Litemi Batɛne 7 - Katɔti Ɔku Kedee

Gideon Úkpo Ɔdi Midianƒuɔ Lɛlɔ

¹ Kadi kégye ɔtanta tutuutu Yerubaal ɔni ndi Gideon ku nwuna bekpone bátábɛ bakya Harod libiɔ kɔmadɔ. Nsu kesii kani na Midianƒuɔ bátábɛ bakya ni, kakya Gideon bekyuli kada kakɛ na kɔwɛ kɔni nde More kɔbi kudɔ.

² Na Unwoti ɔ́su Gideon ɔnini, “Bekyuli bani nésela betékpo Midianƒuɔ bammɔ bemomo bagya. Na kalɛ na Israelƒuɔ balakun lɛmɛne balatina-mi ka bana ɔyikun lɛlɔ na békpo bádi lɛlɔ ɔsu ni,

³ su bekyuli bammɔ ƒui ka, ‘Ukyuli biala na liƒu lɛɛda-nwu ni, unwini na ɔtɔlɔ Gilead kɔbi lɛlɔ mɛni.’ ” Anwuɔsu nkyuli mpim aavlanyɔ-inyɔ bénwini na kasɔ kebu nkyuli mpim leevu.

⁴ Nsu Unwoti ɔ́sɔ ɔ́su Gideon ɔnini, “Bekyuli bammɔ bamu bemomo bagya. Anwuɔsu ti-ma sienku ketu kani nwi mmɔ kemmo na ami ɔlati ndubɔƒuna-ma bute-ɔ na mmɔ. Na si lɛ́su-ɔ ka ukyuli ɔmɛni ɔsiaku-ɔ ni, ɔdubɔsiaku-ɔ. Na si lɛ́su-ɔ ka ukyuli ɔmɛni utasiaku-ɔ ni, ulasiaku-ɔ.”

⁵ Ɔmmɔ ɔsu Gideon úti bekyuli bammɔ úsienku ketu kammɔ kemmo. Na Unwoti ɔ́su Gideon ɔnini, “Die bekyuli bani ƒui néti bana linyemi baaƒɔ́ ntu bɔmmɔ na akɔkɔ kemmo teewi kenye aani kalɛ akpewe ɔɔní ntu se sɛsɛɛ asiku bani ƒui nálɛ akɔnkɔ béti bana inye bébi ntu bɔmmɔ lɛlɔ asa báni ntu kudɔ.”

⁶ Na nkyuli eti aku (300) náƒɔ ntu na akɔkɔ kemmo ku linyemi. Nsu bekyuli bakladi ama ni, akɔnkɔ na bálɛ asa báni ntu.

⁷ Amu na Unwoti ɔ́su Gideon ɔnini, “Nkyuli eti aku (300) bani náni ntu básiku bana akɔkɔ kemmo lɛlɔ na ndubɔsia na liti Midianƒuɔ lɛkya-a enu kemmo. Anwuɔsu ya na bekyuli bakladi ƒui benwini besie bana kɔduli.”

⁸ Ɔmmɔ ɔsu Gideon ɔ́ya na Israelƒuɔ bekyuli bakladi bénwini besie bana nvo kemmo. Nsu ɔ́ya na nkyuli eti aku (300) bammɔ básɔ bákya na ama nda kɔkpɛɛ ku adila ani na bada. Amu na Midianƒuɔ kakyakɔ kakya kɔwɛ kɔni nwi-bana kada kakɛ mmɔ kemmo.

⁹ Usien ɔmmɔ ni, Unwoti údie lɛdi na ɔ́su Gideon ɔnini, “Ta na etékpoku Midianƒuɔ bammɔ na kesii kani na bakya mmɔ. Ɔsika ndubuti-ma lɛ́kya-a enu kemmo.

¹⁰ Nsu si ayia ka etékpoku-ma ni, esie etétiku ƒula kabla ɔblane Pura na bisie bana kakyakɔ mmɔ.

¹¹ Na bise atu na binu ala ani baasu. Mmɔ na bɛdubuse kayi na bɛta bikpoku-ma.” Anwuɔsu Gideon ku nwuna kabla ɔblane Pura báyu besie kesii kani na bana bekisine básala bakya mmɔ.

¹² Midianƒuɔ ku Amalekƒuɔ ku kadi bamba bekyuli bani nási ɔƒɛ katukɔ ƒui bábla kakyakɔ na kɔwɛ kɔmmɔ kemmo na lisu bonwu kemmo aani baalɔlɔ. Na bana bebuo ala betine ku keƒu bemomo geen aani ɛpu kɔnwinimi, na balakana-ma bɔka.

