Hiob 2 - Katɔti Ɔku Kedee

Satan Ɔ́sɔ Ɔ́kɔku Hiob Ɔ́nu Kunyɔdi

¹ Limeyi lɛdi lɛ́sɔ lídu na kayaa bayikune lidu bammɔ básɔ bébo Unwoti kudɔ na Satan lɛnɔ ɔkya-ma akɔ.

² Amu na Unwoti úye-nwu ɔnini, Wɛ na ási ébo aalɛ́ mɛni? Mmɔ na Satan údie kenye ɔnini, “Bɔkɛ kani na nkɛ mɔɔví kalɔ kammɔ lɛlɔ.”

³ Unwoti ɔ́sɔ úye-nwu ɔnini, “Na dɛ, ka ésie ni, ánu mina kabla ɔblane Hiob? Ukyuli biala uuubo nwuna kalɛ na kalɔ kammɔ ƒui lɛlɔ. Ɔdi ukyuli ɔni na ɔɔyia-mi na ɔɔbu-mi lɛnɔ geen, anwuɔsu use siin, ɔsika ulayɔ ɔnii ɔɔbla lɛla lɛdi ɔƒiɔ-mi. Na ina ka útabla lɛla lɛdi asa na énye-mi lɛlɔ anii nte-ɔ kuƒi na ekpoku-nwu muedi ni, ɔmu unye nwuna kenyekɔ na ɔɔdi mina litemi lɛlɔ.”

⁴ Amu na Satan ɔ́su ɔnini, “Lɛla lɛdi lileƒi ukyuli ɔlɛ teetulo si anwu ɔlati nwuna ɔlɔna uunú ɔlɛ. Anwuɔsu na ɔkana na uni lɛla biala na uti lɛla lɛni na lɛ́ƒɔ-nwu kuye geen muedi ɔvumana na ɔkɛ nwuna ngba.

⁵ Nsu si banii énene kɔnu ɔƒaani na ákya-nwu ɔlɔna ɔlɛ ɔdi ni, adubɔnu ka ɔdubo-ɔ animi butaakywɛɛ na uteewida-a anumi ku anumi.”

⁶ Mmɔ na Unwoti ɔ́su Satan ɔnini, “Ɔdia lɛ́nyonu-nwu lɛ́kya-a lɛkɔkɔ akana na ekpoku-nwu ɔlɔna ku ɔlɛ biala kalɛ na aayɔ́, mmomu tadu-nwu.”

⁷ Anwuɔsu Satan ɔ́gyu lɛgba na ɔ́tɔlɔ Unwoti kudɔ mmɔ na útáya na ɔlɛ kpakplaa úbo Hiob ɔni na nwuna lɛlɔ ƒui línwini alɛbi sɔɔn ɔ́si lɛgba kalɔ útédu lili.

⁸ Ɔmmɔ ɔsu kebu na Hiob úsie ulie ku kɔnyana. Na ɔda kubuikɛ kɔdi uukuo nwuna alɛbi na ntɔ akɔ mmɔ.

⁹ Amu ka ulekudi ɔ́da úbalɛ ni, úye-nwu ɔnini, “Bi? Bɔsiaku na amu asiaku Unwoti kama? Wida-nwu na ekpi!”

¹⁰ Mmɔ na Hiob údie kenye ɔnini, “Bi ɔsu na aatɛmi aani uleku ɔdɔlɔdi? Uwi ɔni na Unwoti úte-bu ala abuni ni, bɔ́ƒɔ-nya. Na si ɔƒaani anwu úte-bu lɛbibo ni, útalɛka bɔƒɔ ɔmmɔ lɛnɔ?” Na ɔmɛni kemmo ƒui ni, Hiob útasu lɛla lɛdi na ɔƒiɔ Unwoti.

Hiob Bakpana Ɛtɛ Bébo-nwu Kudɔ

¹¹ Uwi ɔmɛni kemmo ni, Hiob bakpana ɛtɛ badi bénu ka Hiob uuƒi. Na bése limeyi ka babasa na Hiob kudɔ na bewuloku-nwu kɔnyana na basia-nwu kɔnu. Ama ndi Eliƒas ɔni nási Teman ku Bildad ɔni nási Suhi ku Soƒar ɔni nási Naama.

¹² Ka bakɛ ɔgyu bésela na bánu-nwu bémene ni, béteyile-nwu bɔnu bɔti banii anwu na ɔdi mmɔ. Na litemi lɛmmɔ lɛ́bla-ma kɔnyana, anwuɔsu báni bana lɛwu bábwɛ na báma ɔtumu béwi eli na beewulo momoomo na anwu ɔsu.

¹³ Ɔni na bédu-nwu kudɔ ni, báyu béwi kalɔ mmɔ na bélie-nwu kudɔ emeyi maatɛ usien ku ɔƒɛ. Na ɔdi útasu-nwu lɛla lɛdi ka bánu kalɛ na uubó abi ɔsu.