Hiob 31 - Katɔti Ɔku Kedee

Hiob Úse Kenye Kadi Úte Lɛlɔ

¹ “Líse kenye ka lɛɛɛdubo ugblebi ɔdi ɔnusɛ bɔnu na ɔda-mi ɔkwɛ.

² Unwoti Katɔti ulátunaku bekyuli bammɔ udu, mmomu ɔɔní-ma kɔtu.

³ Geen ni, Unwoti ɔɔyá na ɔgbankpi ɔɔsiáku bekyuli bani mɔɔbla ekpidi.

⁴ Na Katɔti ɔgyi mina kasiakɔ ƒui ku kalɛ na mɔɔbla ala taavinku.

⁵ “Na ɔgyi ka mɔɔdi nwuna etemila ƒui lɛlɔ na naaanyi ɔkɔ.

⁶ Ya na Katɔti ɔlati ɔkɔku-mi ɔnu na unu lɛkɔkula lɛbuni geen lɛlɔ, na ɔnu si lɛ́bla-nwu likpidi lɛdi.

⁷ Na si lɛ́bla atuɔkplu na línwini kama lɛ́kya-nwu iye lɛ́bla kasusu muedi na likpidi lɛdi lɛlɔ ni,

⁸ na ɔya na bekyuli bamba beti mina kabla kani na lɛ́bla ƒui benwini bana ɔdi, na baƒɛ-mi edula ƒui, na beku ani nkya mina kalɔ lɛnɔ bedie.

⁹ “Si ukyuli bamba uleku ɔdi úgyie-mi anumi na lɛ́wia nnii mɔɔƒɔ́-nwu linwini mina ɔdi ni,

¹⁰ na ukyuli bamba uƒie mina uleku lɛnɔ ɔƒɔ-mi kudɔ.

¹¹ Ɔsika si líƒie ukyuli ɔdi uleku lɛ́ƒɔ ni, agyi anii ɔdi-mi likpidi bonwu geen lɛni ndanku kɔtu bɔni.

¹² Na ɔmmɔ ɔdi ogya ɔni mɔɔkyula ala na kekpine na ɔɔkyula ukyuli ala ƒui taatálɛ kalɔ kemmo edula lɛnɔ lɛlɔ.

¹³ “Si mina kabla ɔblane ɔnanabi iye ulekubi ɔdi úti lɛla lɛni muukpóku-nwu úboku-mi ni, mɔɔtɛ-ni teete-nwu ulu lɛlɔ na naaanyi ɔkɔ.

¹⁴ Na si ńtabla ɔmɛni ni, bi na ndubo bɔsu si banii Unwoti ɔ́ta ɔnii ubawia ala kalɔ ɔnu? Na si ɔnii ɔɔtɛ litemi lɛmmɔ ni, dɛ na ndubo kenye budie?

¹⁵ Ɔdi litemi geen ka Katɔti néte bula ƒui ngba asa na badubɔwɔ-bu beboku kayawi kamɛni kemmo.

¹⁶ “Na ńtanya bekpinele ńtakya iye bani mɔɔyaki lɛla lɛdi na belie beteebo abi.

¹⁷ Na líle mina adila líte bani na kɔka kɔɔda ku bekpinebi.

¹⁸ Ɔ́si-mi lɛnamu uwi ƒui na muubunku bekpinebi ku bekpinele.

¹⁹ Muute bawabane adala,

²⁰ ɔni na béteemwi-mi kalɛ na ńteete-ma lɛkuntu na baabɛ́ kɔyɔ ɔsu.

²¹ Na ńtasia ulu ɔdi lɛlɔ na lɛyila ukpenebi ɔdi iye lɛnya-nwu lɛkya, ka mbo ɔyikun iye kenyekɔ ɔsu na litemi katɛkɔ.

²² Na si lɛ́bla ala amɛni ɔdi ni, na baya na bekulo mina enu bedie mina amangba lɛlɔ.

