Hiob 9 - Katɔti Ɔku Kedee

Hiob Údie Bildad Kenye

¹ Hiob údie Bildad litemi kenye ɔnini,

² “Sɔsɔ litemi na ásu ka ukyuli ɔyawine ɔdi ɔɔɔdubo bɔkana na use siin na Unwoti anumi kudii.

³ Si ina litemi na banii batɛ ni, ukyuli ɔyawine ulakana Unwoti litemi linwi kenye budie na etemila apim kemmo.

⁴ Nwuna lɛnunda kemmo kágyu, na nwuna ɔyikun uuubo bɔka. Ɔma náta únye Unwoti lɛlɔ dii na úse-nwu buɛɛ?

⁵ “Nwuna kɔnyi kulákada teese asa na ɔɔgyú abi enengudi ana kenyekɔ na ɔyila-nya udu.

⁶ Ɔɔkana na ɔkunku kalɔ kammɔ ƒui na kanyonu lɛlɔ útálɛ kana ɔka lɛlɔ muedi.

⁷ Na ɔɔbɔku ɔƒɛ na uledie nwuna bukeye, na ɔɔbala ayabi bukeye kenye.

⁸ Anwu lɛti nédie katɔ na úbimi-ka ɔ́ƒala kayaa, na ɔ́kɔliku nwuna ɔgba ɔ́nya ɛpu ɔni mɔɔnwanɛ lɛlɔ mmɔ lɛlɔ.

⁹ Anwu nédie ayabi esu esu ani nkya kayaa, ɔgbini ku akpewe, akɔkɔ ku bebi, ku esu esu ani násala na kada kakɛ.

¹⁰ Ukyuli ɔdi ɔɔɔdubo Unwoti ablala kalɔ bunu. Na ɔdi lɛnɔ ulakana nwuna akɔla budie taatina bɔka.

¹¹ Unwoti uusié taavi-mi kudɔ suɛlɛ suɛlɛ, na ɔɔtɔ-mi anumi nsu naaanu-nwu.

¹² Si úkpeli lɛla lɛdi ɔ́ƒɔ na ukyuli enu kemmo ni, ɔma ndubo bɔnwanɛku-nwu, iye uye-nwu ɔnii, ‘Bi na aabla?’

¹³ Si Unwoti údie nwuna kɔnyi keyi ni, ɔsɔ ulanu kama. Na Rahab ku nwuna batu muedi ƒui béboku bana eli kalɔ na báyu bátɛ-nwu lɛgba kalɔ.

¹⁴ “Na dɛ na ndubɔkana na lɛkyaku Unwoti unyeƒi. Bi na ndubo bɔkana bɔsu?

¹⁵ Ina ka ngyi ka ńtaƒiɔ ni, kɔtɔ kani na ɔlɛka likpi mina litemi ɔtɛne na ɔnu-mi kɔnyana.

¹⁶ Ina lɛ́lɔ-nwu katɛ na úbo litemi katɛkɔ mmɔ ni, Unwoti ɔɔɔdubo-mi litemi bunu.

¹⁷ Ɔƒɛƒɛɛ kpakplaa na ɔdubo bɔya na uteebo-mi taavinku. Na ɔya na lɛsɔ lɛƒɔ lɛlɛ lidu lɛsia lɛlɔ ƒui, ina ka ńtaƒiɔ-nwu.

¹⁸ Ɔɔɔdubo-mi bɔnwuna bɔdi bute, mmomu lɛbibo lɛdubɔƒɔ-mi ngba ƒui ku ɔdu.

¹⁹ Si banii nkpoku-nwu ku ɔyikun ni, ubo ɔyikun utulo-mi ƒui. Na si litemi bɔtɛ na bɔdi ni, ɔma ndubɔlɔ-nwu katɛ?

²⁰ Si ina ńtaƒiɔ ni, mina kenye etemila ndubo-mi budie bute na adu-mi kɔtɔ.

²¹ “Mɔɔnu ka lɛla lɛdi lɛɛɛda-mi, na lɛɛɛdaku-ni ku lɛla lɛni mɔɔlɛ́ku-mi, ɔsika mina ngba bumodi bɔmmɔ bɔ́bɔ-mi.

²² Kavumana kadi keeebo-nwu kemmo ka likpidi bablane o-o lɛbuni bablane o-o ni, Unwoti ɔdubo bana ƒui udu bɔyila.

²³ Si ɔgbankpi ɔdi úyu ukyuli ɔbuni ɔdi ɔ́tu na úkpi kɔnakunwi ni, bɔma kani na Unwoti ɔɔmá.

²⁴ Na Unwoti ɔmmɔ kani mɔɔyá na litemi batɛne baatɛ litemi likpidi. Na ɔɔyá na belikplune mmomu baaƒɔ́ lɛla biala teebo kayi na baadi lɛlɔ. Na si ɔɔɔdi anwu ni, na ɔma nábla ɔmɛni?

²⁵ “Usi kani na mina ngba bɔkɛ búsela, ɔni na ebiti ina blii suɛ eeebo-mu kemmo.

²⁶ Lɛni na bɔkɛ aani kalɛ na ntu buuti livete taatɔlɔku, iye aani kalɛ na kasangbii kaatu taayu teebeƒie lɛla lɛdi.

²⁷ Mɔɔkya ɔkplu nnii mɔɔyiƒala mina lɛbibo ku ɔlɛ bunu, na lɛda ala bɔka lɛya na ntaama.

²⁸ Nsu mina lɛbibo lɛɛkya-mi liƒu, ɔsika ngyi ka aaadubo-mi ubo bute.

²⁹ Na ka áadu-mi kɔtɔ kuuku ni, bi bukpo na nsɔ nteekpo lɛnɔ?

³⁰ Ina lɛ́kpi na lɛ́ƒɔ mina enu na eekeye dɛ ni,

³¹ adubo-mi buƒwimi butákya ubu ɔni kemmo na alakpi eesé lɛlɔ geen kemmo, ɔni na mina adala muedi aláyɔ ka asɔ ama-mi lɛlɔ.

³² “Unwoti ɔɔɔdi ukyuli mina kalɛ na busie litemi katɛkɔ na ami ku-nwu butáni lɛla lɛdi bunene.

³³ Na nka mɔɔwia ka ukyuli ɔdi uduo-bu ntɛ na ɔsia-bu kɔnu,

³⁴ na ɔƒɔ kegyiimi kani na ɔda uubó-mi, kalɛ na nwuna lɛlɔ liƒu lɛsɔ lilakya-mi kemmo.

³⁵ Mmɔ na nka lɛ́yɔ ka lɛsu-nwu lɛla lɛni na mɔɔyɔ́ ka naaayia-nwu ɔsu. Nsu kalɛ na use ɔƒaani ni, naaakana bɔbla.”