Lewiƒuɔ Ɔda Bubo 25 - Katɔti Ɔku Kedee

Bɔnwuna Lɛkwa

¹ Amu na Unwoti ɔ́su Mose uwi ɔni bákya Sinai kɔbi lɛlɔ ɔnini,

² “Kɔ lɛsa na asu Israelƒuɔ anini, ‘Si uwi ɔni bítéduo kalɔ kani lɛ́su ka méti méte-mii kemmo ni, ɔlɛka bɛya na kalɔ kammɔ kakɛ bɔnwuna uwi ɔdi ɔsiku bina katuma kudɔ na ɔkɛnku amii ɔsu na kalɔ kammɔ kete Unwoti ɔbu.

³ Bɛkya bina edula kalɔ kammɔ kemmo akwa aku na bɛƒɛ-nya na bɛsala-nya na bidie adingyii ammɔ kemmo kaduɛ na akwa aku ammɔ kemmo.

⁴ Nsu lɛkwa maatɛdi lɛdi bɔnwuna lɛkwa ute kalɔ kammɔ aani lɛnwunameyi kalɛ ɔ́siku katuma kabla biala kudɔ. Na ɔdi bɔnwuna lɛkwa ute Unwoti. Na ukyuli ɔdi utava lɛla lɛdi iye udie nwuna adingyii ammɔ kemmo.

⁵ Na edula ani nánu na anya alati ákwɛ na ákya ebi ku adingyii ani kemmo na bítedie ni, bɛsɔ bitesie bitatáƒɛ-nya iye bide-nya bɛkya ɔsa. Kalɔ kammɔ ɔlɛka kakɛ bɔnwuna lɛkwa lɛmmɔ.

⁶ Na edula biala na bɛ́kɛ na kalɔ kammɔ kemmo bɔnwuna lɛkwa lɛmmɔ kemmo ni, adubunwini adila ete-amii ku bina bananabi ku belekubi kabla bablane ku bani mɔɔbla-mii kabla limeyi lɛyuƒɔla kenye ku baƒɔ bani nébo bina kudɔ bulie uwi klukwii ɔdi kemmo kani.

⁷ Lɛni kani na bina bebuo bani na bɛɛnyuɛ ku alakpi akɔ bebuo ƒui bakana na badi-nya.

Kayu Buti Taakyiɛ Lɛkwa Limeyi Bɔdi

⁸ “ ‘Ka bɔnwuna akwa ammɔ maatɛ akpa maatɛ na bɔnwuna lɛkwa maatɛdi na bɔka bɔmmɔ kemmo ɔdubɔbla akwa aavlene-yaalenwi.

⁹ Na aya na bavwi kakpɛɛ kammɔ bavi kesi kesii na kɔbuli maatɛdi limeyi leevudi lɛlɔ. Na limeyi lɛni ndi Likpidi Kɔtu Bɔni Budie Limeyi bɔdi mmɔ lɛlɔ ni, anwu ndi kakpɛɛ kammɔ bɔku limeyi.

¹⁰ Na lɛkwa lɛni na ɔ́sa akwa liti mmɔ ni, biti lɛkwa lɛmmɔ bɛbla lɛkwa kedee na bɛkɔ-ni lɛsa bɛsu ka lɛkwa lɛmmɔ lɛdi bɔnwuna lɛkwa. Na si ukyuli ɔdi úye ɔdi kalɔ ɔlɛka ɔsɔku kalɔ kammɔ ute ɔlati iye nwuna kaba kemmo ukyuli. Na ukyuli uyedi biala ɔlɛka unwini usie nwuna bawɔne kudɔ.

¹¹ Na lɛkwa lɛmmɔ kemmo utalɛka ukyuli ɔdi ɔva lɛla lɛdi na nwuna kemo iye ɔƒɛ edula ani na anya alati nánwu ebi na ɔdi utaƒɛ adingyii ani kɔgba kemmo na útedie.

¹² Lɛkwa lɛmmɔ ƒui lɛdi lɛkwa kedee ute-mii. Anwuɔsu bɛdi edula ani kani na anya alati nakwɛ na ákya ebi mmɔ.

¹³ “ ‘Lɛkwa lɛni na ɔ́sa akwa liti mmɔ ni, si ukyuli ɔdi úye ɔkpanadi akɛla adi, na ɔsɔku ute ɔlati.