²³ Ka mɔɔyia Katɔti kɔtu kɔni na ɔdubɔni-mi si lɛ́bla lɛla lɛmmɔ udu ku kalɛ na uukeye ɔsu ni, naaabla kasusu muedi na lɛla lɛni na lise lɛni lɛlɔ.

²⁴ “Ńteti mina anu biala ńtasia lɛkɛ udu ɔdi lɛlɔ aani mina kama kekpokɔ.

²⁵ Na ńtakun lɛmɛnɛ lɛnɔ na lɛkɛ lɛmmɔ lɛdi lɛlɔ.

²⁶ Na ńtanu ɔƒɛ iye kɔbuli bukeye na lɛkya lili kalɔ lite ɔdi.

²⁷ Na ńtabɛ na liti lɛla lɛdi ńtákpa lite ɔdi.

²⁸ Ɔsika ɔmmɔ lɛnɔ ɔdi likpidi lɛni na Katɔti ɔdubɔni-mi kɔtu geen ka ńteti nwuna ɔbu ńtete-nwu na lɛ́kya lili kalɔ líte ala bamba ɔsu.

²⁹ “Lɛlɔ lítayɔ-mi kudii si lɛ́nu ka mina ukisine ɔdi uubó abi iye úduo ɔgbankpi ɔdi kemmo.

³⁰ Na ńtevele Katɔti kudii lɛnɔ nnii ɔya na ɔgbankpi iye ewida adi asiaku-ma na bekpi.

³¹ Na ńteni mina kaduli bekyuli ku kabla bablane ɔdi adila ku lɛna bute kudii.

³² Na ɔƒɔ biala néduo-mi ni, mɔɔƒɔ́-nwu na ɔkɛ keduokɔ na mina kudɔ.

³³ Ńteti mina ekpidi adi ńtabɛla bekyuli kalɛ na badi baabɛla bana ekpidi taakya kayi kemmo banii ɔdi utati.

³⁴ Na lɛɛɛdaku lɛla lɛni na bekyuli badubɔsu basiku-mi lɛlɔ iye bana edumi. Na ńtabɛla lɛlɔ ńtakya kaduli na mina ɔbladu ɔdi ɔsu.

³⁵ “Mɔɔwia geen ka ukyuli ɔdi unu lɛla lɛni na mɔɔsu mɛni! Ɔsika lɛla biala na mɔɔsu lɛdi litemi geen. Na mɔɔwia ka Katɔti Ɔyikune Ƒui udie lɛla lɛmɛni kenye na linu. Na ukyuli ɔni muudie-mi bɔƒiɔ na litemi lɛmɛni lɛlɔ ni, ɔlɛka unweni bɔƒiɔ bɔmmɔ ɔsia kakunkɛ lɛlɔ na bɔnu!

³⁶ Na ndubuti bɔƒiɔ bɔmmɔ lɛsia lɛmangba na liti libi lili aani kagabwa na ukyuli biala ɔnu-mu nwaa.

³⁷ Na lɛla biala na lɛ́bla ni, ndubuse anumi na linye Katɔti anumi na lɛsu-nwu ana ƒui kede kede aani ɔga ubi kalɛ.

³⁸ “Na mina kalɔ kani lɛlɔ na mɔɔtuma ni, keléwulo taakya-mi ka buƒie na líƒie-ka lɛ́ƒɔ ukyuli ɔdi kudɔ.

³⁹ Na ńtedie kana edula lɛnɔ ńtadi kalɛ na mina kabla bablane bani geen nátuma-ka bakɛ ku kɔka.

⁴⁰ Mmomu si lɛ́bla ala amɛni ɔdi ni, na aya na antabi ku kakpa ku edula ani ƒui na lɛ́kya ayii akya, na liyu ku alakpi ekpidi aƒɔ kemmo kammɔ ƒui.”