Kɔnyana Buwulo 3 - Katɔti Ɔku Kedee

Lɛnunsia Lɛdi Líbu

¹ Ɔkɛnku kɔnyi kɔni na Katɔti úti ɔsu, líbo abi geen.

² Na ɔ́bɔku-mi útákya kesii kani na bukeye bɔdi bulakana buduo.

³ Na limeyi ndi limeyi ni, ami lɛti kani na unye ɔɔní kɔtu taasia kama.

⁴ Katɔti ɔ́ya na mina ɔlɔna ɔ́yii udu, na mina ekubi ese aani bɔbwɛ na ada kɔkɛ kɔkɛ.

⁵ Ɔ́ta únye-mi lɛlɔ, na ɔ́ya na ɔgbankpi ku lɛbibo lɛ́ka lɛ́mana-mi.

⁶ Ɔ́ya na lɛ́sɔ nli kasuudikɔ mmɔ aani ukyuli ɔni na úkpi kukuuku ƒui.

⁷ Katɔti ɔ́gyi ɔban ɔ́kya-mi ɔni na naaakana bɔkɔ bɔvia-nwu, na úbo-mi kɔgba úse liku linwi.

⁸ Na ina uwi ɔni na mɔɔva taakpali-nwu nnii ubunku-mi muedi ni, úni na útakpete-mi.

⁹ Katɔti úti atakpɛ bonwu bonwu ɔ́bala-mi ulu lɛlɔ, na mina kasiakɔ kábla gontii.

¹⁰ Na ɔɔtú-mi aani kalɛ na gyata uubi ulu lɛlɔ taatu ebuo ɔni na uƒie.

¹¹ Na ɔ́tu úbada-mi, na ɔ́ni-mi ɔtɔlɔku ulu lɛlɔ útáduli-mi kɔkɛ kɔkɛ.

¹² Katɔti ɔ́nu mina ligeen, na úbo nwuna atula úbalɛ-mi,

¹³ na áƒuaala-mi kayi álɛ.

¹⁴ Lɛ́ta línwini lɛƒiankula líte ukyuli biala, na baláda-mi lɛlɔ lɛma bɔkya taaya.

¹⁵ Katɔti ɔ́ya na mina ngba búnwini ɔdu ɔdu búte-mi.

¹⁶ Ɔ́bla aani si ɔtumu lɛ́kpi nkɛ, na atabi na úte-mi ɔnii ntaanwanta na ɔƒɛ-mi anyi.

¹⁷ Liiibo bɔnwuna bɔdi na mina lɛlɔ kemmo na nsɔ neeenyimo ebiti adi lɛnɔ.

¹⁸ Anwuɔsu lɛ́su mina lɛlɔ nnini, “Ɔƒaamu ami ɔdi ɔ́sa! Nsɔ lɛɛɛdubo ulu bɔnu nnii Unwoti ɔdubɔbla lɛla lɛdi ute-mi.”

¹⁹ Na si nnye mɔɔbla kasusu taasiku mina lɛbibo ku kalɛ na ami lɛti nkɛ mɔɔka taamana ni, ɔɔyá na mina lɛlɔ lɛɛbla-mi kɔnyana geen.

²⁰ Ɔmmɔ lɛlɔ kani na mina kasusu kasia uwi ndi uwi na ɔɔyá na kayi kaakpulu-mi geen.

²¹ Nsu muunyimo lɛla linwi lɛni mɔɔyá na nsɔ mɔɔkɛ́ kayi.

²² Unwoti uleni lɛƒɔndia bɔbla kudii! Ɔsika si ɔɔɔdi nwuna kɔnyana kɔni na ɔ́nu-bu ɔsu ni, nka bɔ́yii ku udu.

²³ Unwoti ɔdi ukyuli ɔni lɛlɔ na basia anu ka ɔdubɔnu-bu kɔnyana ɔtanta biala.

²⁴ Na mina kayi ɔkwalɛ kemmo ƒui ni, mɔɔsu lɛlɔ geen nnini, “Unwoti kani ndi ukyuli ɔni mɔɔwia. Na nwuna lɛlɔ kani na ndubukpo kama!”

²⁵ Ukyuli biala ɔni néti nwuna anu ɔ́sia Unwoti lɛlɔ na uunú-nwu litemi ni, Unwoti ɔɔbla-nwu lɛƒɔndia.

²⁶ Ɔdia geen ka bɔkɛ kayi na bunye butaanu Unwoti anumi na udie-bu.

²⁷ Ɔdia ka bɔbla kagyoklo kaduɛ uwi ɔni na bɔ́si bɔɔkɔ́.

²⁸ Na si etila ammɔ aayu-bu unu muedi ni, na budie lɛlɔ lɛti, na bɔsɔ bulie kpoo butaabla lɛla lɛmmɔ kasusu si lɛni na Unwoti ɔ́tuna ka ubo-bu lɛlɔ.

²⁹ Si éboku lɛlɔ kalɔ buɛɛ ni, adubɔkɛ lɛla lɛni na asia anu.

³⁰ Lɛni kani na adubɔtɛya ala si bekyuli beedumi-ɔ na bana ebola éduo-ɔ lɛlɔ.

³¹ Unwoti ɔɔɔdubo-bu buni uwi ƒui!

