Hiob 5 - Katɔti Ɔku Kedee

¹ “Si aayɔ́ na akpali emene ɔƒaani na anu si ukyuli ɔdi ɔdubɔƒɔ ute-ɔ. Kayaa ɔyikune ɔmani na adubɔkpali ɔƒaani?

² Lɛnungyie ku kogyulo kɔnyi buti bɔɔdú ukyuli.

³ Lɛ́ɛnu dii kalɛ na badɔlɔdi beedie lidu, nsu si Unwoti úti kɔnyi ni, ɔɔgyú-ma teedie bana kenyekɔ kɔnakunwi.

⁴ Na nwuna bebi basɔ balákɛ ukyuli ɔni medie-ma kenye na litemi katɛkɔ.

⁵ Na edula kemo kani lɛnɔ na úsie ni, bekyuli bamba bani na kɔka kɔɔda ndubo bebeti-nya badi. Na bede-nya bedie kesii kani bene nábla liyu akɔ muedi ƒui.

⁶ Ɔgbankpi ulakwɛ taasi kalɔ kemmo aani livo. Na lɛbibo lɛnɔ liláta taalɛ ɔtumu akɔ aani ligyiitu.

⁷ Mmomu sɔsɔ na ɔdi ka bɔwɔ na báwɔ ukyuli ku lɛbibo aani kalɛ na ogya etenku adanku agyakpabi.

⁸ “Na si ami ndi awɔ ni, nka ndubunwini anumi lɛsia Unwoti lɛlɔ mmomu. Na lɛda mina litemi lɛva-nwu anumi.

⁹ Ɔsika ɔɔbla akɔla ala budie taatina ani kalɔ na bulakana bunu iye bɔti-nya bɔka muedi.

¹⁰ Ɔɔyá na ɔnantu ɔɔna na edula mmo bɔɔƒɔ́ ntu.

¹¹ Unwoti ɔɔtalaku bekyuli bani néboku lɛlɔ kalɔ katɔ na ɔɔyá lɛlɔ lɛɛyɔ́ bekyuli bani muuwulo kɔnyana.

¹² Na kɔkwɛ kukpidi kɔni na bekyuli baakya ƒui ni, uubile-ku kemmo.

¹³ Bana kayawi lɛnunda ƒui lɛɛwɔ́ ulu. Na bana ablala eenwíni kɔkpagyuɛ na kuudie-ma.

¹⁴ Na bakɛ ku kadi nwaa, nsu ɔƒɛ ɔɔsá taakya-ma. Na bakɛ beebó enu na ulu lɛlɔ aani si usien na ɔdi.

¹⁵ Unwoti uudie bani mɔɔyaki ala na belikplune kuwii kenye na ɔɔƒɔ́-ma taasiku belikplune bayikune bammɔ enu kemmo.

¹⁶ Anwuɔsu bawabane baakɛ́ lɛnunsia. Na etemila ani na balatɛ teete-ma ulu lɛlɔ siin kenye keekúlo.

¹⁷ “Lɛlɔ lɛdubɔyɔ ukyuli ɔni na Unwoti ɔɔní kɔtu na uleni nwuna bɔdɔnku, ka úti-nwu ɔɔsiaku ulu ɔbuni lɛlɔ ɔsu.

¹⁸ Ɔsika si ina ɔ́ya na ɔ́ƒɔ ɔlɛ ni, anwu kani ndubo-nwu bɔmana.

¹⁹ “Ɔdubudie-ɔ na ɔgbankpi biala kemmo ina dɛ na lɛɛlɛ́ku-ɔ taasia kama.

²⁰ Na si kɔka nébo o-o, iye kekpo kadi o-o ni, Unwoti ɔdubudie-ɔ na ɔna ƒui kemmo.

²¹ Na ɔdubudie-ɔ na ɔkɔ banyine linyemi lɛni na bada beebó bekyuli, na baakya-ma ɔlɛ kudɔ ɔni na asɔ alayia ɔgbankpi ɔdi si úbo.

²² Adubunye na ama si uwi ɔni na kɔka iye kekpo kébo. Na asɔ alayia beƒiebuo badi.

²³ Ɔɔɔdi atakpɛ akɔ na asɔ adubo bɔtuma. Na beƒiebuo lɛnɔ basɔ belékpoku-ɔ.

²⁴ Adubulie ku atu bɔyɔ, na lɛla likpidi lɛdi lɛsɔ liláni liléde ƒula kevo. Na ƒula baƒonu badubɔkya kaduɛ na lɛla lɛdi lɛsɔ lilékpoku-ma.

²⁵ Ƒula bebi ku bawɔ badubumomo geen betulo livo lɛni muuwi kalɔ.

²⁶ Adubulie abi lɛlɔ geen ku ɔyikun aani kalɛ edula eenye kemo taabi teegyie asa na baƒɛ-nya.

²⁷ “Hiob, bɔ́ɔnu ala amɛni ƒui bɔ́ti, na bɔgyi ka litemi geen na lɛdi. Anwuɔsu nu lɛla lɛni mɔɔsu-ɔ, na eti ete lɛlɔ kasusu.”