Hiob 34 - Katɔti Ɔku Kedee

Elihu Úye Nwuna Banwani Si Báda Anu

¹ Elihu úsie anumi na ɔ́su ɔnini,

² “Bise atu na binu-mi litemi, amii banundane ku bakutine benengudi.

³ Ɔsika atu na beeti teenu etemila taati-nya unu aani kalɛ na unyemi uutú adila kenye taati-nya emini.

⁴ Ɔmmɔ ɔdubɔya na buduo etemila ammɔ kemmo bɔnu kaduɛ asa na budie lɛni ndia litulo.

⁵ “Hiob ɔɔsu ɔnini, ‘Mbo ubo, ɔsika ńtaƒiɔ. Nsu Katɔti ulátɛ-mi litemi na ulu lɛlɔ.

⁶ Na ina ka nse siin ni, Katɔti úti-mi únwini ɔkɔ ɔnyine, na ɔ́ya na muunú ɔlɛ geen na mina lɛlɔ kemmo ɔni na ńtabla lɛla lɛdi.’

⁷ Nsu geen ni, ami ńtanu tɔ ukyuli ɔni nse aani Hiob, ɔsika uláƒalɛ Katɔti munu munu, na etemila aalɛ́-nwu kenye aani kalɛ na baaní ntu.

⁸ Na úti lɛlɔ ɔ́bla alaekpidi bablane ɔkpana, ɔsika ɔ́su lɛnɔ ɔnini,

⁹ ‘Kɔsia kɔdi kuuubo-nwu kemmo ka ukyuli unye utaabla Katɔti lɛƒɔyɔ.’

¹⁰ “Ɔmmɔ ɔsu, amii banwa bani mbo kasusu na biinú ala kalɔ ni, bise atu. Katɔti ulábla lɛla lɛdi na lɛdi likpidi!

¹¹ Ɔsika lɛla biala na ukyuli ɔ́bla ni, Katɔti ɔɔƒɔ-nwu kayu kani námanku-nwu na nwuna ɔbladu ɔmmɔ kenye.

¹² Katɔti ulábla ukyuli ɔdi ulikplu, na uƒu ala ɔkya kalɛ kalɛ.

¹³ Ɔ́si lɛla biala kalɔ kesekɔ ƒui ni, Katɔti kani mɔɔdi kayawi kamɛni ƒui lɛlɔ.

¹⁴ Ɔƒɛƒɛɛ ɔni na Katɔti ɔ́nwuna ɔ́kya-bu lɛlɔ kemmo ni, si ɔ́sɔ ɔ́ƒɔ nwuna ala ɔ́lɛku-bu lɛlɔ kemmo ni,

¹⁵ bukpi kani na bula ƒui bɔdubo na bɔsɔ bunwini lɛti.

¹⁶ “Anwuɔsu bɛda anu na bise atu na binu!

¹⁷ Katɔti ɔni ntulo lɛla biala mɔɔtɛ litemi biala siin kalɛ na ɔ́manku, nsu anwu na awɔ enye aadú kɔtɔ ɔƒaani.

¹⁸ Geen ni, lɛlɔ badine bani na balábla ala ulu lɛlɔ ni, Katɔti mɔɔdú-ma kɔtɔ.

¹⁹ Na Katɔti nédie abu bekyuli ƒui. Ɔlakɛne na adi o-o, ɔwabane na adi o-o ni, ulánu bana ɔdi anumi taabla lɛla lɛdi.

²⁰ Kukpi kuuyú bekyuli taatu usien ntɛ ɔni na baaagyi beeese na bekpi. Na lɛlɔ badine bayikune ngba bɔɔdá liku, na ɔmmɔ uuubo Katɔti ɔkplu munu munu.

²¹ “Ɔsika ɔɔnu bekyuli ƒui ablala na lɛla lɛdi lítabɛ-nwu.

²² Na ukyuli ukpidi ɔdi ulakana bɔbɛ bɔkya kasuudikɔ kani na Katɔti ulakana-nwu bɔnu.

²³ Anwuɔsu na Katɔti ulése limeyi ulete bekyuli ka beténye litemi katɛkɔ na kesii kadi.

²⁴ Katɔti uléye ukyuli ɔdi kasusu asa na ɔɔbɔku lɛlɔ badine bayikune teedie bana kunyekɔ, na uuti bekyuli bamba teenyene mmɔ.

²⁵ Ɔsika ɔgyi-ma ɔbladu biala, anwuɔsu usien unwi kani na ɔɔyila-ma udu ƒui kede kede.

²⁶ Na kadi ƒui anumi na Katɔti ɔɔní alaekpidi bablane kɔtu.

²⁷ Ɔsika bénwini kama bákya-nwu banii basɔ balábla Katɔti lɛyɔla na basɔ balábu-nwu munu munu ku nwuna ɔda bubo ƒui.

²⁸ Na báya na bawabane kɔvanu kúbedu Katɔti kudɔ na ulikplu ala ani na baabla-ma ɔsu, na ɔ́bla bana lɛƒɔyɔ úte-ma.

²⁹ Na ina bunye na únye ɔ́nu na útakpete-ma muedi ni, kadi bekyuli bamani, munuu ɔma ndubɔkana na udie Katɔti bɔƒiɔ bɔdi? Na si bɔbɛla na ɔ́bɛla nwuna anumi ni, ɔma ndubɔnu-nwu? Anwu kani mɔɔdi bekyuli ku kadi ƒui lɛlɔ.

³⁰ Na bekyuli baaadubo lɛla lɛdi bɔkana bɔbla, na belikplune bada-ma lɛlɔ bɔdi baya.

³¹ “Hiob, bɔsu na ɔlɛka asu Katɔti anii áƒiɔ, na eekpi-nwu kɔtɔ. Na ɔmɛni kama ni, adubo lɛla lɛni mayɔ-nwu kaƒɔ butaabla.

³² Na ɔlɛka evele-nwu na udie ƒula bɔƒiɔ ɔtina-a, kalɛ na asɔ alabla lɛla lɛmɛni alasia kama.

³³ Awɔ muute ɔda bubo, munuu Katɔti? Awɔ ɔlati die lɛmmɔ kenye, na ɔɔɔdi ami masu mete-ɔ. Anwuɔsu die ƒula kasusu tina.

³⁴ “Hiob, ukyuli ɔni mbo kasusu na uunú ala kalɔ ku banundane bani muunú-mi etemila amɛni ni, badubɔsu banini,

³⁵ ‘Hiob ulábla kasusu na ɔnu ala kemmo siin asa na ɔtɛmi, anwuɔsu na kɔdɔlɔ kɔ́ƒɔ-nwu atɛ kemmo.’

³⁶ Anwuɔsu ndubɔyɔ ka ebo abi ammɔ etédu kesii kani na ɔ́manku, ɔsika aatɛmi enyekpi aani alaekpidi ɔblane.

³⁷ Ƒula ɔbladu ƒui ɔ́ta únye Katɔti lɛlɔ. Na ɔmmɔ kama muedi budumi na asɔ eedumi-nwu.”