Hiob 23 - Katɔti Ɔku Kedee

Hiob Ɔ́dɔ Kpakplaa Na Lɛla Lɛni Mɔɔkpulu-nwu Kayi Lɛlɔ

¹ Ɔmmɔ kama ni, Hiob údie kenye ɔnini,

² “Ɔmwi lɛnɔ ni, nsɔ ndubo bɔdɔ geen, ɔsika Katɔti unye ɔɔní-mi kɔtu kpakplaa geen ina ɔni na muudumo momoomo mɛni.

³ Si bɔti na nka lɛti kesii kani na ɔkya na lɛkana-nwu kudɔ busie ni, nka ndubusie,

⁴ na liti litemi lɛmɛni lɛva-nwu anumi, na ami ku-nwu bɔtɛ-ni.

⁵ Mmɔ na ndubɔti lɛla lɛni geen na ɔ́yɔ ka ɔsu-mi.

⁶ Bɔbɔku na ɔdubo-mi na nwuna ɔyikun ɔsu na lɛgyu lɛtɔlɔ? Ńtaƒɔ ńtadi, mmomu ɔdubuwiku-mi lɛlɔ na unu kenye kani na ndanku.

⁷ Ɔsika nse siin na ɔdubɔsu-mi ɔnini, ‘Líwi-ɔ uƒi, teesie ƒaa, ɔsika álɛ litemi kemmo.’

⁸ “Naaanu Katɔti kesii biala na mina anumi ku kama ƒui,

⁹ iye mina kɔdianu ku kɔmiinu lɛnɔ. Nsu unye ɔɔbla nwuna kabla uwi biala ina ka naaanu-nwu uwi ɔdi.

¹⁰ Nsu ɔgyi lɛla biala na mɔɔbla, na si banii ɔ́kɔku-mi ɔ́nu ni, ndubo buse sɛɛn aani sika ugyiedi ɔni ndia utulo ƒui.

¹¹ Nsiaku-nwu kama siin ɔni na ńtedeyi ńtatásia kesii bamba kadi.

¹² Na ńtalɛ nwuna ɔda bubo bɔdi lɛnɔ kama. Mmomu bɔ́ƒɔ-mi kuye geen, na nsiaku-mu kama lɛnɔ siin.

¹³ “Nsu anwu lɛti pɛ kani ndi Katɔti na ulávumana, na ukyuli ɔdi ulakana-nwu lɛlɔ bɔta bunye lɛnɔ.

¹⁴ Na nwuna kasusu kadanku ala abɛdi pii. Na lɛla lɛni na ɔɔyɔ́ ni, ani kani na ɔdubo-mi bɔbla.

¹⁵ Ɔmmɔ ɔsu na nnye-nwu anumi ku liƒu. Na si mɔɔkali ala amɛni taanu ni, na lɛlɔ lɛɛtɔ́-mi kpakpaakpa.

¹⁶ Katɔti Ɔyikune Ƒui ɔ́ya na ɔtɔtɔ ɔɔgyú-mi si mɔɔkali-nwu ablala taanu.

¹⁷ Katɔti ɔ́ya na ɔƒɛ ɔ́sa ɔ́kya-mi, nsu ina use-mi suu lɛni aani ɔnumbwɛne ni, neeebile mina kenye na lɛsɔ lilie kpoo.”