Lewiƒuɔ Ɔda Bubo 26 - Katɔti Ɔku Kedee

Bɛdubɔkɛ Kɔsia Si Bɛ́di Mina Litemi Lɛlɔ

¹ “ ‘Ɔdi utavɔ baƒiɔ badi iye use lɛtabi lɛdi iye ɔnwi lɛtabi lɛdi ɔbla-ni kedee use lɛlɔ utaakpa na kalɔ kani lɛlɔ bísela bitélie mmɔ lɛlɔ. Ami ndi bina Unwoti Katɔti.

² “ ‘Bɛdi mina lɛnwunameyi ƒui lɛlɔ na biti ɔbu bite mina kakyakɔ. Ami ndi Unwoti.

³ “ ‘Si bɛ́di mina ɔda ɔni líbo-mii lɛlɔ na bɛ́sia mina bunyimi ƒui anu kaduɛ ni,

⁴ ndubɔya na ɔnantu utaana nwuna uwi lɛlɔ na edula ataadia, na bina egyiibi lɛnɔ ataanwu ebi teete-mii kaduɛ.

⁵ Na bɛdubunye edula lidu lidu bɔƒɛ lɛlɔ ku adingyii ebi bude lɛlɔ utédu ala awɔdi bɔva uwi. Na bɛdubɔdi lɛla biala na bɛɛyɔ́ na keyi kayɔku-mii na bina kalɔ kani lɛlɔ bísela bitélie mmɔ lɛlɔ.

⁶ “ ‘Ndubɔya na bɛkɛ atu bɔyɔ na kalɔ kammɔ kemmo na bɛtɛ bɛlɛɛ ƒaa na ɔdi ulakya-mii liƒu lɛdi. Na ndubɔbɔku bebuo bekpidi lɛlɛku kalɔ kammɔ lɛlɔ. Na kewii kadi kelékpoku-mii na kalɔ kammɔ kemmo.

⁷ Bɛdubo bina bekisine bɔbɔku útédu ka bɛ́du-ma ku bina kuwii.

⁸ Bina nkyuli ɛlɔ bɛdubo bina bekisine eti anyɔ bɔbɔku na bina nkyuli eti anyɔ bɛdubo bana mpim leevu bɔbɔku. Na bɛdubɔdu-ma ƒui na bina kuwii kenye.

⁹ “ ‘Ndubɔnu-mii ku lɛƒɔndia na lɛya na bɛwɔ na bimomo na lɛdi mina bunyimi lɛlɔ lite-mii.

¹⁰ Na bɛdubo lɛkwa lɛni návi edula butaadi útédu ka bɛwia-nya kesekɔ kalɛ na bɛkɛ awɔdi kakyakɔ.

¹¹ Na ndubɔbla mina keliekɔ na bina akɔ na lɛɛɛdubo-mii buni ƒui.

¹² Na ndubɔkya-mii akɔ na lɛbla bina Katɔti na amii lɛnɔ bɛbla mina bekyuli.

¹³ Ami ndi bina Unwoti Katɔti ɔni nédie-mii ɔ́lɛku Egyipte kalɔ lɛlɔ kalɛ na bɛsɔ bilénwini kabla bablane bilete Egyipteƒuɔ. Na ami náƒɛ kɔgba kɔni nda-mii ƒui kalɛ na ɔdia-mii na bɛkɔliku bina eli katɔ na bisie bɛvi kaduɛ.

Badubɔni Bani Naaadi Ɔda Bubo Lɛlɔ Kɔtu

¹⁴ “ ‘Nsu si biládi mina ɔda bubo lɛlɔ na bilenu-mi litemi

¹⁵ iye bíni mina ɔda bubo na biikisi mina bunyimi na bɛ́ta bínye-mu lɛlɔ na bínwini kama bɛ́kya-mu ni,

¹⁶ ala ani ndubo mɛni na ndubo-mii bɔbla. Ndubɔya na liƒu ala ada alɛ-mii lɛlɔ kɔnakunwi na lɛya na lɛlɛ buɛ lidu ku lɛlɔ ogya bɔƒɔ buteekpoku-mii na anumi abwɛ-mii na biteekpi. Bɛdubo bina edula bɔva keeke, ɔsika adubunwini bina bekisine adi.

