Litemi Batɛne 1 - Katɔti Ɔku Kedee

Israelƒuɔ Ku Kanaanƒuɔ Békpo Na Yosua Kekpima

¹ Na Yosua kekpima ni, Israelƒuɔ béye Unwoti banini, “Bula akɔ ɔmani nka Kanaanƒuɔ butékpoku?”

² Amu na Unwoti ɔ́su-ma ɔnini, “Yuda kɔdua baka busie butékpoku-ma. Ɔsika líti kalɔ kammɔ lɛ́kya-ma enu kemmo.”

³ Amu na Yuda kɔdua bekyuli bammɔ básu Simeon kɔdua bekyuli banini, “Bibo na bibebunku-bu na butékpoku Kanaanƒuɔ, na bɔƒɔ kalɔ kani béti béte-bu. Abu lɛnɔ bɔdubo na bubenku-mii, na bukpo bɔƒɔ kalɔ kani na béti béte-mii.” Anwuɔsu Simeon kɔdua bekyuli básiaku-ma.

⁴ Uwi ɔni na Yuda kɔdua bekyuli básala lisu na bétékpoku Kanaanƒuɔ ku Perisiƒuɔ ni, Unwoti ɔ́ya na bádi-ma lɛlɔ, na bádu bana bekyuli mpim leevu (10,000) na Besek ɔma mmɔ.

⁵ Mmɔ na bánu Adoni-Besek ɔni ndi bana ɔga na békpoku-nwu. Na bábɔku Kanaanƒuɔ ku Perisiƒuɔ na békeli.

⁶ Adoni-Besek úkeli, nsu bábi básiaku-nwu na békulo-nwu lɛgba ku enu animigya ƒui.

⁷ Amu na Adoni-Besek ɔ́su ɔnini, “Líkulo baga liti ku aavlanyɔ lɛgba ku enu animigya ƒui. Na adila ani nálɛ ébo mina kadikɔ na lɛ́ya na bála bádi. Na ɔƒaani ni, kalala kani na lɛ́bla-ma kayu na Katɔti ɔ́ƒɔ-mi úti údie-mi kasi.” Na béti-nwu bésienku Yerusalem, na útékpi mmɔ.

⁸ Amu na Yuda kɔdua bekyuli báta na bétékpoku Yerusalemƒuɔ, na béƒie-nwu báƒɔ. Na bádu-ma ƒui ku kuwii, na bátu ogya bakya ɔma ɔmmɔ.

⁹ Ɔmmɔ kama básɔ bésie bétékpoku Kanaanƒuɔ bani nlie abi lɛlɔ ku bani nlie abi kalɔ ku bani nlie ketele kalɔ kakwiidi lɛlɔ na ɔƒɛ kanukɔ.

¹⁰ Na bésie anumi bétékpoku Kanaanƒuɔ bani nlie Hebron, kesii kani na bátaalɔ banii Kiriat-Arba, na básɔ bésie bétékpoku Sesai ku Ahiman ku Talmai kadi bekyuli, na bádi-ma lɛlɔ.

¹¹ Ka bási mmɔ ni, bésie bétékpoku Debir, kesii kani na bátaalɔ banii Kiriat-Seƒer.

¹² Na bekpone bammɔ kemmo unwi ɔni baalɔ banii Kaleb ɔ́su ɔnini, “Ukyuli ɔni ndubɔkana na ukpo ɔdi Kiriat-Seƒerƒuɔ lɛlɔ ni, ndubuti Aksa, mina ubi ulekubi, lite-nwu na uti.”

¹³ Amu na Kaleb ɔmmɔ kani ɔnwani ɔnamudi ɔni baalɔ Kena ubidi Otiel úsie útékpoku Debir ɔma unengudi ɔmɛni bekyuli na ɔ́di-ma lɛlɔ. Anwuɔsu Kaleb úti ubidi Aksa ɔmmɔ úte-nwu na úti.

¹⁴ Limeyi lɛdi ni, uwi ɔni na ulekubi ɔmɛni úubo uli Otiel kudɔ ni, Otiel ɔ́su ulekudi ɔnii ɔsu ɔti Kaleb na ute-nwu nwuna kemo kadi. Amu na ulekubi ɔmɛni úti ɔpɔnkɔ na úsie ɔti kudɔ. Na ɔni kani na ɔ́yu ɔpɔnkɔ ɔmmɔ lɛlɔ úbenye kalɔ ni, mmɔ kani na ɔti úye-nwu ɔnini, “Bi na aawia ka lɛbla lite-ɔ?”

¹⁵ Amu na ulekubi ɔmmɔ ɔ́su ɔnini, “Mɔɔyɔ́ ka abla-mi lɛƒɔndia sɛsɛɛ lɛdi na ete-mi abiɔ adi. Ɔsika kalɔ kani na éte-mi mmɔ kadi kalɔ kakwiidi.” Anwuɔsu Kaleb úte-nwu abiɔ anyɔ adi na kalɔ kammɔ katɔ ku kada kakɛ.

¹⁶ Amu na Mose ɔgyanti kaba bekyuli bani ndi Keniƒuɔ ku Yudaƒuɔ banana náta bási kesii kani baalɔ banii ebo ɔma unengudi na Yeriko, na bésie bétélieku bekyuli bani nli Yuda kalɔ kakwiidi kemmo akɔ na kesii kani nde Arad ɔma.

