Hebriƒuɔ 8 - Katɔti Ɔku Kedee

¹ Lɛla lɛni geen na bɔɔyɔ́ budie bɔtina na litemi lɛmɛni kemmo ndi ka ni, bubo ɔkpane unengudi ɔmɛni ɔni nlie kesii kani náƒɔ kuye na Katɔti lɛgaboku kudɔ na katɔ.

² Na ɔɔbla Katɔti kabla na kakpakɔ kedee kani ndi kakpakɔ geen kani na Katɔti ɔlati úti nwuna enu ɔ́bla. Na ɔɔɔdi bekyuli nábla-ka.

³ Báƒuna ɔkpane unengudi biala ka uti ala ani na béte ku ani na badubuti bakpa ƒui ɔkpa ute Katɔti. Na lɛni kani na ɔlɛka ɔkpane ɔmɛni lɛnɔ uti lɛla lɛdi ɔkpa ute Katɔti.

⁴ Na si nka kalɔ lɛlɔ mɛni na ɔkya ni, nka ulabla ɔkpane kabla kulaa. Ɔsika bakpane bakya bani mɔɔbla akpala kalɛ na ɔda bubo bɔni ntɛ nse bɔɔtina.

⁵ Baabla kabla na bana kakpakɔ kani nálɛ kani geen nkya katɔ. Ɔmmɔ geen ɔsu na Katɔti úbo Mose ɔda uwi ɔni na ɔ́su-nwu ɔnii ɔtu bana kakpakɔ. Na ɔ́su-nwu ɔnini, “Nu kaduɛ na atu kakpakɔ kammɔ na kamanku ulu ɔni na lɛ́tina-a na kɔbi lili mmɔ lɛlɔ.”

⁶ Nsu kabla kani na Katɔti úti ɔ́kya Yesu enu kemmo ni, káƒɔ kuye ketulo bana ɔdi ƒui. Lɛni na bunyimi bɔwɔdi bɔni kenye na Yesu unye ni, bɔ́ƒɔ kuye butulo bunyimi bɔkukudi bɔmmɔ ƒui. Ɔsika bése bunyimi bɔmɛni bése na linyese lɛni ndia ntulo lɛlɔ.

⁷ Si lɛla lɛdi nétebie na bunyimi bɔkukudi lɛlɔ ni, na nka ɔ́sɔ útamanku na ulu biala lɛlɔ ka basɔ bete-bu bunyimi bɔwɔdi bɔbambadi bɔdi.

⁸ Nsu Katɔti ɔ́nu ka bekyuli báƒiɔ, na ɔ́su ɔnini, “Ami Unwoti mɔɔsu ka ni, uwi ɔdubo ɔni na ndubo lɛla lɛwɔdi bunyimiku Israel kadi bekyuli ku Yuda kadi bekyuli.

⁹ Na ulése aani kalɛ na línyimiku bana bati kuuku na uwi ɔni na lɛ́da-ma kɔnu kɔnu na lɛ́tɔnku-ma lɛ́lɛku Egyipte kalɔ lɛlɔ. Ɔsika bátadi lɛla lɛni na línyimiku-ma lɛlɔ. Anwuɔsu línwini kama lɛ́kya-ma.

¹⁰ Bunyimi bɔni na ami Katɔti mɔɔsu ka ndubo bunyimiku Israel kadi bekyuli uwi ɔni ndubo kemmo ndi ɔmɛni. Ndubuti mina ɔda bubo lɛkya-ma kasusu kemmo. Na ndubunweni-mu lɛkya-ma kayi kemmo. Ndubɔbla bana Katɔti na ama lɛnɔ babla mina bekyuli.

¹¹ Na ɔ́si ɔƒɛni ni, ukyuli ɔdi ɔsɔ ulatina ɔkpanadi iye ɔnwani ka ɔti Blɔti. Ɔsika bana ƒui badubo-mi bɔti ɔ́si ubliidi ƒui útálɛ unengudi lɛlɔ.

¹² Na ndubuti bana alaekpidi ani ƒui bábla lɛkyiɛ-ma. Na nsɔ lɛɛɛdubo bana ekpidi bunyimo kudii.”

¹³ Na ka Katɔti ɔ́su ɔnii ɔdubuse bunyimi bɔwɔdi ni, na budeedi bɔ́bla bɔkukudi. Na lɛla lɛkukudi lɛni néetu uwi ni, lɛdubo bɔyii uwi klukui kemmo.