¹⁴ “ ‘Si ɔdi úti nwuna kalɔ úye iye úye kalɔ kadi ɔ́siku ɔkpanadi kudɔ ni, bitanya lɛlɔ bitakya bɛnii bɛɛsia ɔkpanadi lɛlɔ bɛkɛ kɔsia.

¹⁵ Si ɔdi ɔɔyɔ́ ka uti kalɔ uye iye awɔ aayɔ́ ka eye kalɔ asiku ƒula ɔkpana kudɔ ni, bɛbu bɛnu akwa ani ntɛ anumi asa na wedu buti taakyiɛ lɛkwa ku edula ani na badubudie bɔlɛku mmɔ.

¹⁶ Na si akwa ani nebu emomo ni, ɔlɛka kuye kɔmmɔ kɔkɔ katɔ. Na si akwa ammɔ eeemomo ni, na ɔlɛka kuye kɔmmɔ kubo kalɔ. Ɔsika kalɔ kani na uuyé ute-ɔ mmɔ adanku edula bumomo bɔni na ɔdubo bɔkɛ.

¹⁷ Na ɔdi utanya ɔkpanadi utamana ka ɔkɛ ɔkpanadi lɛlɔ kɔsia kɔni nátamanku. Mmomu biti ɔbu ku bɔyia geen bite Katɔti. Ami ndi bina Unwoti Katɔti.

¹⁸ “ ‘Bɛsia mina ɔda bubo anu na bɛnu ka bɛ́di-mu lɛlɔ kaduɛ na keyi kadubɔyɔku-mii na kalɔ kani lɛlɔ bísela bítélie mmɔ lɛlɔ.

¹⁹ Mmɔ na kalɔ kammɔ kadubɔdia-mii edula na bɛdi bimo na bilie mmɔ ƒaa ku atu bɔyɔ.

²⁰ Na ngyi ka bɛdubo lɛlɔ buye bɛnii, “Bi adila na bɔdubo bɔdi lɛkwa maatɛdi lɛlɔ si bútava edula adi na bútaƒɛ adi lɛnɔ?”

²¹ Ami ndubute-mii kusɛ kusɛ lɛkwa lɛkundi kemmo ɔni na bina edula adubo bɔnwu geen ute akwa atɛ sɔɔn bɔdi.

²² Na bɛdubo bina edula akukudi bɔdi ɔ́si uwi ɔmmɔ kemmo útédu ka bíse kalɔ bɛɛkya bina lɛkwa maanedi edula kalɔ. Na bɛdi edula akukudi ammɔ utédu lɛkwa yaalenwidi uwi ɔni bíse kalɔ bɛɛƒɛ bina edula.

²³ “ ‘Ukyuli biala uuubo kuƒi ka uti kalɔ kadi uye ute ukyuli bamba kusɛ kusɛ. Ɔsika kalɔ kammɔ ƒui kadi ami Unwoti kadi. Na baƒɔ na bɛdi na líte-mii mmɔ na bilie.

²⁴ Na kalɔ kammɔ ƒui kemmo ni, ɔlɛka bunyimi bɔdi bɔkya ka ukyuli ɔni néye kalɔ kadi úte ɔkpanadi ɔkɛ kuƒi na ɔsɔ ɔƒɔ nwuna kalɔ kammɔ uye ute lɛlɔ.

²⁵ “ ‘Si kɔwaba kúƒie bina kadi ukyuli ɔdi na úti nwuna kalɔ kadi iye lɛkɛ lɛdi úye ni, ɔnwani ɔlɛka ubaƒɔ lɛla lɛni na úti uuyé mmɔ kayu ute-nwu.

²⁶ Na si ubo ute ka utakɛ ukyuli ɔdi na ɔƒɔ kayu kammɔ ute-nwu na keyi kabatɛ-nwu limeyi lɛdi na ubakɛ lɛkɛ kaduɛ na ɔkana na ɔƒɔ lɛla lɛni na úti úye mmɔ kayu ni,

²⁷ ɔlɛka ɔbu ɔnu akwa bumomo bɔni návi uwi ɔni na úti nwuna lɛkɛ lɛmmɔ úye. Na ɔsɔku kabwɛkɔ kammɔ ute ukyuli ɔni néye lɛla lɛmmɔ ɔsiku-nwu kudɔ. Na ɔkana ɔsɔ ɔƒɔ nwuna lɛkɛ lɛmmɔ.

