Litemi Batɛne 2 - Katɔti Ɔku Kedee

Katɔti Ɔtu Ɔdi Úsie Bokim

¹ Uwi ɔmmɔ ni, Unwoti ɔtu ɔdi ɔ́si Gilgal úsie Bokim, na ɔ́kɔ lɛsa úte Israelƒuɔ ɔnini, “Lídie-mii lɛ́lɛku Egyipte kalɔ lɛlɔ, na líti-mii lísienku kalɔ kani líse kenye ka meti mete bina bati kuuku lɛlɔ. Na lɛ́su ka lɛɛɛdubo bɔlɛ bunyimi bɔni na línyimiku-mii mmɔ kama.

² Na lɛ́su-mii ka ɔdi biala utenyimi lɛla lɛdi ku bekyuli bani nlie kalɔ kammɔ kemmo. Na bibo bana akpabi ƒui bɛƒɛ biwi kalɔ. Nsu bítadi mina litemi lɛlɔ. Na muuye-mii nnii bi ɔsu bɛ́bla lɛni?

³ Anwuɔsu mɔɔsu-mii nnii lɛɛɛdubo bekyuli bamɛni bɔbɔku bute-mii ɔni na bíti bísela anumi mɛni. Na bekyuli bammɔ badubo bunwini liyu bete-mii na bataatu-mii lɛƒɛnyi. Na bana baƒiɔ badubo bunwini kɔkpagyuɛ kuteedie-mii.”

⁴ Uwi ɔni na Katɔti ɔtu ɔmɛni ɔ́tɛmi úte Israelƒuɔ bamɛni ɔ́wɔlɔ ni, bana ƒui báda lɛdi bedie na béwulo.

⁵ Anwuɔsu na baalɔ mmɔ banii Bokim na nwuna kalɔ ndi Buwulo. Mmɔ na bábla akpala béte Unwoti.

Israelƒuɔ Bábla Atuɔkplu Na Bádi-ma Lɛlɔ

⁶ Amu na Yosua ɔ́ya na bekyuli bammɔ ƒui bégyingya, na ɔdi biala úsie útéti nwuna kadikɔ.

⁷ Na Yosua ngba bulie emeyi kemmo ƒui ni, Israelƒuɔ bábla Unwoti kabla. Na úse lɛni útédu benengu bani nélie na Yosua kama na bánu akɔla budie taatina lidu lidu ani na Unwoti ɔ́bla úte Israelƒuɔ.

⁸ Amu na Unwoti kabla ɔblane Yosua ɔni ndi Nun ubidi úbekpi uwi ɔni na ɔ́ƒɔ akwa eti anyɔ ku leevu (110).

⁹ Na báva-nwu na nwuna kalɔ kemmo na Timnat-Heres kesii kani ndi nwuna kadikɔ kani nédu-nwu na Eƒraim Kɔbi lɛlɔ kesii kani néti késie Gaas Kɔbi ɔƒɛnyi na katɔ kakɛ.

¹⁰ Na uwi ɔdi kama ni, kaba kammɔ bekyuli ƒui békpi na bása bɔtɔlɔ busie bana bati kudɔ. Na kaba kabambadi nási bákɔ ɔni na ama baaagyi Unwoti, na bátanu ala ani lɛnɔ na ɔ́bla úte Israel úbavi.

¹¹ Uwi ɔmmɔ na Israelƒuɔ bábla likpidi na Unwoti anumi, na bésie bakya baakpá Baal baƒiɔ lidu lidu.

¹² Na béni bana Unwoti ɔni ndi bana bati kuuku Katɔti ɔni nédie-ma ɔ́lɛku Egyipte kalɔ lɛlɔ, na bénwini bésie baakpá kadi bamba baƒiɔ lidu lidu lɛni nkya bana amadɔ mmɔ. Na báya na Unwoti ɔ́kɛ kɔnyi geen,

¹³ ɔsika béni Unwoti na bésie baabla kabla teete Baal ku Astarot baƒiɔ.

¹⁴ Na ɔkɛnku kɔnyi kati kati kɔni na Unwoti úti ɔ́kya Israelƒuɔ ɔsu ni, ɔ́nyonu-ma ɔ́kya bana bekisine enu kemmo na bébekpoku-ma na béti bana ala. Na ɔ́ya na bana bekisine bani nkya amadɔ mmɔ ƒui békpo bádi-ma lɛlɔ, na basɔ balakana na babla lɛla lɛdi.

¹⁵ Na uwi biala na Israelƒuɔ báta ka betékpo ni, Unwoti uunye taasiaku-ma aani kalɛ kani na ɔ́su ka wabla-ma. Ɔmɛni ɔsu bákya lɛbibo kemmo geen.

¹⁶ Amu na Unwoti ɔ́ya na litemi batɛne bákɔ bálɛ-ma akɔ, na báƒɔ-ma bálɛku bana bekisine enu kemmo.

¹⁷ Nsu ɔmɛni kama ƒui belenu litemi batɛne bamɛni litemi. Na béti lɛlɔ bénwini bayalɛ, na bakɛ basiaku baƒiɔ lidu kama baakpá-ma. Kaba kamɛni bekyuli ama bávumana ƒui kede kede, na beeese aani bana bati, na baaasiaku bana ɔbladu kama, na bétenu litemi na bataadi Unwoti ɔda bubo lɛlɔ.

¹⁸ Uwi biala na Unwoti ɔ́ya na litemi ɔtɛne ɔdi ɔ́kɔ ɔ́lɛ Israelƒuɔ akɔ ni, uunye litemi ɔtɛne ɔmmɔ kama nwuna ngba kemmo ƒui, na uukpó taaƒɔ-ma taalɛku bana bekisine enu kemmo. Na Unwoti ɔɔnu-ma kɔnyana si beedumo na ɔgbankpi ɔni kemmo na bana bekisine béti-ma bákya ɔsu.

¹⁹ Nsu si litemi ɔtɛne ɔmmɔ ɔ́nya úkpi ni, na bekyuli bammɔ ƒui beenwíni teesie bana ɔbladu ukpidi ɔni ntulo bana bati ɔdi ɔni bátaabla kemmo. Na baasiaku baƒiɔ kama na baakpá-ma na baabla-ma kabla. Na beení ka bedie bana ɔbladu buɛ ku atuɔkplu atu.

²⁰ Anwuɔsu úti kɔnyi geen ɔ́kya Israelƒuɔ na ɔ́su ɔnini, “Ka kaba kamɛni báta bénye-mi lɛlɔ na baládi mina lɛla lɛni na línyimi líte bana bati kuuku lɛlɔ na belenu-mi litemi ɔsu ni,

²¹ nsɔ lɛɛɛdubo kadi bamba bekyuli bani nébu asa-na Yosua úkpi bɔbɔku bute-ma lɛnɔ.

²² Na ndubuti kadi bekyuli bammɔ lɛkɔku Israelƒuɔ lɛnu si badubo bɔvumana kayi na basia ulu ɔni lɛlɔ na bana bati kuuku básia.”

²³ Anwuɔsu Unwoti ɔ́ya na kadi bamba bekyuli bammɔ básɔ bakya kalɔ kammɔ lɛlɔ, na útabɔku-ma kɔnakunwi na ɔnyonu-ma ɔkya Israelƒuɔ enu kemmo aani kalɛ na ɔ́su Yosua úse ka wabla.