¹³ Na ka Gideon útéduo mmɔ ni, únu ka ukyuli ɔdi ɔkya ɔɔsu nwuna ɔkpana ɔdi kɔna kɔni na úgye. Na ɔ́su ɔnini, “Bodobodo ɔdi uminime úduo bula kakyakɔ, na kalɛ na úbatuaku kevo kammɔ ku ɔyikun ɔsu ni, kevo kammɔ káƒɛ kewi kalɔ.”

¹⁴ Amu na ɔkpana ɔmmɔ ɔ́su-nwu ɔnini, “Ɔɔɔdi lɛla bamba lɛdi na ánu utulo Yoas ubidi Gideon, Israelni ɔmmɔ kewii. Katɔti úti Midianƒuɔ ku abu bani ƒui násala bɔ́bla unwi mɛni ɔ́kya-nwu enu kemmo.”

¹⁵ Amu ka Gideon únu kɔna kɔmmɔ ku kalɛ bédie-nwu kalɔ ni, ɔ́lɛ akɔnkɔ na ɔ́kpali Unwoti. Mmɔ kani na únwini úsie Israelƒuɔ kakyakɔ na ɔ́kpali bekpone bammɔ ɔnini, “Bɛta na bɔgyu! Unwoti úti Midianƒuɔ bammɔ ku bana kevo ɔ́kya-bu enu kemmo.”

¹⁶ Na úle bekpone bammɔ akpa atɛ na úti kɔkpɛɛ ku ebui ani kemmo na likpo lɛkya ute ɔdi biala na ɔda.

¹⁷ Amu na Gideon ɔ́su-ma ɔnini, “Bɛnu-mi, na bɛsiaku-mi kama. Si ndanku kesii kani bekyuli bammɔ básala bakya bɔni bude ni, na bɛbla lɛla biala na bɛdubɔni na lɛ́bla.

¹⁸ Na uwi ɔni na ami ku bekyuli bani nsiaku-mi bɔ́nya bɔ́vwi bula kɔkpɛɛ ni, na amii bani náka bɛ́mana ƒui lɛnɔ bɛvwi bina kɔdi na bidie lɛdi ku kudu momoomo bɛnini, ‘Yiidu ute bula Unwoti ku bula ɔtɔnkune Gideon.’ ”

¹⁹ Gideon ku nwuna nkyuli eti anyɔ báni béde kesii kani na Midianƒuɔ bammɔ básala lɛlɔ mmɔ na uwi ɔni kani na ukyuli ɔni mɔɔgyumana Midianƒuɔ bammɔ bavumana lɛlɔ na usien ntɛ ɔmmɔ. Mmɔ kani na bávwi bana kɔkpɛɛ na bébo bana ebui bábwɛ.

²⁰ Na akpa anyɔ akladi lɛnɔ bábla lɛni kani. Na bana ƒui béti bana likpo ɔni bada mmɔ bákya kɔmiinu kɔnu na bada bana kɔkpɛɛ na kɔdianu na bédie lɛdi momoomo básu banini, “Kewii kenwi kenye kéte Unwoti, na kanyɔdi lɛnɔ kenye kéte Gideon.”

²¹ Ukyuli biala ɔ́ta unye nwuna kenyekɔ na kesii kani bákya mmɔ. Na bekisine bammɔ békeli bésela ku kɔvanu.

²² Uwi ɔni na Gideon bekyuli bakya baavwi bana kɔkpɛɛ ni, Unwoti ɔ́ya na bekisine bammɔ béti bana atula na bakya beekpóku lɛlɔ. Na bekyuli bammɔ ƒui békeli bakɛ Serera bétédu Bet-Sita na bákɛ bétédu Abel-Mehela ɔni nde Tabat.

²³ Na Gideon ɔ́tala bekyuli ɔ́kya Naƒtali ku Aser ku Manase kalɔ lɛlɔ, na bekyuli bási bébo bábasiaku Midianƒuɔ.

²⁴ Amu na Gideon ɔ́tala bekyuli ɔ́kya Eƒraim lɛma lɛni nwi abi eli ka batásu-ma banii bebo na bebekpoku Midianƒuɔ bekpo baƒɔ Yordan Ketu uti utédu Bet-Bara. Anwuɔsu Eƒraim bálɛ na bétékpo báƒɔ Yordan Ketu utédu Bet-Bara.

²⁵ Na béƒie Midianƒuɔ batɔnkune inyɔ bani ndi Oreb ku Seeb. Na bádu Oreb na Oreb Atakpɛ lɛlɔ. Na bádu Seeb na Seeb Ntɛ Kablakɔ. Na bábi basiaku Midianƒuɔ na béti Oreb ku Seeb eli bésienku Gideon na Yordan Ketu kɔtu.