Lɛnu Ƒui Ɔnu 2 - Katɔti Ɔku Kedee

¹ Buse na mina ligblebi lise aani eveteli ku anwula gyie gyie ani nálɛ enye sɛsɛɛ na Saron kalɔ lɛlɔ, na nsɔ nse aani eveteli ku anwula ƒuala ƒuala na ɔkwalɛ ɔdi kemmo.

² Ɔbuni, si banii beti-ɔ bakɔku begblebi bamba ni, ese aani eveteli ku anwula ƒuala ƒuala ani nédie lɛlɔ sɛsɛɛ na liyu alakpi akɔ.

³ Na awɔ ni, mina Ɔyɔne, lɛni na álɛ salalaa aani kɔdingyii na lɛku kemmo egyii akɔ si béti-ɔ bákɔku banana bamba. Na ƒula ɔyuli ɔni na ákya-mi ɔ́ya na lɛ́nwuna buɛɛ. Na ƒula ebi ani na éte-mi na lɛ́di áyu-mi emini geen.

⁴ Átɔnku-mi éduoku ƒula ɔtɔ bonwu ɔni kemmo na aadi ƒula limeyi bɔdi adila. Na mmɔ nédie ƒula bɔyɔ átina-mi.

⁵ Te-mi ƒula egyiibi buni lidu lidu lɛmmɔ na asɔku-mi abla ɔwɔdi na lɛkɛ ɔyikun ɔwɔdi, ɔsika ƒula bɔyɔ kɔka kɔɔda-mi na lɛ́bla kpɛtɛ kpɛtɛ.

⁶ Ti ƒula kɔmiinu kɔnu kya-mi lili kalɔ na eti ƒula kɔdianu kɔnu abala-mi kayi.

⁷ Yerusalem begblebi, muubó-mii ɔda ɔkɛnku bakwa ku bete ɔyikun lɛlɔ, na bise-mi kenye ka bɛɛɛdubo busie butágyila tɔ bɔyɔ wetédu ka uwi údu ka ulu ɔ́lɛmi úte bɔyɔ bɔmmɔ alati.

⁸ Muunú mina ɔyɔne kɔku ka ɔ́si ɔdubo na ɔkɛ ɔɔba agyu taavia abi ku abinkpo.

⁹ Ɔkɛ aani akwa iye kete ɔdubo. Na ɔƒaani ni, unye kowodu kama na ɔɔnu taavinku ƒansili.

¹⁰ Na ɔɔtɛmiku-mi ɔnini, “Ɔbuni, ta na asiaku-mi.

¹¹ Nu, ɔƒɛƒɛɛ ku ɔnantu uwi ɔ́ɔvi,

¹² na egyii anwula lidu áƒɔ kayawi ƒui, na ɔdi lɛlɔyɔ uwi ute ala ƒui ku lɛnu budie. Na beenú bamangbɛ kudu bɔbla na aku kemmo.

¹³ Anwingyie eesé kalɔ ku bɔnwu na egyiibi anwula ɔnyi ɔmmɔ ɔɔƒɔ́ kayaa ƒui aani ugyulo ƒɛƒɛɛ. Ɔbuni, mɔɔyɔ́-ɔ geen! Anwuɔsu ya na bula inyɔ bɔtɔlɔ.”

¹⁴ Ese ete-mi aani mina lɛmangbɛ lɛni nábɛla lɛlɔ ɔkya atabi ubu kemmo na lɛtakpɛ bonwu lɛni nƒa kemmo. Nwini na aya na lɛsɔ lɛnu ƒula bɔdia! Na aya na linu ƒula lɛdi mini mini lɛmmɔ.

¹⁵ Bula adingyii ebi kemo kani na búse éwi anwula, anwuɔsu ɔlɛka buƒie beƒukutu bani nkya muubile kemo kammɔ edula.

¹⁶ Mina Ɔyɔne, awɔ ɔni mɔɔnyuɛ ƒula baƒonu na eveteli ani nédie anwula akɔ, awɔ mbo-mi na ami lɛnɔ mbo-ɔ.

¹⁷ Bla lɛlɔ aani akwa ɔkɔdi ɔni nnye abi lɛlɔ ɔɔƒulu ku lɛlɔyɔ úti útédu uwi ɔni na kadi kadubugye na ala ɔyuli ɔ́yii ɔkya.