Lewiƒuɔ Ɔda Bubo 9 - Katɔti Ɔku Kedee

Aaron Úse Nwuna Ɔkpane Kabla Kalɔ

¹ Na limeyi maanedi lɛlɔ ni, Mose ɔ́lɔ Aaron ku nwuna bebi bananabi ku Israel kadi benengu ɔ́sala.

² Mmɔ na ɔ́su Aaron ɔnini, “Ti ɔmantɛ akɔ ɔgyani ɔkɔdi na eti abla likpidi lili buvele akpala. Na eti koƒonu kɔgyani kunengudi abla akpala bɔkyula. Na anu ka bebuo bammɔ ƒui bese sɛɛn na lɛla lɛdi lɛɛɛda-ma. Na eti-ma eboku Unwoti anumi.”

³ Amu na Unwoti ɔ́su Mose ɔnini, “Su Israelƒuɔ anini ‘Biti ketukpa bɛbla alaekpidi bɔkyiɛ akpala. Na biti ɔmantɛ akɔ ɔkɔdi ku koƒonu kɔkɔdi bani maƒɔ aani lɛkwa linwi linwi kani, na bese sɛɛn, na lɛla lɛdi lɛɛɛda-ma, na biti bɛbla akpala bɔkyula.

⁴ Na biti ɔmantɛ akɔ unengudi ku koƒonu kunengudi ku edula ebi akpala ani na básala ku nnɔ bɛbla akpala bite Unwoti, ɔsika ɔmwi limeyi lɛmɛni lɛlɔ ni, Unwoti ɔdubudie lɛlɔ ɔtina-mii.’ ”

⁵ Anwuɔsu béti ala ani na Mose úbo-ma ɔda mmɔ béboku Unwoti Adi Kevo kaduli kammɔ anumi, na Israel kadi bekyuli bammɔ bábasa mmɔ na Unwoti anumi.

⁶ Na Mose ɔ́su ɔnini, “Bɛsia anu na bɛnu lɛla lɛni Unwoti ɔɔwia ka bɛbla asa na nwuna bukeye bubo bubewi-mii lɛlɔ.”

⁷ Amu na Mose ɔ́kpali Aaron na ɔ́su-nwu ɔnini, “Kpɛ de lɛkpabi lɛmmɔ na abla ƒula likpidi lili buvele akpala ku akpala bɔkyula ɔdi ɔmmɔ. Na Unwoti udie kɔtu bɔni biala na awɔ ku ƒula kadi bekyuli ƒui lɛlɔ aani kalɛ na Unwoti úbo ɔda.”

⁸ Amu na Aaron ɔ́ni úde lɛkpabi lɛmmɔ, na ɔ́du ɔmantɛ akɔ ubi ɔni na ɔdubuti ɔbla nwuna likpidi lili buvele akpala ute lɛlɔ.

⁹ Na nwuna bebi bananabi béti ubugya ɔmmɔ béte-nwu. Na ɔ́kya-nwu lɛnimi na úti úsusu bebuo ese ani nlɛ lɛkpabi lɛmmɔ lɛlɔ na úti ɔkladi úwi lɛkpabi lɛmmɔ kalɔ.

¹⁰ Ebuo ɔmmɔ lɛmwi ku akabi ku akɔ ammɔ kenye kani na ɔlɛka beti babla likpidi lili buvele akpala ammɔ ni, úti ɔ́kyula na lɛkpabi lɛmmɔ lɛlɔ aani kalɛ na Unwoti úbo Mose ɔ́da.

¹¹ Na ebuo ɔmmɔ ɔku ku lɛna lɛkladi lɛmmɔ ƒui ni, Aaron ɔ́kyula-ni na bana keliekɔ kammɔ kama.

¹² Ɔmmɔ kama ni, ɔ́du ebuo ɔni na badubuti babla akpala bɔkyula ammɔ lɛnɔ na nwuna bebi bananabi béti ubugya ɔmmɔ béte-nwu na ɔ́kuna-nwu úwi lɛkpabi lɛmmɔ lɛlɔ ɔ́mana.

