Hebriƒuɔ 6 - Katɔti Ɔku Kedee

¹ Ɔmɛni ɔsu ni, bɛya na busie anumi, na bulasɔ bulakya lɛnamu uwi kalɔ kesekɔ ala ani na bɔ́tɛya na Kristo mmɔ kani lɛlɔ kemmo. Bitaya na bɔsɔ butése kalɔ kesekɔ ala bɔtɛya kalɔ. Ala amɛni adanku kayi bunwini na ala ekpidi lɛlɔ ku kalɛ na bɔƒɔ Katɔti bɔdi lɛlɔ.

² Na adanku lɛla lɛni ɔsu na beeti ntu taabla ntu bɔkpila ɔdi ku enu lili bɔsia ku kalɛ na bekpine badubɔsɔ bata balɛ bekpine akɔ ku Katɔti litemi lɛni na ɔdubɔtɛku-bu na ɔsɔ ulavumana-ni kudii lɛlɔ.

³ Anwuɔsu bɛya na busie anumi. Na si Katɔti ɔ́tunaku-bu ni, ulu ɔmɛni lɛlɔ na bɔdubɔsia.

⁴ Na bekyuli bani nánu bukeye dii na bákɛ Katɔti lɛƒɔndia na bákɛ kɔsia kɔdi ɔkɛnku Katɔti Kɔyu lɛlɔ,

⁵ na bánu lɛbuni lɛni nkya Katɔti litemi buni lɛmmɔ kemmo báti ku ɔyikun ɔni ndanku Katɔti lɛga bɔdi bɔni mebo lɛnɔ lɛlɔ

⁶ si béni bana bɔƒɔtaadi na Katɔti lɛlɔ ni, basɔ balakana na benwini kayi. Ɔsika basɔ baakana Katɔti Ubidi ɔmmɔ taamana ugyii lɛlɔ na baakya-nwu kɔƒa na kadi ƒui anumi.

⁷ Kalɔ kani mɔɔƒɔ́ ntu si ɔnantu ɔ́na na kaadia edula abuni teete bemonsene ni, Katɔti kusɛ kusɛ ɔɔsiáku-ka.

⁸ Nsu kalɔ kani na liyu alakpi mɔɔkwɛ́-ka lɛlɔ ni, kadanku ewida na keeebo kɔsia kɔdi. Na kasɔ kaladia lɛla lɛdi bɔbla lɛnɔ. Na kawɔlɔkɔ ni, kadubɔkywi.

⁹ Bayɔne, ina ka bɔɔsu ala amɛni ƒui ni, bɔsia anu ka ala abuni ani ndanku ngba bɔƒɔ adubɔsiaku amii ƒui.

¹⁰ Katɔti ɔɔbla lɛla biala ulu lɛlɔ. Na uláyiƒala bina ala ani na bɛ́bla. Ɔgyi ka bɛɛyɔ́-nwu ɔkɛnku kalɛ na bíbunku nwuna bekyuli. Na bɛmu biibunku-ma úbedu ɔƒɛni.

¹¹ Lɛni na bɔɔwia ka bina akɔ ɔdi biala ɔda lɛlɔ ku udu buni ɔmɛni kaduɛ utédu kawɔlɔkɔ kalɛ na bina lɛnunsia lɛlɛ-mii kɔsia.

¹² Buláwia ka bitaabla kɔkɔsɔ. Mmomu bɛtɛya bekyuli bani nákɛ kayi buɛɛ na báƒɔ bádi ɔsu na kɔnu kútuku-ma linyese lɛni na Katɔti úse-ma mmɔ.

Kenye Kani Na Katɔti Úse Ɔdi Litemi Geen

¹³ Uwi ɔni na Katɔti úse Abraham kenye ni, ɔ́kpali lɛlɔ úse kenye kammɔ, ɔsika lɛla lɛdi liiibo na litulo anwu Katɔti.

¹⁴ Na ɔ́su ɔnini, “Geen ni, ndubute-ɔ kusɛ kusɛ. Na ndubɔya na edie kaba pii.”

¹⁵ Na ɔmmɔ kama ka Abraham ɔ́kɛ kayi buɛɛ na ɔ́sia Katɔti anu ɔsu ni, kɔnu kútuku-nwu kenye kani na Katɔti úse-nwu mmɔ.

¹⁶ Bekyuli baakpali ala ani ntulo-ma teese kenye taatina ka lɛla lɛni baasu lɛdi litemi geen, na unyeƒi ɔdi uuubo-nwu kemmo.

¹⁷ Na ka Katɔti ɔɔwia ka bekyuli bani na úse kenye ƒui bati nwaa ka kavumana kadi kelebo nwuna linyese kemmo ɔsu ni, ɔ́kpali lɛlɔ úse kenye kammɔ.

¹⁸ Katɔti ɔ́bla ɔmɛni ɔkɛnku alakpa anyɔ ani naaavumana lɛlɔ. Na Katɔti lɛnɔ ulakana ɔkɔ bɔnyi. Na ɔmɛni ɔdubɔya na abu bani nékeli bɔ́tamiku-nwu ni, enu alaƒɛ-bu na lɛnunsia lɛni na úti ɔ́kya-bu lɛlɔ kemmo ɔsu.

¹⁹ Bula lɛnunsia lɛmɛni mɔɔyá na bɔda Katɔti kpakplaa na bula kayi kemmo aani kalɛ na kugyii lidu lɛɛda kalɔ geen. Na bɔsia Yesu anu. Anwu néduo katɔma kedee kani kenye na lɛdiku lɛƒa kemmo.

²⁰ Mmɔ na Yesu ɔ́gyu ɔtɔ útéduo na abu ɔsu. Na únwini ɔkpane unengudi úte uwi ƒui na Melkisedek ɔkpane bɔdi ulu lɛlɔ.