa. Na ketele ntɛ kani na úlie úti útédu uwi ɔni na ɔ́da ɔ́lɛ Israel kadi anumi.