Hebriƒuɔ 10 - Katɔti Ɔku Kedee

Kristo Úti Lɛlɔ Ɔ́kpa Kunwi Kani Na Bekyuli Lili

¹ Ɔda bubo ndi ekposela úte ala abuni ani ndubo. Na ɔɔɔdi ɔda bubo bɔmmɔ ndanku ala abuni ammɔ alati geen tɔ. Ɔmɛni ɔsu ni, akpala ani nkɛnku ɔda bubo bɔmɛni ani na baabla lɛkwa ndi lɛkwa ni, alakana bekyuli bani mɔɔwia ka bakpa Katɔti bɔbla sɛɛn bɔwɔlɔ.

² Na si bɔkana na akpala ammɔ adubɔkana-ma bɔbla sɛɛn bɔwɔlɔ ni, nka báada bɔkpa báya na bana kayi kasɔ kaladu-ma kɔtɔ kɔdi.

³ Nsu ni, akpala ammɔ geen mɔɔyá na beenyimo bana ekpidi lɛkwa ndi lɛkwa.

⁴ Ɔsika bese ku bakɔ ubugya ulakana ekpidi bɔƒɔ budie ukyuli lɛlɔ.

⁵ Ɔmmɔ ɔsu na asa na Kristo webo kayawi kamɛni lɛlɔ ni, ɔ́su ɔnini, “Ati, akpala ku etela alaƒɔ-ɔ anu. Mmomu ɔlɔna ɔni na éti éte-mi ka liti lɛkpa lite-ɔ mɔɔda-a kubiti.

⁶ Na akpala ani na bákyula ku ekpidi lili buvele akpala aláda-a kubiti.

⁷ Mmɔ na lɛ́su nnini, ‘Ati, aanu-mi. Líbo nnii mbabla ƒula lɛƒɔyɔ aani kalɛ na bénweni básiku-mi lɛlɔ na Bunweni Kedee Ɔku kemmo.’ ”

⁸ Kudeedi ni, ɔ́su ɔnini, “Ala ani na béti béboku na bábla akpala ku ani na béti bákyula ku ala ekpidi lili buvele akpala ni, átada-a kubiti. Na útayɔ-ɔ kaƒɔ lɛnɔ,” ina ka ɔda bubo bɔmmɔ nátina ka babla lɛni.

⁹ Mmɔ na ɔ́su ɔnini, “Aanu-mi. Líbo nnii mbabla ƒula lɛƒɔyɔ.” Katɔti údie akpala edeedi úse kɔmadɔ. Na úse Kristo ɔdi na ana kenye.

¹⁰ Na Katɔti ɔ́bla-bu kedee na nwuna bɔyɔ kenye ɔkɛnku kalɛ na Yesu Kristo úti nwuna ɔlɔna ɔ́kpa úte-nwu kunwi pɛ kani úte uwi ƒui ɔsu.

¹¹ Limeyi ndi limeyi ni, Yudani ɔkpane biala uunye taabla nwuna ɔkpane kabla kani ndanku bɔkpa ulu ɔmmɔ lɛlɔ. Ɔɔbla akpala ammɔ udu kani limeyi ndi limeyi ani naaadubo bɔkana na udie likpidi na ukyuli lɛlɔ kudii.

¹² Nsu uwi ɔni na Kristo anwu úbo úbeti lɛlɔ ɔ́kpa kunwi úte bekyuli ƒui ekpidi lili ɔni ndanku utédu kayawi kawɔlɔkɔ ni, ɔ́yu úlie Katɔti kɔdianu kesii kani náƒɔ kuye.

¹³ Na ɔ́si uwi ɔmmɔ kemmo ni, Kristo unye ɔgya uwi ɔni na Katɔti ɔdubuti nwuna bekisine ɔkya-nwu lɛgba kalɔ.

¹⁴ Ɔsika ɔkɛnku kunwi kɔni na úti lɛlɔ ɔ́kpa mmɔ ɔsu ni, ɔ́wɔlɔ nwuna kabla úte bekyuli uwi ƒui kalɛ na babla kedee.

¹⁵ Katɔti Kɔyu ɔlati údie ɔmɛni ɔ́tina-bu nwaa ɔnini,

¹⁶ “Bunyimi bɔni na ami Katɔti mɔɔsu ka ndubo bunyimiku-ma na uwi ɔni ndubo kemmo ndi ɔmɛni. Ndubuti mina ɔda bubo lɛkya-ma kayi kemmo. Na ndubunweni-mu lɛsia-ma kasusu lɛlɔ.”

¹⁷ Na ɔ́sɔ ɔ́su ɔnini, “Nsɔ lɛɛɛdubo bana ekpidi ku bana likyulikpi bunyimo.”

¹⁸ Na ka Katɔti úti ala amɛni ɔ́kyiɛ ni, ala ekpidi lili buvele akpala adi asɔ eeebo.

Ɔlɛka Bɔkya Ɔkplu Na Bɔni Bude Katɔti

¹⁹ Ɔmɛni ɔsu ni, banwa, ulu ɔtɛ ute-bu ka bɔkana na buduo katɔma kani nse kedee ntulo ƒui mmɔ kemmo ɔkɛnku Yesu ubugya lɛlɔ.

²⁰ Ɔsika úti nwuna ɔlɔna úte na bula lili na ɔ́lɛmi ngba bɔni naaadubo bɔsa ulu ɔwɔdi úte-bu. Ɔ́bla ɔmɛni kalɛ na bɔkana bɔvi kayakun kɔdi kɔni nnye nte nwuna ɔlɔna, na bɔda bɔlɛ Katɔti anumi.

