Lɛnu Ƒui Ɔnu 3 - Katɔti Ɔku Kedee

¹ Uwi ɔni na bɔtɛ usien ni, lísienku kɔnu nnii muutúku mina ɔyɔne ɔni na mɔɔyɔ́ ku mina kayi ku kɔyu ƒui. Nsu ɔɔɔtɛ, anwuɔsu líbo kɔnu lɛ́nɔ na ńtanu-nwu.

² Anwuɔsu lɛ́ta ńtávi ɔma kemmo lɛ́wia-nwu na lɛblɔnu ƒui lɛlɔ, nsu ńtanu-nwu.

³ Líye bagyumane bani nkɛ mɔɔkɔ́ taayu na ɔma ɔmmɔ kemmo muedi nnini, “Bɛ́nu ukyuli ɔni na mɔɔyɔ́ ku mina kayi ku kɔyu ƒui mmɔ?”

⁴ Nsu mina mmɔ bɔgyu ku tagyu kani na lɛ́nu-nwu na lɛ́tu lɛ́da-nwu, na ńtanyonu-nwu úti útédu uwi ɔni na lɛ́kpanku-nwu lísienku mina uni kaduli, na búduo ɔtɔ ɔni kemmo na báwɔ-mi.

⁵ Yerusalem begblebi, muubó-mii ɔda ɔkɛnku bakwa ku bete ɔyikun lɛlɔ, na bise-mi kenye ka bɛɛɛdubo busie butágyila tɔ bɔyɔ wetédu ka uwi údu ka ulu ɔ́lɛmi úte bɔyɔ bɔmmɔ alati.

⁶ Ukyuli ɔmani na bɔɔnu ka ɔ́si kalɔ kakwiidi lɛlɔ ɔdubo mɛni aani liƒlukutu uyɔ ɔdi udu? Uyɔ ɔmmɔ ɔdanku nard ugyulo ku oloƒui ku kutu akyala ƒɛƒɛɛ ɔnyi.

⁷ Bɛnu! Salomo na ɔdi na badanku badububoku na uli nwuna lɛgaboku lɛlɔ, na Israelƒuɔ bekpone benengudi ƒui liti ku leevu báka bámana-nwu.

⁸ Kewii kama ɔdi biala ligu. Na badi bekyuli bani na kekpo káma-ma enu ɔni na usien muedi benye kagyumana bete lɛla biala.

⁹ Lebanon egyii na béti bánwi lɛga boku lɛmmɔ.

¹⁰ Liboku lɛmmɔ lɛgba lɛdi sika ɔƒualadi na nina kama kekpokɔ kadi sika ugyiedi. Na liboku lɛmmɔ alati egu keliekɔ geen ni, kɔdi kugyiedi kɔni náƒɔ kuye geen na béti bébi keliekɔ kammɔ. Na kalɛ na ayu eduo liboku lɛmmɔ kemmo alati na elie kalɔ ni, Yerusalemƒuɔ beleku bése béwi lɛlɔ buɛɛ geen bákya-ni bɔdia.

¹¹ Bɛlɛ bibo amii Sion belekubi na bibanu kagabwa kani na Salomo uni úte-nwu na nwuna uleku buti limeyi bɔdi lɛlɔ.