Ala Kalɔ Buse 5 - Katɔti Ɔku Kedee

Kalɛ Na Bekyuli Bélie Ngba Ɔ́si Adam Útédu Noa Lɛlɔ

¹ Kalɛ na Adam údie kaba na bénweni bése lɛlɔ kɔtɛ ndi ɔmɛni. Uwi ɔni na Katɔti údie ukyuli ni, údie-nwu na anwu Katɔti udu kenye.

² Na údie-ma na badi ɔnana ku uleku. Na úte-ma kusɛ kusɛ. Na uwi ɔni na údie-ma mmɔ ni, ɔ́sia-ma lɛnyi ɔnii ukyuli.

³ Adam ɔ́ƒɔ akwa eti anyɔ ku avlaatɛ (130) na ɔ́wɔ ubi ɔnanabi na ɔ́lɛ-nwu na nwuna udu kenye. Na ɔ́sia-nwu lɛnyi ɔnii Set.

⁴ Ka Adam ɔ́wɔ Set kama ni, ɔ́sɔ úlie akwa eti leevu-aku (800) na ɔ́wɔ bebi bananabi ku belekubi bamba lɛnɔ asa na úkpi.

⁵ Anwuɔsu Adam akwa ani na úlie ngba ƒui ndi akwa eti leevu-maane ku avlaatɛ (930).

⁶ Ɔmmɔ kama ni, Set lɛnɔ ɔ́ƒɔ akwa eti anyɔ ku ɛlɔ (105) asa na ɔ́wɔ Enos.

⁷ Uwi ɔni na Set ɔ́wɔ Enos kama ni, ɔ́sɔ úlie ngba akwa eti leevu-maane ku maatɛ (807) úbu na ɔ́wɔ bananabi ku belekubi bamba lɛnɔ.

⁸ Anwuɔsu nwuna akwa ani ƒui na ɔ́ƒɔ asa na úkpi adi akwa eti leevu-yaalenwi ku leevu-inyɔ (912).

⁹ Ka Enos ɔ́ƒɔ akwa liti ku aavlene ni, ɔ́wɔ Kenan.

¹⁰ Na Enos ɔ́sɔ úlie ngba akwa eti leevu-aku ku leevu-ɛlɔ (815) úbu na ɔ́wɔ bebi bananabi ku belekubi bamba.

¹¹ Anwuɔsu Enos akwa ani ƒui na ɔ́ƒɔ asa na úkpi adi akwa eti leevu-maane ku ɛlɔ (905).

¹² Ɔmmɔ kama ka Kena ɔ́ƒɔ akwa liti ku aavlanyɔ (70) ni, ɔ́wɔ Mahalalel.

¹³ Na Mahalalel bɔwɔ kama ni, Kena ɔ́sɔ úlie ngba akwa eti leevu-aku ku aavlene (840) úbu na ɔ́wɔ bananabi ku belekubi bamba.

¹⁴ Anwuɔsu akwa ani ƒui Kena ɔ́ƒɔ asa na úkpi adi akwa eti leevu-maane ku leevu (910).

¹⁵ Ka Mahalalel ɔ́ƒɔ akwa liti ku leevu-ɛlɔ ni, ɔ́wɔ Yared.

¹⁶ Na Yared bɔwɔ kama ni, Mahalalel ɔ́sɔ úlie ngba akwa eti leevu-aku ku avlaatɛ (830) úbu na ɔ́wɔ bebi bananabi ku belekubi bamba.

¹⁷ Anwuɔsu Mahalalel akwa ani ƒui na ɔ́ƒɔ asa na úkpi adi akwa eti leevu-maatɛ ku aavlene-ɛlɔ (895).

¹⁸ Ɔmmɔ kama ka Yared ɔ́ƒɔ akwa eti atɛ ku leevu-inyɔ (162) ni, ɔ́wɔ Henok.

¹⁹ Na Henok bɔwɔ kama ni, Yared ɔ́sɔ úlie ngba akwa eti leevu-aku (800) úbu Na ɔ́wɔ bebi bananabi ku belekubi bamba.

²⁰ Anwuɔsu akwa ani ƒui na Yared ɔ́ƒɔ asa na úkpi adi akwa eti leevu-yaalenwi ku liti ku leevu-inyɔ (962).

²¹ Ka Henok ɔ́ƒɔ akwa liti ku leevu-ɛlɔ ni, ɔ́wɔ Metusala.

²² Na Metusala bɔwɔ kama ni, Henok ɔ́siaku Katɔti kama geen akwa eti aku (300) na ɔ́wɔ bebi bananabi ku belekubi bamba.

²³ Anwuɔsu akwa ani ƒui na Henok ɔ́ƒɔ adi akwa eti maatɛ ku leevu-ɛlɔ (365).

²⁴ Na Henok ɔ́siaku Katɔti kama geen ɔni na Katɔti útiku-nwu ɔ́tɔlɔku na ɔdi ɔ́sɔ útanu-nwu kudii.

²⁵ Ɔmmɔ kama ka Metusala ɔ́ƒɔ akwa eti atɛ ku avlaatɛ-maatɛ (187) ni, ɔ́wɔ Lamek.

²⁶ Na Lamek bɔwɔ kama ni, Metusala ɔ́sɔ úlie ngba akwa eti leevu-ɛlɔ ku avlaatɛ-inyɔ (782) úbu na ɔ́wɔ bebi bananabi ku belekubi bamba.

²⁷ Anwuɔsu akwa ani ƒui na Metusala ɔ́ƒɔ asa na úkpi adi akwa eti leevu-yaalenwi ku leevu-yaalenwi (969).

²⁸ Ka Lamek ɔ́ƒɔ akwa eti atɛ ku avlaatɛ-inyɔ (182) ni, ɔ́wɔ ɔnanabi.

²⁹ Na ɔ́sia-nwu lɛnyi ɔnii Noa. Mmɔ na ɔ́su ɔnini, “Ubi ɔmmɔ ndubɔda-bu udie abi ani na buubó na buunú ɔlɛ geen na bula enu kabla kani na bɔɔbla kemmo ka Katɔti úwida kalɔ kammɔ ƒui ɔsu.”

³⁰ Na Noa bɔwɔ kama ni, Lamek ɔ́sɔ úlie ngba akwa eti leevu-unwi ku aavlene-ɛlɔ (595) úbu na ɔ́wɔ bebi bananabi ku belekubi bamba.

³¹ Anwuɔsu akwa ani ƒui na Lamek ɔ́ƒɔ asa na úkpi adi eti leevu-ɛlɔ ku aavlanyɔ-maatɛ (777).

³² Ɔmmɔ kama ka Noa ɔ́ƒɔ akwa eti leevu (500) ni, ɔ́wɔ Sem ku Ham ku Yaƒet.