Lewiƒuɔ Ɔda Bubo 14 - Katɔti Ɔku Kedee

Ɔda Bubo Bute Bekyuli Bani Na Ɔlɛgyie Ɔ́ba-ma

¹ Amu na Unwoti ɔ́su Mose ɔnini,

² “Amɛni ndi ɔda bubo bute ukyuli ɔni na ɔlɛgyie úwi-nwu na ɔlɛ ɔmmɔ ɔ́ba-nwu.” Na ɔ́su-nwu ɔnini, “Si béti ukyuli ɔmmɔ bábatina ɔkpane ni,

³ ɔlɛka ɔkpane ɔmmɔ usie kesii kani na ɔlɛne ɔmmɔ ɔkya kesii kani na Israelƒuɔ belie mmɔ kama na utásia-nwu anu ɔnu na mmɔ. Na si ukyuli ɔmmɔ ɔlɛgyie ɔmmɔ ɔ́sa ni,

⁴ ɔkpane ɔmmɔ ɔsu ukyuli ɔmmɔ na beti baasɛ babuni inyɔ bani neeese lɛlɔ ku kegyikɛ ku lɛdiku ligyiedi ku hisope na beti babla-nwu sɛɛn bɔbla ɔdi ɔmmɔ.

⁵ Na mmɔ na ɔkpane ɔmmɔ ɔdubɔya na badu baasɛ bammɔ kemmo unwi na kayaa na ntu buni ku ketubui kemmo eli.

⁶ Na ɔkpane ɔmmɔ uti aasɛ unyɔdi ɔni bátadu mmɔ ku sida kegyikɛ ku kɔdi kugyiedi kɔmmɔ ku hisope ɔnyina ɔkya ketubui kani kemmo na ntu ku ubugya ɔmmɔ uwi mmɔ kemmo.

⁷ Na ɔkpane ɔmmɔ ɔkuna ntu bɔmmɔ uwi ukyuli ɔni na ɔɔbla lɛlɔ bɔbla sɛɛn ɔdi ɔmmɔ teete mmɔ maatɛ na ubo kudu ute bɔti ka ɔlɛ ɔmmɔ ɔ́sa na ɔƒɛni amu use sɛɛn. Na ɔmmɔ kama na ɔnyonu aasɛ ku ngba ɔmmɔ na uveyi ɔtɔlɔ uteesie alakpi akɔ.

⁸ “Na ukyuli ɔni na baabla lɛlɔ bɔbla sɛɛn ɔdi ɔmmɔ teete ɔlɛka ɔƒɔ nwuna adala na ukpeyi lili na ɔkpi ntu na ɔmmɔ ɔɔtina ka ɔ́bla sɛɛn. Na ɔmmɔ kama ɔkana utéduo nwuna badi akɔ. Nsu ɔdi ka ɔka kevoma bulie emeyi maatɛ asa.

⁹ Na limeyi maatɛdi lɛmmɔ lɛlɔ na ɔlɛka ukpeyi lili ku nwuna ukwi ku nwuna lɛnungya ku linwini biala na nwuna ɔlɔna kesii biala. Na ɔmmɔ kama ɔƒɔ nwuna adala na ɔkpi na ɔbla sɛɛn.

¹⁰ “Na limeyi maanedi lɛlɔ ni, ɔlɛka ɔwia baƒonu bagyani inyɔ ku koƒonu kuledi kunwi kɔni náƒɔ lɛkwa linwi na kútasɔ kesii kadi ku ɔlaaƒɔ lɛɛƒɛɛ klo klo ɛku ku kakɛ ɔni básala ku nnɔ ku nnɔ ɔsii bamba unwi.

¹¹ Na ɔkpane ɔni mɔɔbla ɔdi ɔmmɔ ɔdubɔkpanku ukyuli ɔni na ɔɔbla ɔdi ɔmmɔ teete ku akpala ammɔ ƒui usienku Unwoti Adi Kevo kammɔ kayakun.

¹² “Ɔmmɔ kama ɔkpane ɔmmɔ ɔdubuti koƒonu ubi ɔgyani unwi ubunku nnɔ ɔsii na uti ɔbla kɔtɔ bukpi akpala. Na ɔdubɔkɔliku-nya katɔ ɔtina-mi aani ala ani na bákɔliku katɔ bébo kudu.

