Litemi Batɛne 16 - Katɔti Ɔku Kedee

Simson Ku Delila Lɛlɔ Kɔtɛ

¹ Limeyi lɛdi ni, Simson úsie Gasa, na mmɔ na ɔ́nu ɔyalɛ ɔdi. Na úsie útátɛ ɔyalɛ ɔmɛni kudɔ usien umodi.

² Na bekyuli bátásu Gasaƒuɔ banini, “Simson úbo ɔkya Gasa mɛni.” Ɔmɛni ɔsu bekyuli bamɛni bábɛ na báka bámana kesii kani na Simson ɔ́kya mmɔ. Na badi benye ɔma ɔmmɔ kayaku bagya-nwu. Ɔmmɔ ɔsu básu lɛlɔ banini, “Usien lɛdibantɛ kemmo bɔdubɔdu-nwu.”

³ Nsu Simson ɔ́tɛ uleku ɔmmɔ kudɔ útédu usientɛ. Na ɔ́ta úsie ɔma ɔmmɔ awodu kayakun kenye, na úƒie kayakun kammɔ ku nina ligyii inyɔ lɛmmɔ ɔ́da. Na úgyingya-ni na úti kayakun kammɔ ɔ́sia lɛmangba, na úti útáva kɔbi kɔni anumi mɔɔtina Hebron lili.

⁴ Uwi ɔdi kama Simson úbanu ugblebi ɔni nlie Sorek Kɔwɛ kemmo na baalɔ-nwu banii Delila. Ka ɔ́nu ugblebi ɔmɛni ni, na ɔɔyɔ́-nwu.

⁵ Na Ƒilistiƒuɔ benengu bákpɛ béde ugblebi ɔmɛni na básu-nwu banini, “Sia ulu biala lɛlɔ na atɔlɔ Simson na ɔsu-ɔ kesii kani na ɔ́kɛ nwuna ɔyikun bonwu ɔmɛni ɔ́siku. Na abu bɔdubɔwia ulu ɔni lɛlɔ na bɔdubɔsia na bunyimi-nwu na buboku-nwu kalɔ. Na bula ƒui ɔdi biala ɔdubute-ɔ sika ɔƒualadi ebi apim unwi ku eti anyɔ.”

⁶ Ɔmɛni ɔsu Delila ɔ́su Simson ɔnini, “Su-mi kesii kani na aakɛ́ ƒula ɔyikun bonwu ɔmmɔ taasiku ku kalɛ si bényimi-ɔ ni, na alakana bukpo bɔlɛ.”

⁷ Amu na Simson údie kenye ɔnini, “Si ukyuli ɔdi úti kɔbuli kɔwɔdi maatɛ kɔni nátakwii tɔ únyimi-mi ni, ndubɔbla kpɛtɛ kpɛtɛ aani ukyuli keeke biala.”

⁸ Mmɔ na Ƒilistiƒuɔ benengu bammɔ béti kɔbuli kɔwɔdi kɔni nátakwii tɔ maatɛ béboku Delila. Na úti-ku únyimi-nwu.

⁹ Na bekyuli badi bábɛ bakya ɔtɔ ɔmmɔ kemmo. Na uleku ɔmɛni ɔ́va ɔ́lɔ Simson ɔnini, “Simson! Ƒilistiƒuɔ bási badubo!” Nsu úkulo kɔbuli kɔmmɔ aani kalɛ si ogya ɔ́ni úde kabuli na kaakywí. Anwuɔsu bátati nwuna ɔyikun bonwu ɔmmɔ kasikɔ.

¹⁰ Mmɔ na Delila ɔ́su Simson ɔnini, “Ábu-mi kɔdɔlɔ na átɔlɔ-mi. Bo mɛni na asu-mi kalɛ ɔlɛka benyimi-ɔ.”

¹¹ Na ɔ́su Delila ɔnini, “Si ukyuli ɔdi úti kɔbuli kɔwɔdi kɔni na béteti bátabla lɛla lɛdi kudii na bényimi-mi kpakplaa ni, ndubɔbla kpɛtɛ kpɛtɛ aani ukyuli keeke biala.”