²⁸ Nsu si uuubo egulabi adi na ɔƒɔ kayu kammɔ ni, lɛla lɛni na úti úye mmɔ ɔdi ukyuli ɔni néye mmɔ ɔdi úti útédu Kayu Buti Taakyiɛ Lɛkwa. Na lɛkwa lɛmmɔ lɛla biala na ukyuli ɔmmɔ úye mmɔ ɔlɛka ɔsɔku-ni ute ɔlati. Na ɔlati ɔsɔ utéti nwuna lɛkɛ.

²⁹ “ ‘Si ukyuli ɔdi úti nwuna ɔtɔ úye na ɔma unengudi ɔni na bátu awodu bámana kemmo ni, ubo kuƒi ka ɔsɔ ɔƒɔ nwuna ɔtɔ uye na lɛkwa limodi lɛmmɔ kani kemmo uwi biala.

³⁰ Nsu si ɔtɔlati ɔmmɔ utakana kayu bɔƒɔ na ɔsɔ ɔƒɔ nwuna ɔtɔ ɔmmɔ lɛkwa lɛmmɔ kani ni, ɔtɔ ɔmmɔ únwini ukyuli ɔni néye ɔdi ku nwuna bawɔ uwi ƒui na utalɛka ɔsɔku ɔtɔ ɔmmɔ ute ɔlatidi Kayu Buti Taakyiɛ Lɛkwa kemmo lɛnɔ.

³¹ Nsu akpaklɔ lɛtɔ lɛni na bátatu awodu bátakya lílieku alakpi akɔ ala iye mmo. Na bakana na baƒɔ kayu na ɔmmɔ lili na ɔlati ɔsɔ ɔƒɔ nwuna lɛla iye unwini usie ɔlati kudɔ na buti taakyiɛ lɛkwa.

³² “ ‘Nsu Lewiƒuɔ ama bebo kuƒi uwi biala ka basɔ beye bana lɛtɔ lɛni bete-ma na lɛma lɛni bele bete-ma kemmo.

³³ Anwuɔsu ɔlɛka basɔku Lewiƒuɔ lɛkɛ lɛni ndi lɛtɔ lɛni béti béye béte-ma na Kayu Buti Taakyiɛ Lɛkwa uwi, ɔsika Lewiƒuɔ lɛtɔ lɛni bebo na lɛma lɛmmɔ kemmo kani ndi bana kese iye lɛkɛ.

³⁴ Nsu bebuo kadikɔ kɔlɔ kɔni bebo na bana lɛma utalɛka beti ɔdi beye. Ɔsika ɔdi Lewiƒuɔ kadikɔ úsela uwi ƒui.

³⁵ “ ‘Si Israelni ɔdi ulie ude-ɔ na úbenwini ɔwabane na ulakana nwuna lɛlɔ bɔnu ni, na awɔ ɔni nlie ede-nwu ete-nwu kebunku aani kalɛ na adubute ukyuli ɔni na ɔɔbla kabla teete-ɔ kebunku kalɛ na anwu lɛnɔ ɔkana bina akɔ bulie.

³⁶ Na si éte-nwu kebunku kadi ni, taƒɔ kuvonsia kɔdi tasiku-nwu kudɔ. Mmomu ti bɔyia te Katɔti na ƒula Israelni kpana ɔdubɔkana ulieku-mii.

³⁷ Tevo-nwu egulabi adi na aƒɔ-nwu kuvonsia kɔdi iye teye adila adi tete-nwu na akɛ kɔsia kɔdi.

³⁸ Ami ndi Unwoti bina Katɔti ɔni nédie-mii ɔ́lɛku Egyipte kalɔ lɛlɔ na bísie bítélie Kanaanƒuɔ kalɔ lɛlɔ na lɛbla bina Katɔti.

³⁹ “ ‘Na si bina kadi ukyuli ɔdi úbenwini ɔwabane na bina akɔ na ɔkɛnku ɔmmɔ ɔsu úti lɛlɔ úye úte ɔdi ni, taya na ɔbla-a kabla aani ƒula kabla ɔblane bamba kalɛ.

⁴⁰ Mmomu bla-nwu aani ukyuli ɔni néti ka ubabla kabla ute-ɔ na kayu kenye iye ukyuli ɔni nébo ubakya-a kudɔ uwi ɔdi na ɔbla kabla ute-ɔ uti utédu Kayu Buti Taakyiɛ Lɛkwa uwi.