¹³ Na ɔkpane ɔmmɔ ɔlɛka ɔdu koƒonu kɔmmɔ na kesii kani nse kedee na baadú likpidi bɔkyiɛ akpala ku akpala bɔkyula ƒui ebuo. Na aani likpidi lili buvele akpala kalɛ ni, kɔtɔ bukpi akpala lɛnɔ adi ɔkpane ɔmmɔ adi na ese kedee geen.

¹⁴ Na kɔtɔ bukpi ebuo ɔmmɔ ubugya ni, ɔlɛka ɔkpane ɔmmɔ ɔbla-nwu ɔdi utu ukyuli ɔni na baabla sɛɛn bɔbla ɔdi ɔmmɔ teete mmɔ kɔdianu kɔtu kawɔlɔkɔ ku nwuna kɔdianu kɔnu ku kɔdianu ɔgba animigya.

¹⁵ Na ɔkpane ɔmmɔ ɔdubuti nnɔmii bɔmmɔ bɔdi uwi anwu ɔlati nwuna kɔmiinu kɔnu lɛkɔkɔ

¹⁶ na uti nwuna kɔdianu lɛnimi lideedi lɛni nsiaku lɛnimigya ɔkya nnɔmii bɔni nwi-nwu lɛkɔkɔ mmɔ kemmo na ɔta-mu uwi kayaa maatɛ na Unwoti anumi mmɔ.

¹⁷ Na nnɔmii bɔkladi bɔni nwi ɔkpane ɔmmɔ lɛkɔkɔ ni, ɔbla-mu utu ukyuli ɔni na ɔɔbla sɛɛn bɔbla ɔdi ɔmmɔ teete kɔdianu kɔtu kawɔlɔkɔ ku kɔdianu kɔnu lɛnimigya ku kɔdianu ɔgba lɛnimigya na kesii kani na úsusu kɔtɔ bukpi ebuo ɔmmɔ ubugya mmɔ kani.

¹⁸ Na nnɔmii bɔkladi ni, uti-mu ususu ukyuli ɔmmɔ lili ɔtina ka Unwoti údie likpidi kɔtu bɔni biala na nwuna lɛlɔ.

¹⁹ “Ɔmmɔ kama ɔkpane ɔmmɔ ɔdubɔbla likpidi lili buvele akpala uti ɔbla lɛlɔ bɔbla sɛɛn ɔdi ɔmmɔ ute ukyuli ɔmmɔ. Na ɔmmɔ kama na ɔdu akpala bɔkyula ebuo ɔmmɔ

²⁰ na uti ubunku edula ebi akpala ammɔ na ɔkyula ƒui na lɛkpabi lɛlɔ uti ɔbla sɛɛn bɔbla ɔdi ɔmmɔ ute ukyuli ɔmmɔ ɔwɔlɔ na ɔbla sɛɛn.

²¹ “Nsu si ukyuli ɔmmɔ ɔdi ɔwabane na ulákɛ ala ammɔ ni, na uti koƒonu kɔgyani kunwi uboku na beti bakɔliku katɔ batina-mi aani likpidi kɔtu bɔni budie akpala ubunku ɔlaaƒɔ lɛɛƒɛɛ inyɔ na basala-nwu ku nnɔ ute edula ebi akpala ku nnɔ ɔsii unwi

²² ku babloduma inyɔ iye bamangbɛ inyɔ bani na ɔdubɔkana bɔkɛ na unwi unye ute likpidi lili buvele akpala na ɔkladi unye ute bɔkyula ƒui akpala.

²³ “Na si emeyi maane édu ni, na beti akpala ammɔ beboku na ɔkpane ɔmmɔ uti ɔbla-nwu lɛlɔ bɔbla sɛɛn ɔdi ɔmmɔ na Unwoti Adi Kevo kayakun kenye mmɔ na Unwoti anumi.

²⁴ Na ɔkpane ɔmmɔ uti kɔtɔ bukpi akpala koƒonu kɔgyani kɔmmɔ ku nnɔ ɔsii ɔmmɔ ɔkɔliku katɔ ɔtina-mi aani katɔ bɔkɔliku kudu bubo akpala.

²⁵ Na ɔmmɔ kama ɔkpane ɔmmɔ ɔdubɔdu kɔtɔ bukpi akpala koƒonu kɔmmɔ na uti ubugya ɔmmɔ ɔdi utu ukyuli ɔmmɔ kɔdianu kɔtu ku kɔdianu kɔnu lɛnimigya ku kɔdianu ɔgba lɛnimigya.

