Hosea 9 - Katɔti Ɔku Kedee

Katɔti Ɔdubɔni Israelƒuɔ Kɔtu

¹ Israelƒuɔ, lɛlɔ litayɔ-ɔ munu munu! Na tebimi lɛlɔ aani kalɛ na kadi bamba bekyuli baadi bana emeyi kalɛ, ɔsika ádi lɛyalɛ ágya na álɛ ƒula Unwoti Katɔti kama. Na akɛ eebi taata na kesii biala na beewiile edula, na aaƒɔ́ lɛla lɛdi biala na bɛ́di kuye ka bete-ɔ.

² Nsu binyimo ka kamu ku antabi ammɔ adubo abasa na ntɛ bɔmmɔ lɛnɔ bɔsa.

³ Na bɛdubo bɔtɔlɔ na Unwoti kalɔ kammɔ lɛlɔ. Na bina badi badubo bɔtɔlɔ busie Egyipte kalɔ lɛlɔ, na badi lɛnɔ besie Asiria kalɔ lɛlɔ na bitádi bana adila ani muusié lɛlɔ mmɔ.

⁴ Bɛɛɛdubo bɔkana ntɛ kalɔ buwi bɔbla akpala adi bute Unwoti na mmɔ. Na bina akpala adi lɛnɔ aaadubo-nwu kubiti bɔda, ɔsika adubo lɛlɔ buteese aani kekwa kalɔ akpala adila. Na aaadubo bɔni bude Unwoti kakpakɔ munu munu, mmomu ama alati adi na adi.

⁵ Na bi na adubɔsɔ akana bɔbla lɛnɔ na Unwoti emeyi buni bɔdi lɛlɔ si uwi údu ka asɔ alakana-nya bɔdi?

⁶ Na si ina badi bákana ɔgbankpi ɔmmɔ bukeli ni, Egyipte na badubusie batáwɔlɔ, na bava-ma na Memƒis ɔma unengudi kemmo. Na bina sika ɔƒualadi akɛla ƒui adubɔyii akya liyu alakpi akɔ na livo lɛkwɛ lɛƒɔ ekpo ani ƒui na bina nvo búnye ƒui.

⁷ Israelƒuɔ, bina kɔtu bɔni uwi údu ka bɛƒɔ ala ani ƒui na bɛ́bla kayu na amii alati bɛdubɔnu bɔti. Amii mɔɔsu bɛnii, “Katɔti kenye bediene bádɔlɔ na nwuna batu beekpi libuo.” Na bina ekpidi pii ani na bɛɛbla áya na bíti-mi bukisi geen.

⁸ Israelƒuɔ, ami na Katɔti úti úmene-mii aani nwuna kenye udiene ɔni mataanu-mii lɛlɔ, nsu bɛ́kywɛ-mi kɔkpagyuɛ na mina lilu ƒui lɛlɔ, na bɛdanku bina bukisi ku ulikplu ala bíbedu Katɔti kakpakɔ kemmo muedi.

⁹ Bibo kalala na ɔkɔ ala bɔbla bɔ́ƒɔ-mii lɛlɔ kemmo ƒui aani Gibea ɔma bekyuli. Nsu Unwoti anu asia bina ekpidi ƒui lɛlɔ na ɔdubo-mii kɔtu bɔni.

¹⁰ Unwoti ɔnini, “Bɔnu na lɛ́nu amii Israelƒuɔ lídie aani kɔdingyii ebi na kalɔ kakwiidi kadi kemmo, na lɛ́nu bina bati kuuku aani kɔnwingyie ebi edeedi ani náka bɔnwu. Nsu Baal-Peor baƒiɔ bani muusé lɛlɔ na bísie bɛɛkpá. Anwuɔsu na amii lɛnɔ biisé lɛlɔ aani baƒiɔ bani na bɛɛyɔ́ mmɔ kalɛ.

¹¹ “Ɔmmɔ ɔsu ni, amii Israelƒuɔ bɛdubo bina bukeye bɔyila aani kalɛ na aasɛ uuveyi taatɔlɔ kesii kadi. Na bina beleku basɔ baaadubo kaƒɔ bɔda na bawɔ.

¹² Na si ina bɛ́wɔ muedi ni, ndubɔkpanku-ma ƒui, na kebu amii lɛti. Bɛdubulie biteewulo kɔnyana uwi ɔni na línwini kama lɛ́kya-mii na ala ekpoku-mii na bɛyii udu ƒui kede kede.

¹³ Lɛ́nu-mii aani bekyuli bani nákɛ kenyekɔ kabuni na bɛdubɔlɛ lili, nsu amii alati nákpanku bina bebi bíselaku na badu.”

¹⁴ Unwoti, bi na ɔlɛka livele lite bekyuli bamɛni udu utulo ka aya na bana beleku bada kɔwɔ na basɔ belete bebiwɔ badi lɛnyii lɛnɔ?

¹⁵ Unwoti ɔnini, “Bana ulikplu ala ani na bábla na Gilgal na lɛ́nu ɔsu muukisi-ma geen. Na bana alaekpidi ɔsu ndubo-ma bɔbɔku budie mina kaduli na nsɔ lɛɛɛdubo-ma bɔyɔ, ɔsika bana batɔnkune bálɛ-mi kama.

¹⁶ Israel kadi bekyuli bese aani kugyii kɔni kuna ligyiitu lɛ́kwii na kuna kɔgba kɔsɔ kulákana ebi bɔnwu. Na si ina bɛ́sɔ bɛ́wɔ bebi na bɛɛyɔ́-ma dɛ muedi ni, ndubo-ma bɔdu ƒui.”

¹⁷ Israel ka étenu Katɔti litemi ɔsu ni, ɔdubo-ɔ buni na akɛ ataavi na kadi bekyuli ƒui akɔ.