¹³ Na béti ebuo ɔni báwawa badubo bɔkyula mmɔ béboku-nwu ku nwuna lili. Na úti lɛna lɛmmɔ ku nwuna lili na ɔ́kyula na lɛkpabi lɛmmɔ lɛlɔ.

¹⁴ Na ɔ́ƒɔ aƒɔla ammɔ ku agyobi ammɔ na ntu kemmo kaduɛ na úti-nya ɔ́sia akpala ammɔ lɛlɔ ɔ́kyula na lɛkpabi lɛmmɔ lɛlɔ.

¹⁵ Amu na Aaron úti bekyuli bammɔ akpala úboku Unwoti anumi. Na úƒie ketukpa kani ndi bekyuli bammɔ likpidi bɔkyiɛ akpala ebuo na ɔ́du-ka na úti ɔ́bla likpidi bɔkyiɛ akpala ɔdi na bekyuli bammɔ lili aani udeedi kalɛ.

¹⁶ Aaron úti bɔkyula akpala ammɔ úboku Unwoti anumi na úti anwu lɛnɔ ɔ́kpa kalɛ na ulu ɔmmɔ ɔ́tina.

¹⁷ Nwuna kama úboku edula ebi akpala ammɔ lɛnɔ. Na ɔ́ma-nya lɛkɔkɔ keyile na úti ɔ́kyula na lɛkpabi lɛmmɔ lɛlɔ úbunku akpala ani na ɔ́kyula na ɔtanta ɔmmɔ.

¹⁸ Ɔmmɔ kama ni, ɔ́du ɔmantɛ akɔ ɔgyani unengudi ɔmmɔ ku koƒonu kɔni na badubuti babla unwi bɔbla akpala mmɔ úte bekyuli bammɔ ƒui. Na Aaron bebi bananabi bammɔ béti ubugya ɔmmɔ béte-nwu na ɔ́kuna úwi lɛkpabi lɛmmɔ lɛlɔ ɔ́mana.

¹⁹ Na ɔmantɛ akɔ bonwu ɔmmɔ lɛmwi ku koƒonu kɔmmɔ kesii kani bene nélie lɛmwi na lɛdanku nwuna ɔka ku akabi ammɔ ku ákɔ ammɔ lɛmwi lɛni mma-nwu lɛlɔ ƒui ni,

²⁰ béti básia kayi ɔvu ɔmmɔ lɛlɔ na Aaron úti úsienku lɛkpabi lɛmmɔ kudɔ na ɔ́timi lɛmwi lɛmmɔ ɔ́kyula ƒui úti ɔ́kpa úte Unwoti.

²¹ Na kayi ɔvu ɔmmɔ geen ku kɔdianu libuli ni, Aaron ɔ́kɔliku-nwu katɔ ɔ́tina Unwoti úbo-ni kudu aani kalɛ kani na Mose úbo ɔda ka babla.

²² Amu na uwi ɔni na Aaron ɔ́wɔlɔ likpidi lili buvele akpala ku bɔkyula ƒui akpala ammɔ ku unwi bɔbla akpala ammɔ ƒui kama ni, ɔ́kɔliku enu katɔ na úte bekyuli bammɔ kusɛ kusɛ asa na ɔ́gyu mmɔ.

²³ Mose ku Aaron bénwini bétéduo Unwoti Adi Kevo kammɔ kemmo. Na ka bálɛ bébete bekyuli bammɔ kusɛ kusɛ kama ni, Unwoti úkeye úbewi bekyuli bammɔ ƒui lɛlɔ.

²⁴ Na ogya ɔ́bwɛ ɔ́lɛ ɔ́si Unwoti Adi Kevo kemmo mmɔ úbakyula lɛla biala údie na lɛkpabi lɛmmɔ lɛlɔ kede kede. Na ka bekyuli bammɔ ƒui bánu ɔmɛni ni, báva momoomo ku lɛlɔyɔ na béti anumi bébi kalɔ.