Hiob 20 - Katɔti Ɔku Kedee

Soƒar Ɔ́dɔnku Hiob Na Nwuna Etemila Bɔsu Ɔsu

¹ Soƒar ɔni nási Naama mmɔ ɔ́su Hiob ɔnini,

² “Ƒula etemila aatu-mi kayi, anwuɔsu ɔlɛka lɛkya-a kenye.

³ Átɛmi édumi-mi na aadú-mi kɔtɔ lɛnɔ, na ɔlɛka lidie kenye na enu.

⁴ “Ɔ́si kayawi kalɔ kesekɔ ƒui ni, ukyuli biala ɔgyi ka

⁵ alaekpidi ɔblane biala ni, uwi klukwii ɔdi kani na ɔɔkɛ́ ebiti teetédu.

⁶ Ina dɛ na bana lɛmɛnɛ bɔkun ku bana ɔyikun ɔɔkɔ́ teesie kayaa ni,

⁷ bɔyii na bana kawɔlɔkɔ kayii taakya aani ɔtumu na ama ɔdi ɔsa. Na ɔdubɔbla bekyuli bani na báti-ma dii dɛye dɛye kalɛ na ɔ́bla na bana kawɔlɔkɔ kébo lɛni.

⁸ Bekyuli badubɔyiƒala-ma aani kalɛ na ukyuli ɔɔyiƒala kɔna kɔni na úgye.

⁹ Na bana lɛlɔ bekyuli ku bakpana lɛnɔ basɔ balanu-ma.

¹⁰ Na ala ani na béƒie báƒɔ na bawabane kudɔ ni, bana bebi badubɔƒɔ kɔyu kɔmmɔ ƒui.

¹¹ Geen geen ni, balalane badubo bukpi na batátɛ bana kɔƒiɔtɔ kemmo ku bana lɛkloƒu ɔyikun ƒui.

¹² “Use ka alaekpidi bɔbla bɔɔyu alaekpidi bablane emini. Na use-ma aani kalɛ na baadu lɛla lɛni na libo emini taanwanta taata akpu.

¹³ Na lɛɛkya-ma kenye na baatu-ni teenwini.

¹⁴ Nsu adila ammɔ adubunwini ɔdu ku likpila na bana kaƒɔ kemmo aani kɔlakpi ugyulo na ɔkya-ma ɔlɛ lɛlɔ.

¹⁵ Na Katɔti ɔdubɔya na badala lɛkɛ lɛni na bánwanɛ báƒɔ bekyuli kudɔ bému bébweli mmɔ.

¹⁶ Na ala ammɔ adubunwini aani kɔlakpi ugyulo na bana kaƒɔ kemmo na ɔdu-ma.

¹⁷ Na baaadubo bulie na bakɛ Katɔti kusɛ kusɛ ku ala abuni ani na ɔdubute bekyuli.

¹⁸ Na katuma kani na bábla kpakplaa ƒui ni, baaadubo bulie bɔdi kana ebi.

¹⁹ Ɔsika bawabane na bánya bákya bákɛ lɛkɛ lɛmmɔ, na béƒie lɛtɔ lɛni na ɔɔɔdi ama nátu-ni báƒɔ bekyuli bammɔ kudɔ.

²⁰ “Na ka ala elemo-ma ɔsu ni, baaadubo-nya bɔda bɔwia bɔya. Na balakana-nya bɔklibi buse lɛnɔ.

²¹ Ɔƒɛni ka bɔnwanɛ na baanwanɛ teemu taadi ɔsu ni, si ala ani na bánwanɛ mmɔ ása ni, na beenwíni bekyuli bekpludi.

²² Na ala pii ani na bánwanɛ kama ni, lɛbibo ku ɔgbankpi muubó-ma taaƒiɛmi kalɔ.

²³ Si uwi ɔni na bádi na bémo báwɔlɔ ni, uwi ɔmmɔ na Katɔti uubó-ma taaƒiɛmi kalɔ ku kɔnyi na ɔya na nwuna lɛbibo ku lɛtuni limo-ma aani kalɛ na baanina ukyuli na ubweli lɛla biala.

²⁴ Na si beekeli kɔtaminta kɔbuɛlɛmii atula ni, atula ani mbo ɔkplu etulo edeedi ndubo-ma bɔtu.

²⁵ Na ana nnye bɔni mbo ɔkplu mmɔ ndubo-ma ɔlɔna bɔtu bɔƒuaala. Na liƒu bonwu lɛdubuƒie-ma.

²⁶ Na ala ani na baayɔ́ na anya mɔɔda-ma kubiti geen mmɔ adubɔyii akya uyɔ kemmo. Na Katɔti ɔdubɔya na ogya ɔdi ɔsi ubakyula-ma na bana nvo kemmo ku bana akɛla ƒui.

²⁷ Katɔ ku kalɔ ƒui badubo-ma keyi budie na badu-ma kɔtɔ.

²⁸ Na Unwoti ɔdubɔya na beti-ma ala batɔlɔku si uwi ɔni na ɔ́kɛ kɔnyi na ɔɔtɛku-ma litemi, aani kalɛ na ketu keeyi taagbala ala taatɔlɔku.

²⁹ Lɛla lɛmɛni na Katɔti ɔ́lɛ ugyii úse úte bekyuli bekpidi.”