Lewiƒuɔ Ɔda Bubo 21 - Katɔti Ɔku Kedee

Bakpane Ɔda Bubo Litemi

¹ Amu na Unwoti ɔ́su Mose ɔnini, “Su Aaron bebi bani ndi bakpane anini, ‘Ɔdi biala utaƒuƒwɛ nwuna lɛlɔ bekyuli bani nékpi iye ɔni ude ukpine biala kalɛ kalɛ na ɔya na ɔsɔ na nwuna lɛlɔ lilabla sɛɛn,

² ntu nwuna lɛlɔ ukyuli geen aani, uni iye ɔti iye ubidi ulekubi iye ɔnanabi iye ɔnwani ɔnanabi,

³ iye ɔnwani ulekubi ɔni nételie tɔ kɔgya na ɔkya-nwu kalɔ, bana kukpi kemmo kani na ɔdubɔkana na ubile lɛlɔ lɛni.

⁴ Útalɛka ubile lɛlɔ na anwu ku ulekudi lɛlɔ bekyuli kɔna kɔdi kukpi ɔsu.

⁵ “ ‘Na bakpane betekpeyi bana eli iye ukwi amadɔ iye bekulo bana ɔlɔna kesii kadi na kukpi kɔdi ɔsu.

⁶ Ɔlɛka babla lɛlɔ kedee bete Katɔti na balabla lɛla lɛdi belebile bana Katɔti lɛnyi, ɔsika ama muuti akpala ani na bákyula teete Unwoti ani ndi Katɔti adila. Anwuɔsu ɔlɛka babla kedee.

⁷ “ ‘Útalɛka bakpane beti beleku bani nébile lɛlɔ na badi bayalɛ iye beti beleku bani nányonu bana bagya, ɔsika bakpane badi bekyuli kedee bete bana Katɔti.

⁸ Ɔlɛka bekyuli banu bakpane ka badi bekyuli kedee, ɔsika ama muuti bina Katɔti adila teete-nwu. Biti-ma ka badi bekyuli kedee, ɔsika ami Unwoti ɔni nédie-mii líse sɛsɛɛ ka bise kedee nse kedee.

⁹ “ ‘Na si ɔkpane ɔdi ubidi ulekubi úbile lɛlɔ na úti lɛlɔ ɔ́bla ɔyalɛ ni, úwi ɔti anumi kalɔ, anwuɔsu ɔlɛka bakya-nwu ogya kemmo bakyula.

¹⁰ “ ‘Ɔkpane unengudi ɔni na béwi-nwu lili nnɔmii bése-nwu likpo na nwuna banwani akɔ ka ɔkya ɔkpane lɛwu lɛmmɔ utalɛ ka ɔnyonu nwuna kuli linwini uwi kalɛ kalɛ iye ɔni nwuna awu ɔbwɛ ka kekwa kada-nwu ɔsu.

¹¹ Útalɛ ka uduo kesii kani na ukpine ɔtɛ na ubile lɛlɔ na ulése sɛɛn ina ɔti iye uni na ɔdi,

¹² iye ɔvi ɔlɛ Unwoti Adi Kevo kammɔ kemmo uteesie kekwa kalɔ na ɔya na ubile lɛlɔ ku Kevo kammɔ, ɔsika bédie-nwu bése sɛsɛɛ béte Unwoti na nnɔmii lili buwi bɔmmɔ ɔsu.

¹³ “ ‘Ugblebi adagyaa na ɔlɛka uti.

¹⁴ Na ɔɔɔdi ukpinele iye uleku ɔni béti bányonu iye uleku ɔyalɛ. Ɔnu ka adagyaa ɔni na ɔdubo buti mmɔ ɔ́si nwuna kaba kemmo

¹⁵ kalɛ na nwuna bebi balásɔ na bana kenyekɔ. Ami ndi Unwoti ɔni náƒuna-nwu úse sɛsɛɛ ka ɔbla kedee.’ ”

¹⁶ Amu na Unwoti úbo Mose ɔda ɔnini,

¹⁷ “Su Aaron anini, ‘Nu ka ƒula bawɔ bani na bana likpo lɛdi lɛsɔ ɔdi uláni uléde ɔnii uuti akpala adi ɔkpa ute-mi. Ɔda bubo bɔmɛni buse bute ƒula bawɔ úsela uwi ƒui.

¹⁸ Ɔnana biala na anumi ábwɛ-nwu iye ɔ́ƒɛ uwi kalɔ iye nwuna kakɛ kadi kásɔ uteti akpala utakpa utete-mi.

¹⁹ Na naaawia ukyuli ɔni na kɔnu iye ɔgba ɔ́gogolo-nwu ka uti akpala ute-mi,

²⁰ iye ubo keƒu iye use klukwii iye lɛnumi linwi lɛɛɛdia-nwu iye ɔlɔna ɔlɛ ɔdi uukpóku-nwu iye agobɛɛ ébie-nwu.

²¹ Ɔkpane Aaron uwɔ biala na nwuna kakɛ kadi kásɔ utabla akpala bɔkyula ɔdi utete-mi.

²² Ukyuli ɔmɛni udu ɔkana na ɔdi adila kedee ku ani nse kedee ƒui ani béti bákpa béte-mi mmɔ adi,

²³ nsu ka nwuna kakɛ kadi kásɔ ɔsu ni, utakpɛ utede kakpakɔ bule kɔdi kɔmmɔ iye lɛkpabi lɛmmɔ na waya na mina Kevo kammɔ kese lɛlɔ. Ami ndi Unwoti ɔni mɔɔbla ala ammɔ ƒui kedee.’ ”

²⁴ Etemila amɛni na Mose ɔ́su Aaron ku nwuna bebi ku Israelƒuɔ.