Hosea 6 - Katɔti Ɔku Kedee

Israelƒuɔ Ɔkɔ Kayi Bunwini

¹ Ɔmmɔ kama ni, Israel kadi bekyuli bammɔ básu banini, “Bɛya na bɔsɔ bunwini busie Unwoti Katɔti kudɔ. Anwu nébo-bu ɔ́kya ɔlɛ, nsu anwu kani ndubo-bu bɔbwi. Ɔ́ya na bɔ́ƒɔ lɛlɛ, nsu ɔdubo-ni bunyimi bute-bu na likpi ƒui.

² Ɔdubo bɔya na bɔsɔ bɔta na abu ku-nwu bɔsɔ bulie bɔsala na emeyi anyɔ ku atɛ kama.

³ Anwuɔsu bɛya na bɔkya ɔkplu biala na bɔnu bula Unwoti bɔti. Nwuna bɔda bɔlɛ bɔdi litemi geen aani kalɛ na ɔƒɛ ɔɔtu ɔtanta na ɔkɔ uuubo-nwu kemmo. Na ɔdubo ubaya na lɛlɔ lɛyɔ-bu aani kalɛ na ketudi ɔnantu ɔɔna na kalɔ ku lɛla biala lɛɛyɔ́ buɛɛ.”

⁴ Unwoti ɔnini, “Amii Israelƒuɔ ku Yudaƒuɔ, bi na bɛnii mblaku-mii? Bina bɔyɔ bɔni na bibo bite-mi ni, buse kani buse aani ulɔyɔ iye ɔtanta amii ani mɔɔyii taakya si ɔƒɛ ɔ́tu na kadi kaata.

⁵ Ɔmmɔ ɔsu na lɛ́ya na mina kenye bediene béti litemi lɛni muukúlo kayi aani kewii béboku-mii na litemi bɔtɛ bɔni náƒɔ ogya aani ɔƒɛ bɔsia-nwu kama ku kɔtɔ bɔdu.

⁶ Kɔnyana bɔnu na mɔɔwia, na ɔɔɔdi bebuo buti taakpa. Na bekyuli banu-mi bati utulo bebuo buti taakpa.

⁷ “Nsu aani Adam ni, bíbile mina bunyimi bɔni na línyimiku-mii. Na bítadi mina litemi lɛlɔ.

⁸ Na Gilead kalɔ kemmo ni, alaekpidi bonwu bablane ku bekyuli badune báƒɔ-ka tɛtɛɛtɛ. Na bekyuli bani na bɛ́du mmɔ ubugya ɔ́ƒɔ-mii enu ƒui.

⁹ Bina bakpane bénwini beyune kasala na batɛ kuludɔ baatú bekyuli. Bádu bekyuli na Sekem ulu lɛlɔ na baabla alaekpidi lidu bamba lɛnɔ.

¹⁰ “Lɛ́nu lɛla likpidi lɛdi geen na Israel kalɔ lɛlɔ ka bɛ́lɛ-mi kama bɛsiaku ala bamba bɛɛkpá-nya na biisé lɛlɔ. Anwuɔsu na bítamanku ka bɛkpa-mi.

¹¹ “Na amii Yudaƒuɔ lɛnɔ ni, bina limeyi lɛsia ulu lɛdubo ɔni na ndubo-mii kɔtu bɔni. Na mɔɔwia ka lɛsɔku mina kadi bekyuli Israelƒuɔ mbenyene bana kenyekɔ.”