Ala Kalɔ Buse 8 - Katɔti Ɔku Kedee

Ntu Bɔni Náƒɔ Kalɔ Lɛlɔ Bɔ́kpɛ

¹ Nsu Katɔti anu asia Noa ku beƒiebuo ku ɔmantɛ bebuo bani nkya-nwu kudɔ na ɔkɔlɔ ɔmmɔ kemmo lɛlɔ. Anwuɔsu ɔ́ya na ɔƒɛƒɛɛ ɔdi úkpo ɔ́vi ntu bɔmmɔ anumi na ɔ́ya na ntu bɔmmɔ bɔ́kpɛ.

² Na Katɔti útile ntukpa bɔni nábwɛ bɔ́lɛ kalɔ ku katɔ kani mɔɔlɛ́ ntu mmɔ kenye. Na ɔnantu ɔ́da bɔna ɔ́ya.

³ Na bɔkpɛ kani na ntu bɔmmɔ bɔɔkpɛ́ uwi ndi uwi. Na uteedu emeyi eti atɛ (150) ammɔ kawɔlɔkɔ ni, ntu bɔmmɔ bɔ́yu kalɔ geen.

⁴ Na kɔbuli maatɛdi limeyi leevu-maatɛdi lɛlɔ ni, ɔkɔlɔ ɔmmɔ úbedi únye abi ani baalɔ Ararat lili.

⁵ Ntu bɔmmɔ bɔmu bɔdaku bɔkpɛ laa úbedu kɔbuli leevudi. Na kɔbuli leevudi limeyi lideedi lɛlɔ ni, abi ammɔ ƒui eli ákwii.

⁶ Na emeyi aavlene kama ni, Noa ɔ́lɛmi ɔkɔlɔ ɔmmɔ ƒansili.

⁷ Amu na ɔ́tala Anane. Na aasɛ ɔmɛni uuveyi teesie teebo laa útédu uwi ɔni na ntu bɔmmɔ bɔ́kwii ƒui.

⁸ Amu na ɔ́tala Abloduma ɔdi lɛnɔ ɔnii utánu si ntu bɔmmɔ bɔ́ɔkpɛ bɔ́wɔlɔ ƒui.

⁹ Nsu Abloduma ɔmmɔ útakɛ kesii kani na ɔyu ulie, ɔsika ntu bɔmmɔ bútakwii tɔ. Ɔmmɔ ɔsu ɔ́sɔ únwini úsie ɔkɔlɔ bonwu ɔmmɔ kudɔ na Noa úƒie-nwu ɔ́kya ɔkɔlɔ kemmo.

¹⁰ Amu na Noa ɔ́kywɛ na emeyi maatɛ ávi asa na ɔ́sɔ ɔ́tala Abloduma ɔmmɔ úmene.

¹¹ Amu ka Abloduma ɔmmɔ únwini úbo ni, nnɔ kugyii livete lɛwɔdi lɛtu-nwu kenye. Mmɔ na Noa ɔ́ti ka ntu bɔmmɔ bɔ́ɔkpɛ bɔ́wɔlɔ.

¹² Nsu Noa ɔ́sɔ ɔ́ya na emeyi maatɛ bamba ásɔ ávi asa na ɔ́sɔ ɔ́tala Abloduma ɔmmɔ. Nsu ka Abloduma ɔmmɔ úsie ni, ɔ́sɔ útenwini útebo-nwu kudɔ lɛnɔ.

¹³ Na uwi ɔni na Noa ɔ́ƒɔ akwa eti leevu-anyɔ ku unwi (601) nwuna kɔbuli kudeedi limeyi lideedi lɛlɔ ni, ntu bɔmmɔ bɔ́kwii na kalɔ kammɔ lɛlɔ ƒui. Mmɔ na Noa ɔ́lɛmi ɔkɔlɔ ɔmmɔ katɔ na ɔ́nu ka ntu bɔmmɔ bɔ́kwii na kalɔ kammɔ ƒui lɛlɔ.

¹⁴ Na kɔbuli kunyɔdi kɔni nsia limeyi aavlanyɔ-maatɛdi lɛlɔ ni, kalɔ kammɔ kákwii kede kede.

¹⁵ Amu na Katɔti ɔ́su Noa ɔnini,

¹⁶ “Lɛ ɔkɔlɔ ɔmmɔ kemmo bo, awɔ ku ƒ'ulekudi ku ƒula bebi bananabi ku bana beleku.

¹⁷ Na aya na bebweyi bani nkya-a kudɔ mmɔ bana ƒui lidu lɛnɔ balɛ bebo kalɛ na ama lɛnɔ bawɔ na bemomo na kalɔ kammɔ ƒui lɛlɔ.”

¹⁸ Anwuɔsu Noa ɔ́lɛ úbo ku ulekudi ku nwuna bebi bananabi ku bana beleku.

¹⁹ Bebuo ƒui ku bebweyi bani mɔɔví kalɔ lɛlɔ ƒui ku baasɛ bammɔ ƒui ku lɛla biala lɛni mɔɔví kalɔ lɛlɔ ƒui bálɛ atɔ asia na bana udu kenye bási ɔkɔlɔ ɔmmɔ kemmo.

Noa Ɔ́du Ebuo Ɔ́kpa Úte Katɔti

²⁰ Amu na Noa ɔ́tu lɛkpabi lɛdi úte Unwoti na mmɔ. Na ɔmmɔ kama ni, úƒie bebuo bani nse sɛɛn mmɔ akɔ badi ku baasɛ bani nse sɛɛn na úti ɔ́kpa úte Unwoti na lɛkpabi lɛmmɔ lɛlɔ.

²¹ Na Unwoti ɔ́ƒɔ akpala ammɔ ku kayi ƒui na ɔ́su ɔnini, “Nsɔ lɛɛɛdubo kalɔ kamɛni buwida na ukyuli ɔsu ina ka likpidi kasusu káƒɔ-nwu lɛlɔ kemmo ƒui ɔ́si nwuna lɛnamu uwi. Na nsɔ lɛɛɛdubo bebweyi ƒui udu bɔyila aani kalɛ na lɛ́bla.

²² “Na ɔ́si ɔƒɛni wetédu kayawi kawɔlɔkɔ ni, edula ɔvawi ku udewi, ketudi uwi ku liwulu uwi, kaƒɛndi ku kɔyɔ uwi, usien ku ɔƒɛ ulada bubo ulaya kudii.”