Lɛnu Ƒui Ɔnu 1 - Katɔti Ɔku Kedee

Ɔnu Ute Ɔyɔne

¹ Salomo lɛnu ƒui ɔnu ɔni na ɔ́nwi na bɔdubo bunu mɛni.

² Bo na abakya-mi kɔgbu na ada-mi amana lɛlɔ. Ɔsika ƒula bɔyɔ bɔɔyɔ́ kayi teetulo ntɛ.

³ Ebo ɔnyi ƒɛƒɛɛ ɔdi ɔni na si línu ka ɔdi ɔ́kpali-ɔ lɛnyi ni, na ɔnyi ɔmmɔ kani na muunú. Na unyeƒi ɔdi uuubo-nwu kemmo ka ɔmmɔ ɔsu geen na begblebi ƒui baayɔ́-ɔ!

⁴ Kpanku-mi da na bɔtɔlɔ pla! Na awɔ ɔga eti-mi eduoku ƒula kɔtɔma. Lɛlɔ lɛɛyɔ́-bu na ƒula lɛlɔ. Na kalɛ na aayɔ́ bekyuli ubo emini utulo ntɛ mini mini. Ɔdia geen ka bemwi-ɔ.

⁵ Yerusalem beleku, ɔlɔgyii otondi na ɔdi-mi, nsu mɔɔdia bɔnu geen. Na nse aani kevo kani na bátu bényene Kedar ketele kalɔ kakwiidi kemmo iye Salomo kayakun aduni abuni ammɔ adi.

⁶ Bitanu-mi ɔnusɛ bɛnii lɛ́sɔ ka ɔƒɛ ɔ́ya na mina ɔlɔgyii ɔdi otondi ɔsu. Mina benibi bananabi béti kɔnyi bákya-mi na báya na mɔɔbla kabla na adingyii kemo na lídie mina ɔlɔna atu na nsɔ lɛɛɛdaku-nwu lɛda.

⁷ Ɔyɔne, su-mi kesii kani na adubuti ƒula bebuo esienku na batádi ku kesii kani na badubɔtɛ banwuna ɔƒiiwi.

⁸ Beleku babuni ƒui ɔbuni, bɔsu na ada anii aaagyi kesii kammɔ? Amu ni, Ɔyɔne, siaku baƒonu bammɔ agyobi kanyakɔ na etiku ƒula bese na batádi na baƒonu badane nvo anumi.

⁹ Aanya kalɔ ligblebi kemmo aani ɔpɔnkɔ ɔni mɔɔní Ɔga Ƒarao kɛɛkɛ.

¹⁰ Asɛɛ ebi ani nkya-a atu ku kɔsɛɛ kɔni na akya ɔkwɛ áya na ƒula litugya liikeye na aadia bɔnu geen.

¹¹ Nsu bɔdubɔvɔ sika ugyiedi asɛɛ ebi ani na akya atu bute-ɔ na bɔkya-nwu bɔdia ku sika ɔƒualadi.

¹² Mina ɔga, uwi ɔni na elie kadikɔ na ƒula liboku kemmo ni, mina ugyulo ƒɛƒɛɛ ɔmmɔ ɔnyi ɔ́ƒɔ ntɛ mmɔ ƒui.

¹³ Mina ɔyɔne use ute-mi aani ugyulo ɔni baalɔ nard ɔsii na ɔtɛ-mi anyii lɛlɔ.

¹⁴ Na úlieku egyii anwula abuni ani muudie ɔnyi ƒɛƒɛɛ taasiku egyiibi kemo na kesii kani baalɔ En-Gedi.

¹⁵ Ɔbuni, ése álɛ ligblebi na aadia bɔnu geen. Na ƒula anumi eekeyi aani lɛmangbɛ.

¹⁶ Ɔyɔne, lɛni na álɛ lɛkloƒu geen ɔni na balásu. Livo lɛwɔdi lɛni mɔɔlɛ́ wɔwɔɔwɔ, mmɔ ndubɔbla bula katɛnkɔ si búti lɛlɔ.

¹⁷ Kesii kani na bɔkya ni, egyii enengudi ani nnye mmɔ ákya ɔyuli.