Litemi Batɛne 3 - Katɔti Ɔku Kedee

¹ Anwuɔsu Unwoti ɔ́da kadi bamba lɛma lɛdi úse, kalɛ na uti-ma ɔkɔku Israelƒuɔ bani nétesie kekpo kudii na Kanaan.

² Na Unwoti ɔ́bla ɔmɛni kalɛ na ɔtina Israelƒuɔ bani nétesie tɔ kekpokɔ kudii kalɛ na beekpó.

³ Na bani nébu kɔlɔ kɔmmɔ kemmo ndi Ƒilistiƒuɔ baga ɛlɔ ku Kanaanƒuɔ ku Sidonƒuɔ ku Hewiƒuɔ bani nlie Lebanon abi lɛlɔ úti ɔ́si Baal-Hermon Kɔbi lɛlɔ útédu Lebo Hamat.

⁴ Ama na báda bése Israelƒuɔ na beti-ma bakɔku banu si badubɔdi Unwoti ɔda bubo bɔni úte bana bati kuuku ɔkɛnku Mose lɛlɔ.

⁵ Anwuɔsu Israelƒuɔ bammɔ ku Kanaanƒuɔ ku Hetiƒuɔ ku Amoriƒuɔ ku Perisiƒuɔ ku Hewiƒuɔ ku Yebusiƒuɔ bélie mmɔ básala.

⁶ Na kadi bekyuli bamɛni ku Israelƒuɔ beeti lɛlɔ, na Israelƒuɔ baakpá bana baƒiɔ.

Otniel Nékpo Ɔ́ƒɔ Israelƒuɔ

⁷ Amu na Israelƒuɔ bábla likpidi na Unwoti anumi. Na ɔkɛnku ɔmɛni ɔsu báyiƒala bana Unwoti Katɔti, na bénwini bátákpa Baal ku Asera baƒiɔ.

⁸ Ɔ́si kalɛ na Unwoti úti kɔnyi kati kati ɔ́kya Israelƒuɔ ɔsu ni, Unwoti ɔ́nyonu-ma ɔ́kya Ɔga Kusan Risataim enu kemmo. Na Israelƒuɔ bénwini kabla bablane béte nwuna bekyuli na Naharaim Aram kalɛkɛ lɛlɔ akwa maane.

⁹ Nsu ka Israelƒuɔ béwulo bákpali Unwoti ni, Unwoti úte-ma udiene ɔdi, na anwu ndi Otniel, Kaleb ɔnwani ɔnamudi ubidi Kenas. Na anwu nékpo ɔ́ƒɔ-ma.

¹⁰ Na Unwoti Kɔyu kɔ́ƒɔ Otniel ɔmɛni lɛlɔ kemmo, anwuɔsu úbenwini Israelƒuɔ litemi ɔtɛne, na ɔ́tɔnku-ma na bétekpoku Kusan-Resataim ɔni ndi Aramƒuɔ ɔga. Na Unwoti ɔ́nyonu ɔga ɔmmɔ ɔ́kya Otniel enu kemmo, na ɔ́ya na bádi-nwu lɛlɔ.

¹¹ Anwuɔsu kalɔ kammɔ kákɛ atu bɔyɔ akwa aavlene úti útédu ka Otniel ɔni ndi Kenas ubidi úkpi.

Ehud Lɛlɔ Kɔtɛ

¹² Amu na Israelƒuɔ básɔ bábla likpidi na Unwoti anumi. Na ɔ́si likpidi lɛni bábla mɛni ɔsu ni, Unwoti ɔ́ya na Moab ɔga ɔni baalɔ banii Eglon ɔ́kɛ ɔyikun na Israelƒuɔ lɛlɔ.

¹³ Na Eglon ɔmɛni ɔ́ya na Amoriƒuɔ ku Amalekƒuɔ bébebunku na bétékpoku Israelƒuɔ. Na bádi Israelƒuɔ lɛlɔ na béti bana ɔma unengudi Yeriko ɔni baalɔ banii Ebo Ɔma.

¹⁴ Na Israelƒuɔ bénwini kabla bablane béte Ɔga Eglon ɔni nási Moab akwa leevu-maane sɔɔn.

¹⁵ Amu na Israelƒuɔ básɔ béwulo bákpali Unwoti, na Unwoti ɔ́sɔ úte-ma udiene. Na udiene ɔmmɔ baalɔ banii Ehud. Na Ehud ɔmɛni ɔdi kɔmii ukyuli, na ɔti ndi Gera ɔni nási Benyamin kɔdua kemmo. Na Israelƒuɔ bátala Ehud ɔmɛni ka uti etela adi utéte Ɔga Eglon ɔni nási Moab.

¹⁶ Na Ehud ɔmɛni ɔ́bla kewii kani bádɔ-ka lɛƒɛnyi inyɔ úte lɛlɔ, na kewii kammɔ bune bɔbla aani lɛgba bɔka unwi ku kakɛ. Na úbo kewii kammɔ ɔ́da nwuna kɔdianu kavobi kakɛ, na ɔ́kya awu ɔ́sia-nwu lɛlɔ.