²⁶ Na ɔkpane ɔƒɛ nnɔ bɔmmɔ bɔdi uwi anwu ɔlati kɔmiinu kɔnu lɛkɔkɔ.

²⁷ Na uti nwuna kɔdianu lɛnimi lideedi lɛni nsiaku lɛnimigya utu nnɔ bɔni nwi-nwu kɔmiinu lɛkɔkɔ mmɔ na ɔta-mu uwi kayaa maatɛ na Unwoti anumi mmɔ.

²⁸ Na uti nnɔ bɔmmɔ bɔdi utu ukyuli ɔni baabla sɛɛn mmɔ kɔdianu kɔtu ku nwuna kɔdianu lɛnimigya ku nwuna kɔdianu ɔgba lɛnimigya na kesii kani na bétu-nwu kɔtɔ bukpi ebuo ɔmmɔ ubugya kani.

²⁹ Na bɔkladi bɔni nébu buwi-nwu lɛkɔkɔ ni, ɔkpane ɔmmɔ uti ususu ukyuli ɔni na baabla ɔdi ɔmmɔ teete kalɛ na Unwoti udie kɔtu bɔni biala na nwuna lɛlɔ.

³⁰ Na ɔmmɔ kama na uti nwuna babloduma iye bamangbɛ bakɔdi bani na ɔ́kɛ mmɔ ɔkpa.

³¹ Na lɛla lɛni na ɔ́kɛ ni, uti unwi ɔbla likpidi lili buvele akpala na uti unyɔdi ɔbla akpala bɔkyula úbunku edula ebi akpala ammɔ. Ulu ɔmɛni lɛlɔ na ɔkpane ɔmmɔ ɔdubɔsia na ɔbla lɛlɔ bɔbla sɛɛn ɔdi ɔmmɔ ute ukyuli ɔmmɔ.”

³² Ala amɛni ndi ɔda bubo bute ukyuli ɔni na ɔlɛgyie ɔni mɔɔví ɔda-nwu, nsu kɔnu kuledu-nwu akpala ammɔ lɛlɔ ute nwuna lɛlɔ bɔbla sɛɛn ɔdi ɔmmɔ.

Ala Ani Butili Kuyi Kɔ́ƒɔ Bɔbla Sɛɛn

³³ Unwoti ɔ́su Mose ku Aaron ɔnini,

³⁴ “Si bítéduo Kanaan kalɔ kani lɛ́su líse ka mete-mii na biti binwini bina kadikɔ mmɔ kemmo na bɛ́nu ka lɛ́ya na butili kuyi kɔƒɔ ɔtɔ ɔdi kemmo ni,

³⁵ na kaduli ɔlati ɔmmɔ usie na utásu ɔkpane ka lɛla lɛdi lɛ́lɛ lɛsia kaduli lɛwoduku lɛlɔ aani butili kuyi.

³⁶ Na asa na ɔkpane ɔmmɔ ɔdubusie utánu lɛla lɛni lɛdi ni, ɔlɛka bada lɛla biala nkya ɔtɔ ɔmmɔ kemmo bedie asa na usie mmɔ kalɛ na ulatina aani lɛla biala nse ɔtɔ ɔmmɔ kemmo liiise sɛɛn. Na ɔmmɔ kama ɔkpane ɔmmɔ ɔdubusie kaduli kammɔ kemmo utánu lɛla lɛni na lɛdi.

³⁷ Ɔmmɔ ɔsu ɔdubɔsia anumi ɔnu lɛla lɛni nsia awodu ammɔ lɛlɔ. Na si mmɔ kánu kéduo na úgyie iye use evete awɔdi ni,

³⁸ na ɔkpane ɔmmɔ ɔvi ɔlɛ ɔtɔ ɔmmɔ kemmo na ɔkalɛ-nwu unyene emeyi maatɛ.

³⁹ Na limeyi maatɛdi lɛlɔ ni, ɔsɔ ɔdubusie na utásia ɔtɔ ɔmmɔ anu ɔnu si butili bɔmmɔ bɔ́sɔ búsie kama búbu na awodu ammɔ lɛlɔ.

⁴⁰ Na si use lɛni ni, ɔkpane ɔmmɔ ɔdubɔsu na bamami atabi ani náƒɔ butili bɔmmɔ bedie na balɛku-nya ɔma kemmo betébo bakya kesii kani muusé lɛlɔ.

