Litemi Batɛne 17 - Katɔti Ɔku Kedee

Mika Baƒiɔ Bani Na Ɔ́vɔ Úte Lɛlɔ

¹ Ɔnana ɔdi úlie Eƒraim abi eli na baalɔ-nwu banii Mika.

² Na ɔnana ɔmɛni ɔ́su uni ɔnini, “Sika ɔƒualadi ebi apim ku eti anyɔ lɛlɔ kɔtɛ ani násu ka ukyuli ɔdi úyu-ɔ ni, línu ka ɔkɛnku ɔmɛni ɔsu éwida ukyuli ɔmmɔ. Ami néti sika ɔƒualadi ebi ammɔ, na ese-mi kudɔ.” Amu na uni ɔ́su-nwu ɔnini, “Unwoti ute-ɔ kusɛ kusɛ, mina ubi.”

³ Na Mika úti sika ɔƒualadi ebi amɛni úsienku uni. Na uni ɔ́su-nwu ɔnini, “Kalɛ na ewida amɛni elebo-ɔ lɛlɔ ɔsu ni, ami ɔlati muusé kenye ka ndubuti sika ɔƒualadi ebi amɛni lite-ɔ na eti akpa ete Unwoti. Na eti-nya avɔ kɔlɛmii na anwi ala na eti sika ɔƒualadi ebi ammɔ akwa-nya lɛlɔ.” Ɔmɛni ɔsu úti ala ammɔ ɔ́kya Mika enu kemmo.

⁴ Amu ka Mika úti sika ɔƒualadi ɔmɛni úsienku uni ni, uni úti sika ɔƒualadi ebi eti ene, na úti úte ɔkywɛne ɔdi ka uti ɔvɔ kɔlɛmii ute-nwu. Na ɔkywɛne ɔmmɔ ɔ́bla ala ammɔ úte-nwu, na Mika úti-nya útése nwuna kaduli.

⁵ Mmɔ na Mika ɔmɛni úse baƒiɔ úte lɛlɔ. Ɔmmɔ ɔsu úti ubidi ɔnana unwi na ɔ́ka ɔkpane awu úte-nwu, na úti-nwu úse baƒiɔ bammɔ kenye aani ɔkpane kalɛ.

⁶ Na uwi ɔmmɔ ƒui kemmo ni, na Israelƒuɔ beeebo ɔga ɔdi. Anwuɔsu ukyuli biala ɔɔbla lɛla lɛni mɔɔyɔ́-nwu kaƒɔ.

⁷ Na Lewini okloƒu ɔdi ɔkya ɔni nási Betlehem na Yuda kalɔ lɛlɔ. Na ɔ́si kukuuku úsie ɔkya Yuda kɔdua bekyuli kudɔ.

⁸ Okloƒu ɔmɛni ɔ́tɔlɔ bekyuli bammɔ kudɔ ka utáwia kesii bamba kadi ulie. Ka ɔkɛ ɔɔví ni, útáda ɔ́lɛ Mika kaduli na Eƒraim abi lɛlɔ.

⁹ Na Mika úye-nwu ɔnini, “Wɛ na ási ébo mɛni?” Amu na ɔ́su-nwu ɔnini, “Lewini na ndi, na lɛ́si Betlehem. Na nkɛ mɔɔví taawia kesii kadi na lilie.”

¹⁰ Amu na Mika ɔ́su-nwu ɔnini, “Bo na ebelie-mi kudɔ na ndubuti-ɔ bɔbla mina ɔti ku ɔkpane. Na ndubuteete-ɔ adila ku adala. Na lɛkwa biala lɛnɔ ndubutaaƒɔ-ɔ sika ɔƒualadi ebi leevu.”

¹¹ Anwuɔsu Lewini ɔmmɔ únu kalɔ ka ɔsɔ ɔkya-nwu kudɔ, na úlie mmɔ aani nwuna ubidi kalɛ.

¹² Mika úse okloƒu ɔmɛni likpo na úbenwini nwuna ɔkpane, na ɔ́ƒɔ-nwu ɔ́kya nwuna kaduli.

¹³ Mmɔ na Mika ɔ́su ɔnini, “Ɔmwi ni, ngyi ka Unwoti ɔdubo-mi lɛƒɔndia lɛdi bɔbla. Ɔsika Lewini ɔmɛni únweni mina ɔkpane.”