¹⁷ Yuda ku Simeon kɔdua bekyuli básala lɛlɔ na bétékpoku Kanaanƒuɔ bani nlie Seƒat. Na bádu bekyuli bammɔ na báyila ɔma ɔmmɔ udu. Na básia ɔma ɔmmɔ lɛnyi banii Horma.

¹⁸ Yuda kadi bekyuli béti Gasa ku Askelon ku Ekron lɛma linengudi lɛmmɔ ku kɔlɔ kɔni náka kɔ́mana-ni.

¹⁹ Na Unwoti únye ku Yuda kɔdua bekyuli na békpo béti kɔlɔ kɔni nkya abi lɛlɔ mmɔ. Nsu bátakana na babɔku bekyuli bani nlie ɔkwalɛ ɔmmɔ kemmo, ɔsika bebo bapɔnkɔ kɛɛkɛ ɔni ndi abuala sɔɔn.

²⁰ Béti Hebron kalɔ béte Kaleb aani kalɛ na Mose úbo-ma ɔda úse, ɔsika Kaleb ɔmmɔ nékpoku Anak bebi ɛtɛ kaba bekyuli bani nélie mmɔ na ɔ́bɔku-ma ɔ́lɛku mmɔ.

²¹ Nsu Benyamin kɔdua bekyuli ama bátakana Yebusiƒuɔ bɔbɔku bɔlɛku Yerusalem mmɔ, anwuɔsu ama ku Benyamin kɔdua bekyuli bamu belie mmɔ úbedu ɔmwi kadi.

²² Amu na Unwoti únye ku Yoseƒ kɔdua bekyuli na bétékpoku Betel.

²³ Uwi ɔni na bátala batu badi ka besie batásia Betel ɔni na bátaalɔ banii Lus mɛni anu kaduɛ ni,

²⁴ batu bammɔ bánu ɔnana ɔdi ka ɔ́si ɔɔlɛ́ ɔma ɔmmɔ kemmo. Na básu-nwu banini, “Tina-bu kesii kani na bɔsia buduo ɔma unengudi ɔmmɔ kemmo, na bɔdubɔda-a kaduɛ na ukpidi ɔdi ulálɛku-ɔ.”

²⁵ Anwuɔsu ɔ́tina-ma ulu, na Eƒraim ku Manase kɔdua bekyuli bádu ukyuli biala nkya ɔma ɔmmɔ kemmo. Nsu bátadu ɔnana ɔmmɔ ku nwuna kaduli bekyuli.

²⁶ Ɔmmɔ kama ni, ɔnana ɔmmɔ ɔ́ta na útélie Hetiƒuɔ kudɔ na ɔ́da ɔma unengudi ɔdi, na ɔ́sia-nwu lɛnyi ɔnii Lus. Na Lus ɔma ɔmɛni ɔmu ɔkya úbedu ɔmwi kadi.

²⁷ Nsu Manase kɔdua bekyuli bátabɔku bekyuli bani nlie Bet-San ku Taanak ku Dor ku Yibleam ku Megido ku akpaklɔ ani nkya nde lɛma lɛmmɔ, ɔsika mmɔ geen na Kanaanƒuɔ báyɔ ka belie.

²⁸ Uwi ɔni na Israelƒuɔ bábakɛ ɔyikun kaduɛ ni, bénye Kanaanƒuɔ lɛlɔ na baabla kabla teete-ma, nsu bátabɔku-ma bétedie kalɔ kammɔ kemmo ƒui.

²⁹ Na lɛni kani na Eƒraim kɔdua bekyuli lɛnɔ bátabɔku Kanaanƒuɔ bani nlie Geser bétedie. Anwuɔsu ama ku Kanaanƒuɔ bammɔ bamu belie ɔma ɔmmɔ kemmo.

³⁰ Na Sebulon kɔdua bekyuli bátabɔku bekyuli bani nlie Kitron ku Nahalo lɛma kemmo bétedie, nsu bénye-ma lɛlɔ na baabla kabla teete-ma ina ka ama ku-ma bamu beli.

³¹ Na Aser kɔdua bekyuli bátabɔku bekyuli bani nlie Akor ku Sidon ku Ahlab ku Aksib ku Helba ku Aƒik ku Rehob lɛma kemmo bétedie.

³² Na ɔmmɔ ɔsu Aser bekyuli bamɛni bélie básala ku Kanaanƒuɔ.

³³ Naƒtali kɔdua bekyuli bátabɔku bekyuli bani nlie Bet-Semes ku Bet-Anat lɛma kemmo bétedie. Mmomu ama ku-ma bélie básala, nsu bénye-ma lɛlɔ na baabla kabla teete-ma.

³⁴ Amoriƒuɔ bábɔku Dan kɔdua bekyuli bákɔliku abi lɛlɔ na bétete-ma kuƒi na bayu bebelie ɔkwalɛ kemmo.

³⁵ Amoriƒuɔ báƒɔ lɛlɔ bákya Ayalon ku Saalbim ku Heres abi lɛlɔ. Nsu ka Eƒraim ku Manase kɔdua bekyuli bábakɛ ɔyikun ni, bénye-ma lɛlɔ na Amoriƒuɔ bamɛni baabla-ma kabla.

³⁶ Amoriƒuɔ ɔmii ɔ́si Akrabim úti ɔ́kɔ úsie Sela ku nwuna kama kakɛ.