¹² Ɔmmɔ ɔsu Delila úti kɔbuli kɔwɔdi na únyimi-nwu. Na bekyuli badi bábɛ bakya ɔtɔ ɔmmɔ kemmo mmɔ. Na uleku ɔmmɔ ɔ́kpali-nwu ɔ́su ɔnini, “Simson, Ƒilistiƒuɔ bási badubo.” Nsu úkulo kɔbuli kɔmmɔ ɔ́lɛku nwuna enu kemmo aani kalɛ na beekúlo unwo kabuli.

¹³ Amu na Delila ɔ́sɔ ɔ́su Simson ɔnini, “Uwi ɔmɛni ƒui ni, akya aabu-mi kɔdɔlɔ na aanyi ɔkɔ taatina-mi. Anwuɔsu su-mi kalɛ na ɔlɛka benyimi-ɔ.” Mmɔ na Simson ɔ́su-nwu ɔnini, “Si ébo mina lili linwini lɛni bámii báda lɛlɔ maatɛ mɛni áda kɔdi kɔni nkya bedine ɔkɔlɔ kemmo ni, ndubɔbla kpɛtɛ kpɛtɛ aani ukyuli keeke biala.” Anwuɔsu uwi ɔni na Simson ɔtɛ ɔɔlɛɛ ni, Delila úbo nwuna linwini lɛni na bámii maatɛ mmɔ ɔ́da kɔdi kɔni nkya ɔkɔlɔ ɔmmɔ kemmo.

¹⁴ Na úti ugyii ɔni mɔɔbala ɔkɔlɔ ɔmmɔ ɔ́kya kabalakɔ. Amu na ɔ́sɔ ɔ́kpali-nwu ɔnini, “Ƒilistiƒuɔ bási badubo!” Mmɔ na Simson ɔ́gyinya kɔnakunwi, na úkulo kɔbuli kɔni bébo báda ligyii lɛlɔ mmɔ údie.

¹⁵ Amu na Delila úye Simson ɔnini, “Dɛ na akana asu anii aayɔ́-mi uwi ɔni na alasu-mi ƒula litemi geen mɛni? Ɔsika kɔtɛ sɔɔn mɛni na adaku-mi kɔdɔlɔ bɔbu. Na átakana na asu-mi kesii kani na ƒula ɔyikun bonwu ɔmɛni ɔɔsí teebo.”

¹⁶ Na Delila ɔkya uukpóku Simson limeyi ndi limeyi na litemi lɛmɛni lɛlɔ úti útédu ka lɛlɔ lítu-nwu na ɔ́su ɔnii si nka úkpi muedi ni, ɔdia-nwu utulo.

¹⁷ Anwuɔsu ɔ́su Delila lɛla biala ɔnini, “Ɔ́si mina lɛwɔmeyi ni, béteti lɛla lɛdi bétekpeyi-mi linwini kudii. Ɔsika ndi Katɔti ukyuli ɔni na ɔ́ƒuna úte lɛlɔ.”

¹⁸ Na ka Delila ɔ́nu ɔ́ti ka Simson ɔ́su-nwu lɛla biala ni, ɔ́tala bekyuli ɔ́kya Ƒilistiƒuɔ benengu ka bátásu-ma banii, “Bɛsɔ binwini bibo kɔkladi, ɔsika ɔƒɛni na Simson ɔ́su-mi lɛla biala.” Anwuɔsu Ƒilistiƒuɔ benengu bamɛni báta na béti sika ɔƒualadi báda.

¹⁹ Amu na Delila úti Simson lili ɔ́sia nwuna ebuli lɛlɔ na ɔ́ya na ɔ́lɛɛ. Mmɔ na ɔ́lɔ ɔnana ɔdi na úbekpeyi nwuna kɔgyasu maatɛ kɔmmɔ. Na úse kalɔ ɔɔwiɛ, na nwuna ɔlɔkplu lɛnɔ ɔɔbla kpɛtɛ kpɛtɛ.

²⁰ Mmɔ na Delila ɔ́kpali ɔnii, “Simson, Ƒilistiƒuɔ bási badubo!” Na ka ɔ́gyinya ni, ɔ́su lɛlɔ ɔnii, “Lísela ntékpo lɛƒɔ lɛlɔ.” Nsu uwi ɔmmɔ útati tɔ ka Unwoti ɔ́ɔda-nwu úse.