²¹ Na ka bubo ɔkpane unengudi na Katɔti kakpakɔ kani na katɔ mmɔ ɔsu ni,

²² bɛya na bɔni bude Katɔti ku kayi kani naaatɔlɔ-bu na bɔda bɔƒɔtaadi bɔmmɔ kpakplaa. Yesu ɔ́kuna nwuna ubugya ɔmmɔ úwi-bu lɛlɔ kalɛ na bula kayi kaládu-bu kɔtɔ. Na úti ntu bɔni nse sɛɛn ɔ́ƒɔ-bu lɛlɔ ƒui.

²³ Na bɛya na bunye bɔƒɔtaadi bɔni kenye na buudie lɛlɔ kpakplaa. Ɔsika ukyuli ɔni nése-bu kenye kammɔ ni, ɔɔbla ala ulu lɛlɔ.

²⁴ Na butaabu taanu ulu ɔni lɛlɔ na bɔdubɔkana na bɔkya lɛlɔ ogya, na butaayɔ bekyuli, na butaabla ala abuni.

²⁵ Bitaya na bɔda bɔsa bɔya aani kalɛ na badi badaku lɛlɔ bɔda teedie. Mmomu bɛya na bɔkya lɛlɔ ogya, na bɔbla lɛni butulo na uwi ɔni kemmo na limeyi linengudi lɛmmɔ lɛdaku bɔni teede geen mɛni kemmo.

²⁶ Nsu si bɔgyi ƒui na búti bɔ́sia lɛlɔ na bɔɔbla ala ekpidi na uwi ɔni na bédie litemi geen lɛmmɔ ala bátina-bu ni, na likpidi buti taakyiɛ akpala adi asɔ eeebo na babla lɛnɔ.

²⁷ Mmomu ɔlɛka bunye butaanu ulu ku liƒu ka badubɔtɛku-bu litemi. Ɔsika ogya bonwu ɔni muubile ala ubakyula Katɔti bekisine ƒui.

²⁸ Ukyuli biala ɔni néni Mose ɔda bubo na nkyuli inyɔ iye ɛtɛ bédie kenye ka use lɛni ni, bekyuli baadú ukyuli ɔmmɔ ɔni na balánu-nwu kɔnyana.

²⁹ Bekyuli bani manu Kristo ubugya aani lɛla lɛni neeese kedee ni, bɔgyi ka Katɔti ɔdubo-ma kɔtu bɔni geen! Ɔsika beedumi Katɔti Kɔyu kɔni mɔɔbla-bu lɛƒɔndia na baanu Katɔti Ubidi aani ɔɔɔdi lɛla lɛdi. Nsu ubugya ɔmmɔ na Katɔti úti ɔ́ƒɔ ekpidi údie-ma lɛlɔ, na ubugya ɔmmɔ kani na úti úse bunyimi bɔmmɔ likpo.

³⁰ Ɔsika bɔgyi anwu ɔni násu ɔnini, “Ami ndubudie ukyuli likpidi lɛni na ɔ́bla kasi na lɛƒɔ-nwu kayu na nwuna kayu kenye.” Anwu kani násɔ ɔ́su ɔnini, “Ami Katɔti ndubɔtɛku mina bekyuli litemi.”

³¹ Liƒu lɛla bonwu lɛdi si Katɔti ɔni nli ngba uwi ƒui ɔ́da-a na kɔnyi kemmo.

³² Binyimo uwi ɔni na bɛ́nu Katɔti bukeye na bínwini nwuna badi ku bukpoku bɔni kemmo na bɛ́sia bɛ́lɛ.

³³ Uwi ɔdi ni, beedumi-mii na beekpóku-mii na kadi anumi. Na uwi bamba kemmo lɛnɔ ni, bɛɛnu kalɛ na baabla bekyuli bamba lɛnɔ aani kalɛ na bábla-mii.

³⁴ Biiwuloku bani na batɛ aban ɔtɔ kɔnyana. Na bɛɛkɛ́ kayi ƒaa si ina béƒie-mii ala báƒɔ, ɔsika bɛgyi ka bibo akɛla ani ndia ntulo ammɔ na elébie kudii.

³⁵ Anwuɔsu bitaya na enu áƒɛ-mii na kalɛ na biisé kayi kemmo. Ɔsika bɛdubɔkɛ lɛyuƒɔla bonwu geen.

³⁶ Ɔdi ka binye kpakplaa kalɛ na si bɛ́bla lɛla lɛni mɔɔyɔ́ Katɔti kaƒɔ bɛ́wɔlɔ ni, na bina kɔnu kutuku linyese lɛmmɔ.

³⁷ Ɔsika Bunweni Kedee Ɔku ɔ́su ɔnini, “Kébu blii na ukyuli ɔni ndubo mmɔ ɔda ɔlɛ ɔni na ɔsɔ uletu uwi.

³⁸ Mina bekyuli bani mɔɔsiaku-mi kama siin ni, badubulie ngba na bana bɔƒɔtaadi kemmo. Nsu bani menwini kama makya-mi ni, lɛlɔ liláyɔ-mi na bana lɛlɔ.”

³⁹ Nsu abu ni, bɔɔɔdi bekyuli bani muunwíni bula bɔƒɔtaadi kama na bɔyii udu. Mmomu bɔ́ƒɔ bɔ́di, na Katɔti ɔ́ƒɔ-bu.