Kɔnyana Buwulo 5 - Katɔti Ɔku Kedee

Yerusalemƒuɔ Bákpali Unwoti Bévele Kɔnyana Bɔnu

¹ O bula Unwoti, tayiƒala bula lɛbibo ku kalɛ na béwi-bu anumi kalɔ.

² Baƒɔ bébeti-bu kɔlɔ ku bula kɔduli bénwini bana ɔdi.

³ Na búnwini aani bekpinebi, na bula beni bénwini bekpinele.

⁴ Na ntu bɔni na bɔni ku ekyweni ani na bɔsala ɔgya muedi áƒɔ kuye geen ɔni ntulo bɔsu.

⁵ Na baabla-bu kalala taasia kama ɔni na bula ɔyikun ɔ́sa, na buuubo bɔnwuna bɔdi.

⁶ Ɔlɛka bɔkya lili kalɔ na bɔblaku Egyipteƒuɔ ku Asiriaƒuɔ unwi asa na bɔkɛ lɛla lɛni na bɔdi na kɔka ɔsu.

⁷ Bula bati bene nábla likpidi na ama béekpi, nsu abu nnye mɔɔƒɔ bana ekpidi ammɔ kayu.

⁸ Na bekyuli bani mɔɔbla bula bekisine kabla mmomu mɔɔdi-bu lɛlɔ ɔƒaani, na ukyuli ɔdi uuubo na ɔƒɔ-bu na bɔkɛ bɔnwuna.

⁹ Bɔkya ɔgbankpi kemmo na balalane bani nkya kalɔ kakwiidi kemmo mmɔ ɔsu. Na kalɛ na busie butáƒɛ bula edula buboku ɔma muedi litemi lɛdi na bana lɛkɔkɔ.

¹⁰ Kɔka ku lɛlɔ ogya bɔƒɔ bɔ́ya na bula ɔlɔna ɔ́ta ɔ́bla aani kalɛ na lɛla lɛdi liikeyi ogya.

¹¹ Bekisine bekpone bammɔ béƒie-bu beleku ku begblebi báyɔ na Yerusalem ku Yuda lɛma lɛmmɔ kemmo ƒui.

¹² Béƒie bula batɔnkune bényimi, na bábla bula benengu kɔƒa ala na kadi anumi.

¹³ Na bénye bakloƒu lɛlɔ na baabla-ma kabla. Na bananabi bammɔ beeti egyuku bonwu bonwu.

¹⁴ Na básɔ bétete kuƒi na bula litemi batɛne basu litemi lɛdi litemi katɛkɔ. Na bakloƒu basɔ beeebo kuƒi na bataagya agyala adi teedie lɛnu.

¹⁵ Kɔnyana kɔ́ƒɔ-bu kayi kemmo ƒui. Na ɔni na buteedie lɛnu taatɔ ni, kɔnyana mmomu na bulie buuwulo.

¹⁶ Yerusalem ɔ́yila nwuna bukeye! Na abu ɔdi ɔ́sa, na bɔ́yii udu na bula ekpidi ɔsu.

¹⁷ Búnwini aani balɛne bɔkɛ na bɔsɔ bulánu ligeen muedi.

¹⁸ Bula ɔma ɔ́bwɛ na lɛku kemmo begidi sɔɔn náƒɔ-nwu kemmo beli.

¹⁹ Awɔ Unwoti kani ndubo lɛlɔ bɔdi úsela uwi ƒui! Awɔ ndi Ɔga uwi ƒui.

²⁰ Bi ɔsu na áyiƒala-bu uwi gyɔlɔɔ lɛni?

²¹ Sɔku-bu boku ƒula kudɔ! Na aya na lɛla biala lɛsɔ lise kalɔ ɔwɔdi.

²² Munuu, buni na éni-bu ƒui lɛni na asɔ aláwia-bu ka bubo-ɔ kudɔ?