¹⁷ Na úti etela ammɔ úsienku Ɔga Eglon ɔni nébomo geen ku lɛmwi sɔɔn.

¹⁸ Ka Ehud úti etela ammɔ úte ɔga ɔmɛni ɔ́wɔlɔ ni, ɔ́su banana bani nti etela ammɔ ka benwini na beteesie ɔma.

¹⁹ Na kesii kani baƒiɔ badi balɛ na Gilgal kudɔ ni, Ehud ɔ́sɔ únwini kama na útásu Ɔga Eglon ɔnini, “Ati, mbo kenye kabɛdi kadi ka lɛsu-ɔ.” Anwuɔsu ɔga ɔmmɔ úbo ɔda na ɔ́ya na nwuna benengu bani ƒui nlie-nwu kudɔ báta bálɛ.

²⁰ Amu na Ehud ɔ́ni úde-nwu na nwuna lɛsa ɔtɔ eli, na kesii kani na anwu lɛti uulie taaƒɔ ɔƒɛƒɛɛ. Mmɔ na ɔ́su-nwu ɔnini, “Mbo litemi lɛdi lɛ́siku Katɔti kudɔ ka lɛsu-ɔ.” Amu ka ɔga ɔmmɔ ɔ́nya ɔ́ta nwuna liboku lɛlɔ kani na

²¹ Ehud úti nwuna kɔmii na ɔ́ni nwuna kewii kani nƒa nwuna kavobi mmɔ ɔ́kpa na ɔ́tu ɔga ɔmmɔ kaƒɔ.

²² Na kewii kammɔ ƒui kányi kéduo-nwu kaƒɔ kemmo ku ligyuku, na káƒuala kálɛ keyi. Na ɔ́da kewii kammɔ ɔ́kya-nwu ɔlɔna kemmo, na lɛmwi lɛ́kun líbetile kaƒualakɔ kammɔ kenye.

²³ Ɔmmɔ kama Ehud ɔ́vi ɔ́lɛ na ɔ́kalɛ ɔga ɔmmɔ ɔ́kya ɔtɔ kemmo.

²⁴ Uwi ɔni na ɔ́tɔlɔ kama ƒui ni, ɔga ɔmmɔ kabla bablane bébo, na bánu ka bábala ɔtɔ ɔmmɔ bényene. Na básu banini, “Ɔƒɛni kalɛ kuvodɔ na ɔga úsie na katɔma ƒui.”

²⁵ Anwuɔsu bénye bágya-nwu uwi ɔdi ka nka ɔdubɔlɛmi na ɔlɛ, nsu bétenu lɛla lɛdi. Mmɔ na beti ɔlɛmidi na bálɛmi ɔtɔ ɔmmɔ. Na bánu ka ɔga ɔmmɔ úkpi ɔtɛ kalɔ.

²⁶ Na uwi ɔni kemmo na kabla bablane bammɔ benye bagya ɔga mmɔ ni, Ehud úukeli ɔ́tɔlɔ na ɔkɛ baƒiɔ bammɔ kudɔ úsie Seira ɔma.

²⁷ Ɔni na údu Eƒraim abi kalɔ lɛma lɛmmɔ kemmo ni, ɔ́vwi nwuna kakpɛɛ, na Israelƒuɔ bammɔ bálɛ bábasiaku-nwu. Na ɔ́tɔnku-ma na báyu bási abi ammɔ lɛlɔ.

²⁸ Amu na údie lɛdi na úbo-ma ɔda ɔnini, “Bɛsiaku-mi kama, ɔsika Unwoti ɔ́ya na bɛ́di Moabƒuɔ bani ndi bina bekisine lɛlɔ.” Anwuɔsu Israelƒuɔ bammɔ lɛnɔ básiaku-nwu kama na báyu abi na béténye báda Yordan Ketu kesii kani baavia teesie Moab, na bétete kuƒi ka Moabni ɔdi biala ɔvia mmɔ.

²⁹ Na limeyi lɛmmɔ Israelƒuɔ bádu Moabƒuɔ bekpone bani ngyi bukpo geen mpim leevu (10,000), na ɔdi útakana bukeli.

³⁰ Limeyi lɛmmɔ Israelƒuɔ bádi Moabƒuɔ lɛlɔ, na Israelƒuɔ bákɛ atubɔyɔ akwa liti ku avlaatɛ.

Samgar Únwini Litemi Ɔtɛne

³¹ Ɔmmɔ kama Israelƒuɔ básɔ bákɛ litemi ɔtɛne bamba. Na anwu ndi Samgar na ɔti ndi Anat, na anwu lɛnɔ úkpo ɔ́ƒɔ Israelƒuɔ. Na úti ugyii ɔdadi ɔ́du Ƒilistiƒuɔ nkyuli eti leevu-anyɔ (600).