³² Ɔɔyá na buubó abi geen, nsu lɛni kani na ɔɔnu kɔnyana, ɔsika ubo bɔyɔ ute-bu uwi ndi uwi.

³³ Lɛlɔ lilayɔ Unwoti ka ɔya na buteebo abi na buteenu ɔlɛ lɛnɔ.

³⁴ Bɛsɔ bitataakɔ taanya batɔntɛne eli teesusu.

³⁵ Na bitebulo ukyuli kuƒi bute ka ɔbla ala ulu lɛlɔ. Katɔti Ɔyikune Ƒui ɔɔnu lɛla biala.

³⁶ Na ɔgyi uwi ɔni na ɔdi úni ka ɔtɛ ukyuli ɔbambadi litemi siin.

³⁷ Ukyuli ɔdi ulakana lɛla lɛdi bɔbla si Unwoti útete-nwu kuƒi kɔmmɔ.

³⁸ Lɛbuni lɛdi o-o likpidi lɛdi o-o ni, Katɔti Ɔyikune Ƒui muudie lɛdi asa na uubo-nwu kemmo lɛni.

³⁹ Ka bɔmu bulie ngba ɔsu ni, utalɛ ka buteeni lɛla lɛdi si báni-bu kɔtu na bula ekpidi ɔsu.

⁴⁰ Mmomu ɔlɛka bɔsia anu kalɛ na bɔti ngba bulie bɔmmɔ, na bunwini bubo Unwoti kudɔ.

⁴¹ Na si bɔ́kɔliku enu katɔ bɔɔkpali Katɔti ni, ɔlɛka buti bula kayi lɛnɔ bute-nwu na bɔsu bɔnini,

⁴² “Bɔ́bla alaekpidi bɔ́ƒiɔ, na bɔ́ta búnye-ɔ lɛlɔ, na éteti tɔ átakyiɛ-bu!

⁴³ “Kɔnyi kɔ́ƒɔ-ɔ lɛlɔ kemmo ƒui na asiaku-bu aadú-bu ɔni na kɔnyana bɔnu bɔdi buuubo.

⁴⁴ Ábɛla lɛlɔ ákya liƒlukutu lɛdi kama, na liitile ulu ka bula bɔkpali budu-ɔ kudɔ.

⁴⁵ Áya na kadi bamba bekyuli bada-bu beebó teewi aani kebu alakpi.

⁴⁶ “Na bula bekisine beewida-bu.

⁴⁷ Bákywɛ-bu kɔkpagyuɛ na liƒu bonwu kemmo kani na bulie, na báka-bu bákya beesusu, na bayila-bu udu.”

⁴⁸ Báyila mina bekyuli udu! Na imii sɔɔn nda-mi anumi.

⁴⁹ Na balada baláya lɛnɔ úti útédu

⁵⁰ uwi ɔni na Unwoti únwini ɔ́nu-bu ɔ́siku katɔ mmɔ na úbunku-bu.

⁵¹ Ɔtɔtɔ ukpidi ɔɔgyú-mi si lɛ́nu ala ani udu na bekisine bábla bula ɔma unengudi ɔmmɔ begblebi.

⁵² Ńtabla lɛla lɛni na ukyuli ɔdi ɔsu ɔnii anwuɔsu na ɔlɛka ukisi-mi. Nsu basiaku-mi baabwi-mi aani aasɛ ka badu-mi.

⁵³ Na baawia lɛnɔ ka bedi-mi bakya libiɔ kemmo na bebo-mi atabi na likpi.

⁵⁴ Ntu búyi bɔ́via-mi lili, na lɛ́bu nnii mina kawɔlɔkɔ na kadi mmɔ.

⁵⁵ Nsu ubu kemmo mmɔ nkya na lɛ́kpali awɔ mina Unwoti.

⁵⁶ Lívele-ɔ nnii enu-mi bɔkpali na ebunku-mi ku kɔvanu na lɛ́su nnini, “Bunku-mi! Ƒɔ-mi!” Na énu éte-mi sɔsɔ.

⁵⁷ Ébo uwi ɔni geen lɛlɔ na mɔɔwia-a kebunku, na ásu-mi anini, “Da bɔyia ya!”

⁵⁸ Édie-mi na áƒɔ-mi ngba.

⁵⁹ Unwoti, ánu ala ani udu na mina bekisine bábla-mi, anwuɔsu tɛ litemi lɛmmɔ na edie lɛla biala atina siin.

⁶⁰ Agyi likpidi lɛni lili na bása na mina lɛlɔ.

⁶¹ Sɔsɔ na ɔdi ka agyi kalɛ na beedumi-mi ku kɔkwɛ kukpidi kɔni na baakya-mi lɛlɔ.

⁶² Baatɛmiku lɛlɔ kabɛnsɛ, na bada kenye etemila beekpóku-mi limeyi limodi.

⁶³ Bebo uwi ina bi kabla lɛlɔ na benye ka bedumi na bataakya-mi lɛlɔ lɛma.

⁶⁴ Unwoti, ƒɔ-ma lɛla biala na bábla-mi kayu!

⁶⁵ Ya na ƒula ewida asiaku-ma na aya na bebo abi geen.

⁶⁶ Bɔku-ma die kalɔ kammɔ ƒui lɛlɔ kede kede na ƒula kɔnyi kemmo útédu ka basɔ balanu bana ɔdi.