¹⁷ Mina anumi adubɔlɛ-mii lɛlɔ na lɛya na bina bekisine badi-mii lɛlɔ. Na ama bani muukisi-mii mmɔ kalɔ na bɛdubo bɔkya na biteekeli uwi ɔni na ɔdi ulábɔku-mii.

¹⁸ “ ‘Na si ɔmɛni ƒui kama bíni na biládi mina ɔda bubo lɛlɔ ni, bina kɔtu bɔni bɔdubo katɔ bɔkɔ akpa maatɛ bubu.

¹⁹ Na ndubɔyila bina ɔyikun ɔni bɛ́kɛ ɔsu bɛɛtina lɛlɔ mmɔ kalɔ ƒui. Na lɛkalɛ kayaa kpakplaa na ɔnantu ɔsɔ ulana na ɔkɛnku ɔmmɔ ɔsu na kalɔ kakwii kpakplaa aani lɛbuala ligyiedi.

²⁰ Na bɛdubo lɛlɔ bususu na bibile bina ɔyikun keeke, ɔsika kalɔ kammɔ kasɔ kaaadubo lɛla lɛdi bɔdia, na bina adingyii lɛnɔ asɔ aaadubo bɔnwu.

²¹ “ ‘Na si bíni na bilenu-mi litemi mmomu mina lɛlɔ bɔta teenye ɔmmɔ kani na bísie anumi biidie taatina-mi ni, ndubɔya na bina lɛbibo lɛkɔ katɔ libu akpa maatɛ kalɛ na bina ekpidi aatina.

²² Na ndubudie beƒiebuo lɛkya-mii na beƒie bina bebi, na bayila bina bebuo ƒui udu kede kede, na bina bumomo bubo kalɔ geen, na ɔkɛnku ɔmmɔ ɔsu na bina lilu lɛtɛ kɔka ukpludi na bekyuli basɔ balasia-ni lɛlɔ.

²³ “ ‘Na si ɔmɛni ƒui kama bíni na bítenwini kayi na mina lɛlɔ bɔta teenye ɔmmɔ mmomu na bísie anumi biidie taatina-mi ni,

²⁴ ami lɛnɔ ndubo bɔta linye-mii lɛlɔ. Na lɛya na ɔgbankpi lidu lidu lɛlɛku-mii na lɛkɔ katɔ akpa maatɛ libu.

²⁵ Na lɛya na bina bekisine beduo-mii lɛlɔ ku kuwii na bedie-mii kasi ka bítadi bunyimi bɔmmɔ lɛlɔ ɔsu. Na si uwi ɔni na bísie bitáwia kabɛkɔ na bina lɛma linengudi kemmo ni, ndubudie lɛlɛ likpidi lɛkya-mii na lɛya na biduo bina bekisine enu kemmo.

²⁶ Na si líkulo bina adila bumomo kenye kɔnakunwi ni, beleku leevu badubo bɔkana na beƒi bodobodo bete bina kɔduli ƒui bekyuli na lɛyu linwi kemmo. Na badubo-nwu bule bute-mii wɛlɛ wɛlɛ lɛni na nwuna unu kenye, na si bɛ́di bilémo.

²⁷ “ ‘Na si kɔtu bɔni bɔmɛni kama bísie anumi na bɛɛta teenye-mi lɛlɔ na biládi mina ɔda bubo lɛlɔ ni,

²⁸ ndubuti kɔnyi geen lɛkya-mii na lɛya na bina kɔtu bɔni bɔkɔ katɔ bubu akpa maatɛ.

²⁹ Na bɛdubɔdu bina bebi bananabi ku belekubi muedi bɛkun.

³⁰ Na bina kɔkpakɔ kɔni nkya abi ƒui eli ndubɔyila-ku udu na ligyingya bina oloƒui akpabi ammɔ na lɛsala bina bekpine liwi ala ekuku ani neeebo ngba mmɔ lɛlɔ na lini-mii ƒui kede kede.

³¹ Na ndubɔyila bina lɛma linengudi udu ku ekpo ani na biisié taatákpa na lini ala ani na bɛɛkyula mmɔ ɔnyi.