⁴¹ Ɔmmɔ kama badubo ɔtɔ ɔmmɔ kemmo awodu ƒui lɛlɔ bukpeyi na beti lɛti lɛmmɔ betéwiakun kesii kani muusé lɛlɔ mmɔ.

⁴² Na ɔmmɔ kama na beti atabi abambadi ku lɛti lɛbambadi baklibi ɔtɔ ɔmmɔ kemmo.

⁴³ “Na si ɔni na básɔku kaduli kammɔ báklibi na lɛla lɛmmɔ lɛ́sɔ líbasia lɛwoduku lɛmmɔ lɛlɔ ni,

⁴⁴ na ɔkpane ɔsɔ usie na utásia kaduli kammɔ anu. Na si ɔ́nu na sɔsɔ na lɛla lɛmmɔ lɛ́sɔ lígyingya lɛ́ƒɔ awodu ammɔ lɛlɔ ni, na ɔdi ɔlɛ ɔni muubile ala ɔsu kaduli kammɔ keesé lɛlɔ.

⁴⁵ Na ɔlɛka baƒɛ ɔtɔ ɔmmɔ na babuma nwuna lɛti ku atabi ku egyii ani ƒui béti bébi ɔtɔ ɔmmɔ na betébo-nya bewiakun ɔma ɔmmɔ kɔmadɔ kesii kani muusé lɛlɔ mmɔ.

⁴⁶ “Ukyuli ɔni ndubusie kaduli kammɔ na uwi ɔni na bákalɛ-ka bényene mmɔ ɔdubuse lɛlɔ limeyi limodi utálɛ useyi uwi.

⁴⁷ Na ukyuli biala madi iye matɛ kaduli kammɔ kemmo ɔlɛka ɔƒɔ nwuna adala.

⁴⁸ “Nsu si ɔkpane ɔmmɔ úbanu kaduli kammɔ na butili bɔmmɔ bɔ́sɔ bútegyingya bútaƒɔ kaduli kani awodu básɔku bákwa mmɔ lɛlɔ ni, ɔkpane ɔdubute kati ka kaduli kammɔ kabla sɛɛn, ɔsika butili bɔmmɔ bɔ́sa.

⁴⁹ Asa na wabla-ka sɛɛn ɔdi ɔmmɔ ni, ɔlɛka uti baasɛ inyɔ ku kegyikɛ ku lɛduni ligyiedi ku hisope.

⁵⁰ Na ɔdubɔdu aasɛ unwi na kayaa na ketubui ku ntu bɔbuni bɔmmɔ eli.

⁵¹ Na uti kegyikɛ kammɔ ku hisope ku lɛduni ligyiedi lɛmmɔ ku aasɛ ku ngba ku ngba ɔmmɔ ɔkya udie aasɛ ɔni na ɔ́du ubugya ku ntu bɔni nwi ketubui kemmo mmɔ na ɔkuna uwi kaduli kammɔ kemmo maatɛ.

⁵² Lɛni na ɔdubuti aasɛ ubugya ku ntu bɔni nwi libui kemmo mmɔ ku aasɛ ku ngba ku ngba ku sida kegyikɛ ku hisope ku lɛduni ligyiedi lɛmmɔ ɔbla kaduli kammɔ sɛɛn bɔbla ɔdi ɔmmɔ.

⁵³ Ɔmmɔ kama ɔdubɔlɛ ɔma ɔmmɔ kemmo na utányonu aasɛ ɔmmɔ na uveyi ɔtɔlɔ utéduo alakpi akɔ. Lɛni na ɔdubudie bɔsɔ biala na kɔduli kammɔ lɛlɔ na kɔbla sɛɛn.”

⁵⁴ Ɔmmɔ ndi ɔda bubo bute ɔlɛgyie ɔni mɔɔví

⁵⁵ ku butili na adala iye lɛtɔ lɛlɔ

⁵⁶ ku eƒula lidu lidu ku lɛlɔ ekpo bugyie

⁵⁷ ku kalɛ na banu bati si lɛla lɛdi lise sɛɛn iye liiise sɛɛn lɛlɔ. Ammɔ ndi ɔda bubo bɔni nkɛnku lɛlɛ lɛni mɔɔví ku butili lɛlɔ.