⁴¹ Ɔmmɔ kama ɔlɛka banyonu ɔwabane ɔmmɔ ku nwuna bebi na basɔ benwini besie betéduo bana ɔtɔ bekyuli akɔ na basɔ betéti bana bati akɛla.

⁴² Ɔsika Israelƒuɔ badi mina kabla bablane bani na lídie lɛ́lɛku Egyipte kalɔ lɛlɔ, anwuɔsu utalɛka beti bana ɔdi beye bete ukyuli ɔdi na unwini-nwu kabla ɔblane.

⁴³ Na ɔdi utasia ulikplu ulu lɛlɔ utadi-ma lɛlɔ, mmomu biti bɔyia bite bina Katɔti.

⁴⁴ “ ‘Na banana ku beleku bani na bɛɛyɔ́ ka babla bina kabla bablane ɔlɛka basi lɛma lɛni náka lɛ́mana-mii kemmo. Bɛkana na biye bina kabla bablane bɛsiku mmɔ.

⁴⁵ Na bibo kuƒi lɛnɔ ka biye bekyuli bani nási kaƒɔ bébo bakya-mii kudɔ ku bana ɔtɔ bekyuli bani na báwɔ na Israel na benwini bina kese.

⁴⁶ Bibo kuƒi ka bɛbla bekyuli bammɔ na benwini bina bebi kese na bina kama na bɛbla-ma bina kabla bablane bana ƒui. Nsu ƒula Israelni ɔkpana anwu ni, tanya-nwu takya kalɛ biala.

⁴⁷ “ ‘Bɛya buti-nwu bɔnii ɔƒɔ ɔni nkya-a kudɔ úbenwini ɔlakɛne na ƒula Israelni ɔkpana úbenwini ɔwabane na úti lɛlɔ ɔ́bla kabla ɔblane úte ɔƒɔ ɔmmɔ iye ɔƒɔ ɔmmɔ kaduli ukyuli ɔdi.

⁴⁸ Ina ka kabla ɔblane na ɔdi ni, ubo kuƒi ka nwuna ɔnwani

⁴⁹ iye nwuna uni ɔnwani ɔnanabi iye benibi iye batibi iye nwuna ɔnwa ɔni nde-nwu ubo kuƒi ka ɔƒɔ kayu kammɔ na ɔlɛ ɔkpa kemmo iye si anwu ubakɛ lɛkɛ lɛdi ɔkana na anwu ɔlati ɔƒɔ kayu na ɔkɛ bɔnwuna.

⁵⁰ Ukyuli ɔni béye mmɔ ku ukyuli ɔni néye-nwu mmɔ ɔlɛka babu bɔnwuna kayu kani na ɔlɛka ɔƒɔ basi uwi ɔni béye-nwu útédu buti taakyiɛ lɛkwa. Na babu-nwu basiaku ukyuli ɔni na béti-nwu ka ɔbla kabla na lɛyuƒɔla kenye na akwa ammɔ kenye.

⁵¹ Na si akwa ani nébu emomo ni, ɔlɛka ɔƒɔ kayu kani nákɔ katɔ.

⁵² Nsu si akwa ani nébu eeemomo asa wedu Kayu Buti Taakyiɛ Lɛkwa ni, ukyuli ɔni mɔɔƒɔ kayu mmɔ ɔlɛka ɔƒɔ kayu kani nébo kalɔ.

⁵³ Ɔlɛka bada ukyuli ɔmmɔ aani ukyuli ɔni na buti na béti-nwu ka ɔbla kabla na kayu kenye ɔ́si lɛkwa útédu lɛkwa. Anwuɔsu bɛnu ka nwuna ɔlati uuunye-nwu lɛlɔ ulésusu-nwu kalɛ kalɛ.

⁵⁴ “ ‘Na ina ukyuli uyedi ɔmmɔ útakɛ ukyuli ɔni na ɔƒɔ-nwu lili kayu ni, si Kayu Buti Taakyiɛ Lɛkwa lídu ni, ɔlɛka banyonu anwu ku nwuna bebi na betesie,

⁵⁵ ɔsika kabla bablane na Israelƒuɔ badi-mi. Badi mina kabla bablane bani na lidie lɛ́lɛku Egyipte kalɔ lɛlɔ. Ami ndi Unwoti bina Katɔti.’ ”