³² Ndubo bina kalɔ bubile na kasɔ kaladia lɛla lɛdi bɔbla na si bina bekisine bánu na ɔbla-ma kɔnyana ku ɔtɔtɔ bɔgyu geen.

³³ Ndubo-mii bugyingya bɔkya kadi bamba bekyuli akɔ na liti mina kewii lɛbɔku-mii. Na lɛya na bina kalɔ ku bina lɛma linengudi ƒui lɛsɔ lɛtɛ ukpludi.

³⁴ Na uwi ɔni na bɛkya kaƒɔ lɛma mmɔ ni, akwa ani na bɛ́da bina kalɔ bíwi mmɔ adubunwini bɔnwuna akwa ete-ka ka bíni na bítete-ka bɔnwuna ɔsu.

³⁵ Na uwi ɔni na katɛ ukpludi mmɔ na bɛsɔ bilábla-ka lɛla lɛdi mmɔ ni, kalɔ kammɔ kadubɔkɛ bɔnwuna bɔni na bítete-ka uwi ɔni na bɛ́kya-ka kemmo.

³⁶ “ ‘Na bina akɔ bani nébu ni, ndubuti liƒu geen lɛkya-ma kayi na kaƒɔ kesii kani na bakya bana bekisine akɔ mmɔ, na si ina ɔƒɛƒɛɛ nébo livete lɛdi ɔɔvínku muedi ɔdubɔya na beteekeli aani ukyuli ɔdi mɔɔbɔku-ma. Na badubo bukeli aani kewii na bada baabɔku-ma na bebuli ina ka ɔdi ɔɔɔsiaku-ma.

³⁷ Na badubo lɛlɔ buteetulo teebuli aani kewii na beekeli, nsu uuuse lɛni. Anwuɔsu bɛɛɛdubo bɔkana bunye bɔsiaku bina bekisine.

³⁸ Na bɛdubo bukpi bɔkya bina bekisine kalɔ mmɔ na kalɔ kammɔ kebweli-mii.

³⁹ Na ama bani mebu lɛnɔ badubo bɔbla kpɛtɛ kpɛtɛ na bekisine bammɔ kalɔ lɛlɔ mmɔ ɔ́si bana ekpidi bɔbla ku bana bati ekpidi ani na bábla ɔsu.

⁴⁰ “ ‘Nsu si bekyuli bammɔ badubudie bana ekpidi ku bana bati ekpidi kalɔ, kalɛ na báta bénye-mi lɛlɔ ku ulikplu ala ani na bábla bákya-mi

⁴¹ ɔsu na ami lɛnɔ lɛ́ta línye-ma lɛlɔ na líti-ma ńtákya bana bekisine kalɔ lɛlɔ, na si bana kayi kani lɛlɔ na bétekulo ekpidi bétedie mmɔ kébo kalɔ buɛɛ ku udu buni na báƒɔ bana ekpidi lili kayu ni,

⁴² ndubunyimo lɛla lɛni na línyimi líse ɔ́siaku Yakob ku Isak ku Abraham lɛlɔ, na linyimo kalɔ kammɔ lɛnɔ.

⁴³ Ɔsika badubɔda kalɔ kammɔ bewi na kakɛ kana bɔnwuna akwa ka basɔ balábla-ka lɛlɔ kabla kadi ɔsu. Na badubɔƒɔ bana ekpidi kayu, ɔsika béni mina ɔda bubo na bátadi mina litemi lɛlɔ.

⁴⁴ “ ‘Nsu ina amu ni, lɛɛɛdubo-ma atu budie uwi ɔni na bakya bekisine kalɔ mmɔ na lini-ma na bayii udu ƒui na lɛla lɛni na línyimiku-ma libie. Ami ndi Unwoti bana Katɔti.

⁴⁵ Nsu na ama ɔsu ni, ndubo bunyimo bunyimi bɔni línyimi ku bana bati kuuku bani na lídie lɛ́lɛku Egyipte kalɔ lɛlɔ na kadi bamba pii anumi ka lɛbla bana Katɔti. Ami ndi Unwoti.’ ”

⁴⁶ Unwoti ɔda bubo ku bunyimi ku etemila ani na ɔ́lɛ ugyii na Sinai Kɔbi lɛlɔ úse ɔ́siaku Mose lɛlɔ ndi ani ndubo mɛni.