Lewiƒuɔ Ɔda Bubo 1 - Katɔti Ɔku Kedee

Katɔti Úbo Ɔda Na Bebuo Bɔdu Taakyula Akpala Lɛlɔ

¹ Unwoti ɔ́kpali Mose ɔ́siku Unwoti Adi Kevo kemmo na ɔ́su-nwu ɔnini,

² “Tásu Israel kadi bekyuli anini, ‘Si bina akɔ ɔdi úti akpala etela ɔduboku ami bina Unwoti ni, ɔlɛka uti ebuo ɔsiku nwuna bebuo akɔ iye nwuna ɔmantɛ bakɔ akɔ.

³ “ ‘Ɔƒɛni si bebuo bɔkyula akpala na ɔdi ɔdanku ebuo ɔdi ka ubabla ni, na ɔƒuna ebuo ɔni nse sɛɛn na útasɔ kesii kadi na ɔdi ebuo ɔgyani. Na ebuo ɔmmɔ ni, Unwoti Adi Kevo kammɔ kayakun kenye na ɔdubuti-nwu uboku na lɛnu si ɔdia-mi.

⁴ Ɔdi ka ukyuli ɔmmɔ uti kɔnu ɔsia ebuo ɔmmɔ lili, na ɔtina ka ebuo ɔmmɔ na úti uunyene nwuna lɛlɔ kenye kalɛ na lɛƒɔ nwuna akpala bɔkyula ƒui bɔmmɔ na lidie kɔtu bɔni biala na nwuna lɛlɔ.

⁵ Ɔmmɔ kama ni, ɔdubɔdu ɔmantɛ akɔ ɔgyani ɔmmɔ na Unwoti Adi Kevo kammɔ kayakun kenye. Na Aaron bebi bananabi bani ndi bakpane mmɔ ndubɔkɔliku ubugya ɔmmɔ katɔ batina-mi asa na bakuna-nwu bewi lɛkpabi lɛni nnye Unwoti Adi Kevo kammɔ kayakun kenye mmɔ lɛlɔ bamana.

⁶ Ɔmmɔ kama ukyuli ɔmmɔ ɔdubudie akpala bɔkyula ebuo ɔmmɔ ɔku. Na ɔwawa-nwu na ule-nwu kemmo akpa akpa.

⁷ Aaron bebi bakpane bammɔ badubo ogya bɔsala na lɛkpabi lɛmmɔ lɛlɔ. Na bala ekyweni basia-nwu lɛlɔ kaduɛ.

⁸ Si báwɔlɔ ni, badubɔtɛ lɛna lɛmmɔ basia ogya ɔmmɔ lɛlɔ ku ebuo ɔmmɔ lili ku lɛmwi ƒui.

⁹ Na ukyuli ɔmmɔ ɔdubuti kaƒɔ ala ammɔ ku agyobi ɔkya ntu kemmo na ɔƒɔ kaduɛ na beti basia ogya ɔmmɔ lɛlɔ na akywi. Na ɔmmɔ ɔdubɔbla ogya akpala bɔkyula ƒui ute-mi na uyɔ ɔmmɔ ɔnyi ƒɛƒɛɛ ɔyɔ-mi kaƒɔ.

¹⁰ “ ‘Na si koƒonu iye ese lɛnɔ na ɔdi ɔ́ƒuna na nwuna bebuo akɔ ka uti ɔbla akpala bɔkyula ƒui ɔdi ɔmmɔ lɛnɔ ni, ɔlɛka ɔbla ebuo ɔgyani ɔni na use sɛɛn na útasɔ kesii kadi.

¹¹ Na badubɔdu ebuo ɔmmɔ na lɛkpabi lɛmmɔ katɔ kakɛ na Unwoti anumi. Na Aaron bebi, bakpane bammɔ badubuti ubugya ɔmmɔ na bakuna bewi lɛkpabi lɛmmɔ lɛlɔ bamana.

¹² Badubo-ni bukulo wɛlɛ wɛlɛ na ɔkpane ɔmmɔ ɔtɛ lɛna lɛmmɔ ɔsia ogya ku ekyweni ani nsia lɛkpabi lɛlɔ mmɔ lɛlɔ ku nwuna lili ku lɛmwi ƒui.

¹³ Na agyobi ku kaƒɔ ala ammɔ ni, ɔdubuti-nya ɔkya ntu kemmo na ɔƒɔ kaduɛ. Na bakpane bammɔ beti ana ƒui basia ogya na akywi. Na ɔmmɔ ɔdubɔbla ogya akpala bɔkyula ƒui ute-mi na uyɔ ɔmmɔ ɔnyi ƒɛƒɛɛ ɔyɔ-mi kaƒɔ.

¹⁴ “ ‘Na si baasɛ na ɔdi úti ubabla bɔkyula ɔdi ɔmmɔ ni, na ɔdi ka ɔƒuna-ma na babloduma iye bamangbɛ akɔ.

¹⁵ Na ɔkpane ɔmmɔ ɔdubuti-nwu uboku lɛkpabi lɛmmɔ kudɔ, na ulii-nwu limɔ ukulo na uti lili lɛmmɔ ɔkya ogya ɔkyula na lɛkpabi lɛmmɔ lɛlɔ, na ɔya na lɛna lɛkladi ubugya ɔ́yu uwi lɛkpabi lɛmmɔ amadɔ.

¹⁶ Na udie ala ani nkya nwuna lɛkoolobi koƒo na ɔgya-nwu uwi lɛkpabi lɛmmɔ ɔƒɛ katukɔ kakɛ kesii kani na beedie ogya ntɔ bɔmmɔ teewi.

¹⁷ Na ɔda-nwu avwi na ɔni-nwu kemmo ɔbwɛ, nsu utamamiku lɛlɔ, na uti-nwu ɔsia ogya ku ekyweni ammɔ lɛlɔ na ɔkywi. Na ɔmmɔ ɔdubɔbla ogya akpala bɔkyula ƒui ute-mi na uyɔ ɔmmɔ ɔnyi ƒɛƒɛɛ ɔyɔ-mi kaƒɔ.’