²¹ Mmɔ na Ƒilistiƒuɔ bébo báda-nwu na bákpa-nwu anumi, na béti abuala egyiedi bábla kabuli na bényimi-nwu, na béti-nwu bésienku Gasa. Na bátákya-nwu ɔtɔ na mmɔ. Na báya na anwu mɔɔkɔ́ kukɔ na ɔtɔ katɛnkɔ mmɔ.

²² Nsu uwi útetu asa na Simson linwini líse kalɔ lɛɛkwɛ́.

Simson Úkpi

²³ Amu na Ƒilistiƒuɔ batɔnkune bábasa lisu ka babla akpala bete bana baƒiɔ bani baalɔ banii Dagon, na badi limeyi. Ɔsika baasu banii, “Bula baƒiɔ bamɛni néti Simson ɔni ndi bula ukisine ɔ́kya-bu enu kemmo.”

²⁴ Na uwi ɔni na bekyuli bánu Simson ɔmɛni ni, bémwi bana baƒiɔ banini, “Bula baƒiɔ néti bula ukisine ɔ́kya-bu enu kemmo, anwu ɔni nébile bula kalɔ na ɔ́du bekyuli pii.”

²⁵ Na uwi ɔni na béduo lɛlɔyɔ bonwu kemmo ni, básu banii, “Bɛlɔ Simson biboku mɛni na ubaƒia ɔtina-bu.” Amu na bátálɔ Simson bálɛku nwuna katɛnkɔ mmɔ na sɔsɔ úbaƒia ɔ́tina-ma. Uwi ɔni na béti-nwu bébenyene lɛkpa lɛdi kudɔ ni,

²⁶ Simson ɔ́su ukyuli ɔni néti-nwu utényene lɛkpa lɛmmɔ kudɔ mmɔ ɔnini, “Ti-mi tényene lɛkpa lɛni nda ɔtɔ ɔmɛni kpakplaa kudɔ, na lɛkada likpo-nwu lɛlɔ.”

²⁷ Mmɔ na kasalakɔ ɔtɔ ɔmmɔ úyi ku banana ku beleku ku Ƒilistiƒuɔ batɔnkune. Na katu taasia ɔtɔ ɔtɔdi ɔmmɔ katɔ lɛnɔ lɛni kani na bekyuli béyi mmɔ. Na bekyuli bani nkya ɔtɔ ɔmmɔ kemmo baanu kalɛ na Simson ɔɔƒia ni, babla aani nkyuli mpim ɛtɛ.

²⁸ Mmɔ na Simson ɔ́kpali Katɔti úvele-nwu ɔnini, “O Ɔyikune ƒui Unwoti, nyimo-mi. Na buvele nda-a, kya-mi ɔlɔkplu kɔkladi kɔmɛni. O Katɔti, ya na lɛbla Ƒilistiƒuɔ kalala kani bábla-mi ɔkɛnku mina anumi ani bákpa ɔsu.”

²⁹ Amu na Simson ɔ́kpɛ úde akpa anyɔ ani nda ɔtɔ umodi ɔmmɔ. Na ka úti kayi úkpo-nya lɛlɔ ni, úti nwuna kɔmii úƒie lɛkpa linwi ɔ́da. Na úƒie linyɔdi lɛnɔ ɔ́da ku nwuna kɔdianu.

³⁰ Mmɔ na Simson ɔ́su lɛlɔ ɔnini, “Ami ku Ƒilistiƒuɔ bɔdubo bukpi bɔsala.” Anwuɔsu úti nwuna ɔyikun ƒui na ɔ́kunku akpa ammɔ, na ɔtɔ ɔmmɔ ƒui ɔ́ƒɛ ɔ́yu batɔnkune bammɔ ku bekyuli bammɔ ƒui lɛlɔ. Ɔmɛni ɔsu Simson ɔ́du bekyuli na nwuna kukpi uwi útulo uwi ɔni na úlie ngba.

³¹ Amu na nwuna banwani bananabi ku ɔti bene ku nwuna kaduli bekyuli bésie na bététi nwuna ukpine. Na bénwini bátáva-nwu na Sora ku Estaol ntɛ, na ɔti Manoa kaƒiɔtɔ kudɔ. Na Simson ɔ́tɔnku Israelƒuɔ akwa aavlanyɔ.