Hosea 4 - Katɔti Ɔku Kedee

Katɔti Ɔ́du Israelƒuɔ Kɔtɔ

¹ Bise atu na binu kɔtɔ kɔni na Unwoti Katɔti ɔɔdú amii Israel kadi bekyuli ƒui! Unwoti uudie bina ƒui bɔƒiɔ na kalɔ kammɔ lɛlɔ ka ɔdi uládi-nwu litemi lɛlɔ siin na bɛɛɛdaku-nwu lɛda lɛnɔ.

² Lɛlɔ buwida ku ɔkɔ bɔnyi ku bekyuli bɔdu ku kuyu ku lɛsɔnɔdi lɛlɔ kani na binye uwi ndi uwi.

³ Ɔmmɔ ɔsu na bina kalɔ ƒui kénwini ketele kalɔ kakwiidi na káyii udu, na bekyuli ku bebuo ku baasɛ bani nkya-ka kemmo ƒui lɛnɔ beekpi.

⁴ “Nsu ni, bitadu ukyuli ndi ukyuli kɔtɔ, ɔsika ɔɔɔdi bana ƒui náƒiɔ. Amii bakpane bammɔ na mɔɔdú kɔtɔ.

⁵ Na amii ku kenye bediene bammɔ ƒui bɛdubo butaabla gyuma gyuma usien ku ɔƒɛ. Na ndubo bina beni udu bɔyila.

⁶ Amii bani na bɛdi bakpane bíni-mi, na mina bekyuli baayii udu ka béni mina ɔda bubo ɔsu. “Na ɔƒaani ni, ami lɛnɔ ndubo-mii buni na lɛyiƒala bina bebi ɔsika amii bɛ́yiƒala mina ɔda bubo.

⁷ Kalɛ na biimomo teebu ni, lɛni kani na bina alaekpidi lɛnɔ eemomo teebu. Na kenyekɔ ku ɔbu ɔni na bibo ni, bɛ́vumana-nwu bíte kɔƒa ala bɔbla.

⁸ Na likpidi lili buvele akpala ani na mina bekyuli baabla lɛlɔ na amii bɛɛsia teenwini balakɛne, anwuɔsu na bɛɛkya-ma ogya ka bataabla-nya teebu.

⁹ Na lɛlakpa linwi ndubɔlɛku bakpane ku bekyuli bammɔ ƒui, ɔsika ndubɔni bana ƒui kɔtu na bana ablala ɔsu, na lɛƒɔ-ma kayu kani námanku ala ani na bábla kenye.

¹⁰ “Badubo bɔdi bɔsia kama, nsu baaadubo bumo. Na basiaku lɛsɔnɔdi kama, nsu baaadubo bebi bɔwɔ na bemomo. Ɔsika béni Unwoti na basiaku ala bamba kama.

Katɔti Ukisi Na Úni Lɛƒiɔkpa

¹¹ “Ntɛ bɔnani ku bɔwɔdi bɔ́ya na mina bekyuli kasusu kékpi-ma na basɔ belenu lɛla lɛdi kalɔ!

¹² Na bakɛ beebó like na egyiiku kudɔ ka bati lɛla lɛni na babla! Na egyiiku ammɔ lɛnɔ aasu-ma lɛla lɛni na baawia bati! Bányonu-mi aani uleku ɔni nányonu ɔnana na únwini ɔyalɛ, na bakɛ basiaku ala bamba kama.

¹³ Bakɛ abi eli baabla akpala na beeti etela teesienku abi eli mmɔ na egyii enengudi lidu ƒui kalɔ, kesii kani na ɔyuli ɔkya kaduɛ na ɔdia bulie na egyii ammɔ kɔgba ku evete ɔsu. Anwuɔsu na bina bebi belekubi bénwini bayalɛ, na bina bebi bele bénwini basɔnɔdine.

¹⁴ “Na lɛɛɛdubo-ma kɔtu bɔni na ɔmɛni ɔsu, ɔsika amii alati kakpakɔ bayalɛ bɔmmɔ kama na bɛsia, na amii ku-ma bɛɛsála taabla akpala teete baƒiɔ. Na ɔmmɔ geen na lɛsugba lɛmɛni lɛɛtina lɛnini, ‘Bɔyii na bekyuli bani na beeebo kasusu badubo bɔyii ku udu.’

¹⁵ “Israel, ina ka aadi kɔsɔnɔ ni, taya na Yuda ɔbla likpidi. “Na teduo Gilgal ɔma kemmo iye esie Bet Awen lɛnɔ na enye mmɔ ese kenye kadi na Unwoti ɔni nli ngba uwi ƒui lɛnyi kemmo!

¹⁶ Israelƒuɔ atu ebo ɔkplu aani ebuo ala utine ɔni mbo atuɔkplu na ulenu lɛla lɛdi kalɔ. Dɛ na Unwoti ɔdubɔkana bekyuli bamɛni adila buteete aani baƒonubi na kesii kani na livo lɛbuni lɛkya na bataakun?

¹⁷ Eƒraim kaba kemmo bekyuli bamɛni béti lɛlɔ bátámana lɛƒiɔkpa, anwuɔsu bɛnyonu bana keyi bite-ma!

¹⁸ Ntɛ banine badivone na badi. Na si báni-mu békpi báwɔlɔ lɛni ni, na bana lɛyalɛ ku lɛsɔnɔdi ala lɛɛkɔ́-ma katɔ. Na baayɔ́ kɔƒa ala ammɔ teetulo bana kenyekɔ ku ɔbu ɔni na nka ɔkya-ma lɛlɔ mmɔ.

¹⁹ Ɔƒɛƒɛɛ kpakplaa ɔni mɔɔkya ligede ɔdubo ubékpo na ɔkpala-ma ku bana akpala ƒui ɔtɔlɔku, na akpala ammɔ eti kɔƒa kuboku-ma lɛlɔ.”